I Daniel nitedeaka riara bolo singa
6
Namatepa i Belsyazar, i Darius toMediaa nompamula nomparenta ri Babel. Tempo haitu ia noumuru onopulu rompae. 2 I Darius nombabagi kamagauana najadi saatu ropulu propinsi. Propinsi gahaitu simbo niparenta saito gubernur. 3 I Danielb bo randua tona ntanina nianggataka najadi topangganoto pokarajaa gubernur gahaitu, ala magau ledo rapakarugira. 4 Pokarajaa i Daniel nabelopa pade pokarajaa nu gubernur-gubernur bo randua roana haitu. Sabana haitu, magau nonia manganggataka i Daniel majadi tona nalangapa nturona ri njumangu kamagauana. 5 Tapi gubernur-gubernur bo topangganoto pokarajaa gubernur gahaitu, nompasimbuku nangelo kasala i Daniel riara pokarajaa poparentana, tapi ledo ria sakidea nikavara salana, apa i Daniel natutu, nanoa, bo nabelo pura pokarajaana.6 Pade nosiulikamo ira, “Aga riara petupuna ka Alatala nisombana bara rakavata kasalana.”
7 Pade hau puramo ira mantingayo magau bo nanguli, “O pua, Magau Darius, perapi doa mandoe umuru i pua! 8 Kami pura-pura topompasiayu kamagaua i pua, nau topangganoto pokarajaa gubernur, pura-pura gubernur, wakele gubernur, bo tomaoge ntanina. Kami nasintuvumo mombadekei panggava kami, ala i pua mosuvuraka parenta anu kana raoseaka mpuu-mpuu. Riara parenta haitu rauli ivei: Riara talupulu eo ledo ria saitoa radekei mombasomba bara merapi ante viata bara manusia, aga i pua mamala rasomba. Bara isema mombalumpaiki parenta haitu kana ratedeaka hau riara bolo singa. 9 Kami merapi, i pua mombateke sura parenta haitu nangoseaka atura-atura ntoMedia bo Persia anu ledo mamala rataja mpanjili.” 10 Jadi niteke Magau Dariusmo sura parenta haitu.
11 Niepepa i Daniel sura parenta haitu nisuvurakamo, nanjilimo ia hau ri banuana. Naria tombi ri bavona ntoto, bo pelabana notingayo hau ri Yerusalem. Bo eva biasana, ia nantaputu nosambaya bo nantoiya Alatala nisombana talu nggani saeo ri ngayo pelabana anu natebuka haitu.
12 Tempo bali-bali i Daniel nompeinta ia da ranja mposambaya merapi nte Alatala nisombana, 13 haumo pura-pura ira nantingayo magau bo nompangadu i Daniel. Niulira, “Apa ledo niteke i puamo sura parenta? Sura haitu nombatagi pura-pura tona talu pulu eona nompamula eo hitu ledo mamala merapi nte viata bara nte manusia, tapi aga i pua rasomba. Bo muni, isema mombalumpaiki parenta haitu, kana ratedeaka ri bolo singa.”
Nesana magau, “Nakana, bo parenta haitu nangoseaka atura-atura ntoMedia bo Persia anu ledo mamala rataja mpanjili.”
14 Pade nanguli vai ira ka magau, “I Daniel saito tona nitavani dako ri Yehuda, ledo nanturusi bo ledo nangoseaka parenta i pua. Ia nosambaya talu nggani saeo.”
15 Nangepe haitu, nasusa bo nabukumo rara magau, pade nielonamo akala mombakabasaka i Daniel dako ri pehuku. Sampe nanggovia da nipekirisinapa. 16 Pade nanjili vai tona gahaitu hau nantingayo magau, bo niulira, “Pua, kana ratoramiu muni, apa nantuntuni atura-atura toMedia bo Persia, parenta anu nipovia nu magau ledo mamala rabaliki.”
17 Kaupuna magau nomparenta ala i Daniel rasaka bo ratedeaka riara bolo singa. Nangulimo magau ka i Daniel, “Alatala anu nisombamu ante natutu, damo Ia mompakasalama iko.” 18 Naliu haitu sangu vatu mbaso niduliaka hau ri vamba bolo haitu, bo magau nombamere vatu haitu ante mere kamagaua bo mere pura-pura tomaoge, ala ledo ria saitoa mamala mombakabasaka i Daniel dako riara bolo nu singa haitu. 19 Pade nanjilimo magau hau ri banua kamagauana. Ia ledo nadota nangande bo ledo muni nadota rapakasana rarana. Bo njambongi-mbongi ledo napiri matana naturu.
20 Kabobayana nembangumo magau bo hau ri bolo singa ante sara rarana. 21 Nakavapa hamai, nongaremo ia ante eka rarana, “Oranga Daniel! Iko natutu nosomba Alatala anu natuvu sampe ri kasae-saena! Apa nipakuleNamo nompakasalama iko dako nte singa-singa ritu?”
22 Pade niepenamo suara i Daniel nesana, “Mandoe umuru i pua sampe ri kasae-saena! 23 Alatala anu nisombaku nantudu malaekaNa nombakapu sumba nu singa gahaitu bo ledo nikuyara yaku. Alatala nompakasalama yaku apa nisaniNa yaku ledo nasala nte Ia bo ledo muni nasala nte i pua.”
24 Nadamba mpuu rara magau bo niparentana tona mombasuvuraka i Daniel dako ri bolo haitu. Nisuvurakapa i Daniel, nipeinta mai ledo ria sakidea karona nabaka apa ia nanjarumaka Alatala nisombana. 25 Magau nomparenta mombasaka tona nompangadu i Daniel. Pade ira simbo njamboko ntaliana ninavusaka hau riara bolo nu singa. Dopa natudu ri tana riara bolo haitu, nisaka bo nipamasi nu singamo buku-bukura.
26 Naliu haitu Magau Darius nantudu movia sura parenta rapakatu ka todea ri njumangu ngata, valaa-valaa ngata bo basa ri njumangu dunia. Isi sura parenta ivei: “Perapi doa ala mantambai belo ka komiu pura-pura! 27 Kuparenta ka pura-pura tona anu naria ri bagia kamagauaku ala ira maeka bo mombabila Alatala anu nisomba i Daniel!
Iamo Alatala anu Natuvu sampe ri kasae-saena,
Sampe ri kasae-saena Ia momparenta.
KamagauaNa ledo maropu
kakuasaNa ledo ria kaupu-upuna.
28 Ia nepakasalama bo netulungi,
Ia novia kabaraka bo anu nipokumaaka
ri langi bo ri tana.
I Daniel nipakasalamaNamo
dako ri pesaka nu singa.”
29 Ivesiamo i Daniel bate-batena nidekeika nturo nalanga ri tempo pomparenta Magau Darius bo pomparenta Magau Koresh, toPersia.