Magau Belsyazar novia posusa
5
Naria saeo Magau Belsyazara [tupu Nebukadnezar] nombagaga sanjobu deana tomaogena nakava ri posusa mbaso bo nanginu-nginu anggur. 2 Da ranja mpanginu ira, i Belsyazar nantudu tona mangala boda-boda bulava bo salaka, anu niagosi ntupunab i Nebukadnezar dako riara banua nTUPU ri Yerusalem [anu nipake tempo nombasomba Alatala]. Patuju Magau Belsyazar ala pura-pura tomaogena, bereina, berei piarana manginu mompake boda haitu. 3 Jadi nikeniramo boda gahaitu ka ia, pade magau, tomaoge, bereina, bo berei piarana nanginu anggur nompake boda gahaitu. 4 Ira nanginu-nginu anggur bo nantoiya tau-tau anu nipovia lako ri bulava, salaka, tambaga, kayu, ase, bo vatu.5 Sampesanika nipeintaramo pale manusia notulisi ri rindi nu banua kamagaua. Rindi haitu nevangga nambela vanta mpoindo, nalanto mpuu nipeinta magau. 6 Jadi navioramo rarana, nabula bivina, nalembosi uvana sampe nolete pura taputuna. 7 Nongaremo ia bo nerapi ala pura-pura topeboto, toposibalimata bo pande betue raronde. Nakavapa ira, nangulimo magau, “Bara isema mamala mombabaca tulisi haitu bo manguli batuana ka yaku, ia kudekeika baju kamagaua, haitumo baju ndoe anu nasese mpalola. Bo kudekeika bili bulava tandana ala rabila ntodea. Bo ia kuanggataka majadi tona nakuasa katataluna riara kamagauaku.” 8 Tapi pura-pura topande anu nakava nironde magau pangane, ledo ria saitoa namala nombabaca bo ledo muni nisanira nombabatuasi anu nitulisi ri rindi haitu. 9 Naupu haitu nantambaimo kaviora Magau Belsyazar bo muni tomaoge-tomaogena najadi naingu rarara.
10 Nangepe magau bo pura-pura tomaogena nongare-ngare, nesuamo berei magau ntuac hau riara ntombi posusa bo niulina, “Mandoe umuru, i pua, sampe kasae-saena! Pakatinonto rara i pua bo nemo maeka. 11 Sabana riara kamagaua i pua naria saito langgai nosanga i Daniel anu nikuasai anu nabaraka. Ri tempo poparenta ntupu i pua, tona haitu mpuu-mpuu nangisani bo ia namala neboto. Ia muni napande, eva kapande viata. Tupu i pua, Magau Nebukadnezar nanganggataka ia nombabalenggai topeanto, toposibalimata, topangisani, bo topande nanggita betue. 12 Ia natau mpuu nombabatuasi pangipi, bo namala nombasovadaka anu natetabuniaka bo namala muni noboto anu nakaja nikava mpekiri. Sangana i Daniel, tapi magau nompoposanga ia i Beltsazar. Rondemo ia. Ia mamala mobatuasi anu nitulisi haitu.”
I Daniel nombatentei batua nu potulisi ri rindi
13 Pade nikenimo i Daniel hau nte magau. Bo nekutanamo magau, “Ledo iko i Daniel, toYahudi anu nitavani nikeni ntupuku lako ri tana Yehuda baipia? 14 Niepeku iko nikuasai anu nabaraka bo iko natau nompekiri bo ledo saitoa nasimbayu ante iko. 15 Topangisani bo toposibalimata nakava ri sii bo nipesobaramo nombabaca potulisi haitu bo manguli batuana ka yaku, tapi ledo nipakulera nombabatuasina. 16 Dako niepeku, iko vei namala nombasovadaka anu natetabuniaka bo muni namala noboto anu nakaja nikava mpekiri. Ane mamala iko mombabaca potulisi bo manguli batuana ka yaku, iko kudekeika pakea kamagaua, haitumo baju ndoe anu nasese mpalola, bo bili bulava [tandana ala rabila ntodea]. Iko kuanggataka majadi tona nakuasa katataluna riara kamagauaku.”
17 Nesana i Daniel, “Ledo paraluu radekeimiu tambo ka yaku, dekeimo ka tona ntanina. Kubaca bo kubatuasi ka i pua anu nitulisi haitu.
18 Alatala anu nompajadi dunia bo isina nanganggataka tupumiu i Nebukadnezar najadi magau mbaso. NidekeiNa muni kakuasa mbaso ka ia bo sangana natolele ri umba-umba. 19 Kambaso kuasana haitu sampe tona lako ri njumangu ngata, valaa-valaa ngata bo basa naeka bo naviora pura nte ia. Ane ia madota mompatesi tona, tona haitu kana rapatesina. Bo muni ane naria tona ledo rapatesina, tona haitu rapalambana matuvu. Ia nanganggataka bara nombanavusaka tona anu nipodotana. 20 Tapi najadi-jadipa ntoto kalanga rarana, kavatuna bo kadaa panggaviana, ia nipopanaumo dako ri kamagauana bo nalipomo kakuasana. 21 Ia nipopalai dako nte todea bo pekirina najadi eva pekiri nu binata. Ia natuvu nosanggani ante keledaid nggakayu, nangande kavoko mpo japi bo [naturu ranggarava] nibanggasi nu leni. Kaupuna nipangakunamo, aga Alatala anu Nalangapa Nturona pade tupu-tupu ntanina. Alatala haitumo anu nombakuasai kamagaua manusia, bo kamagaua haitu nidekeiNa ka tona anu nipodotaNa.
22 Tapi komiu, pua, tupu i Nebukadnezar. Nau nisanimiu pura-pura haitu, ledo nadota komiu nompakaede raramiu.
23 I pua nompakalanga rara nte Tupu ri suruga, bo nabia nantudu tona nanggeni boda-boda anu niagosi dako ri Banua nu Alatala tumai ri posusa. Pade i pua bo pura-pura tomaoge, berei, bo berei piara i pua, nompake boda gahaitu manginu mombatoiya viata. I pua nantoiya tau-tau anu nolenje mpo viata. Tau-tau haitu nipovia lako ri bulava, salaka, tambaga, ase, kayu, bo vatu. Tau-tau ledo namala nekanoto bara neepe bo ledo nangisani nuapa-nuapa. I pua ledo nombabila Alatala anu nompakatantu tuvu bo mate i pua bo nompakatantu dala nggatuvu i pua. 24 Haitumo sabana Alatala nompopakita pale haitu mombatulisi tevaiNa.
25 Hitumo anu nitulisi haitu:
Menꞌe, menꞌe, Tekꞌel, Ufarsine.
26 Menꞌe, batuana: Nireke. Kasae nu poparenta i pua nireke Alatalamo bo nipakaupuNamo. 27 Tekꞌel, batuana: Nitimba. Panggavia i pua nitimba nu Alatalamo bo nikava mai nakura ntoto panggavia nabelo nipovia i pua [jadi i pua nireke ledo masipato moparenta]. 28 Peres, batuana: Nibagi. Kamagaua i pua nibagi ka toMedia bo toPersia.”
29 Naupu sia Magau Belsyazar nomparenta ala i Daniel rapopakeka baju ndoe anu nasese mpalola, bo rapopobilika bili bulava ri tambolona. Bo nianggatakanamo i Daniel najadi tona nakuasa katataluna riara kamagauana.
30 Bongi haitu munif i Belsyazar magau Babel haitu nipatesi.