Pangipi i Nebukadnezar karongganina
4
Siimo anu niuli nu Magau Nebukadnezar nipakatuna ka todea ri njumangu ngata bo basa ri dunia.2 Niulina, “Salandoa! Yaku madota motesaki anu najadi ri karoku, anu nabaraka bo namadai nipovia nu Alatala anu nompajadi dunia bo isina.
3 Namadai bo nambaso mpuu kabaraka nipoviaNa!
Alatala najadi Magau sampe ri kasae-saena,
Ia nakuasa sampe ri muli nu muli.”
4 Yaku nonturo natinonto ri banua kamagauaku bo nagana katuvuku. 5 Tapi naria sambongi, tempo yaku naturu, yaku nangipi naria anu nikitaku mpuu-mpuu nompakaeka raraku. 6 Pade nirondeku pura topangisani ri Babel manguli ka yaku batua nu pangipiku haitu. 7 Tapi tempo topeanto, toposibalimata, topangisani bo topande nanggita betue haitu nakava, bo nitesaku pangipiku haitu ka ira, ledo ria saitoa nompakule nombabatuasina. 8 Kaupuna nakavamo i Daniel anu nidae i Beltsazar nangoseaka sanga nu viata nisombaku. I Daniel nikuasai anu nabarakaa, niuliku muni pangipiku ka ia, ivei, 9 “Hee Beltsazar, pakeni ntopangisani, nisaniku iko nikuasai anu nabaraka, sampe ledo ria anu natetabuniaka ka iko. Epe dala nu pangipiku hitu bo tentei ka yaku batuana.
10 Tempo yaku naturu, nikitaku sanggayu kayu natuvu ri tatanga dunia. 11 Kayu haitu nalanga mpuu, batana nambaso bo naroso mpuu. Lolona nakava ri langi, sampe pura-pura tona ri dunia namala nanggitana. 12 Tava-tavana da naramanta bo noviruka mpuu vuana, magana rakande ntona sadunia. Binata-binata nekanaluu ri vayona bo tonji-tonji nojumu ri tingguna. Bo pura-pura anu natuvu namala nangande vuana.
13 Tempo yaku da nantanondoaka anu nikitaku haitu, nikitaku saito malaekab nanau dako ri suruga, Ia topojaga nainga-inga. 14 Namangga mpuu suarana nanguli, ‘Tovomo kayu haitu bo kotosimo tinggu-tingguna, soumo tavana bo kamburakamo vuana. Livumo binata nekanaluu ri tambena bo tonji nojumu ri tingguna. 15 Tapi palambakamo patuana ri tana. Poumo ante rante ase bo rante tambaga, bo bolimo ranggarava. Palambakamo ia rabanggasi nu leni, matuvu singgani ante binata-binata bo kavoko ranggarava. 16 Palambakamo pekiri nu manusiana mabali majadi pekiri nu binata pitu mpaec kasaena. 17 Hitumo hii kabotu kami malaeka pojaga. Patuju kami ala nau ri umba-umbapa tona, rapangakura Alatalamo anu nompajadi dunia bo isina, nakuasa ka kamagaua manusia. Bo kamagaua haitu nidekeiNa ka isema-sema nipodotaNa, naupa ka tona anu nireke ledo noguna!’
18 Naupu haitu, yaku Nebukadnezar nompapola tesaku ivei: ‘Hitumo hii pangipiku, Beltsazar. Ulimo batuana ka yaku. Ledo ria saitoa topangisani ri kamagauaku nompakule nombabatuasina ka yaku, tapi iko nompakule, sabana iko nikuasai anu nabaraka.’ ”
I Daniel nombatentei batua nu pangipi haitu
19 Nangepe haitu, i Daniel anu nikasangai muni i Beltsazar, natikaja bo nokangaa sampariolo. Jadi, yaku, Magau Nebukadnezar, nanguli ka ia, “Beltsazar, nee makini raramu mompekirika pangipi bo batuana tutu.”
Nesana i Beltsazar, “Pua, nabelo ntoto ane rapana kajadia anu nikava mpangipimiu tutu majadi nte bali-balimiu bo ledo majadi ri karomiu mboto. 20 Pua, kayu nipeintamiu nalanga mpuu, lolona nakava ri langi, bo namala nikita ntona pura-pura ri dunia. 21 Tava-tavana singga gaya bo vuana damo noviruka sampe nagana mompakabosu pura-pura tona ri dunia. Binata-binata nekanaluu ri tambena pura, bo tonji-tonji nojumu ri tingguna. 22 Komiumo tuu nirapaka kayu langa bo naroso haitu. Kaoge i pua mantambai sampe ri langi bo kakuasa i pua mantambai kaluona sampe ri pantaa nu dunia. 23 I pua nanggita saito malaeka pojaga nanau dako ri langi nanguli, ‘Tovomo kayu hitu bo rogosimo, tapi palambakamo patuana maboli ri tana. Poumo ante rante ase bo rante tambaga bo bolimo ranggarava. Palambakamo ia rabanggasi nu leni bo matuvu singgani ante binata pitu mpae kasaena.’
24 Pua, hitumo hii batua nu pangipimiu. Alatala anu nompajadi dunia bo isina, nobotusi anu majadi ri karo i pua mboto. 25 Komiu rapopalai dako nte manusia bo matuvu ante binata-binata ranggarava. Pitu mpae kasaena i pua mangande kavoko mpo japi, bo maturu ri tana karava, sampe rabanggasi nu leni. Maupupa haitu pade manotomo rara i pua bo mompangaku aga Alatala anu nompajadi dunia bo isina, nakuasa ri kamagaua manusia, bo kamagaua haitu nidekeiNa ka isema-sema nipodotaNa. 26 Malaeka pangane nanguli, ‘Palambakamo patua haitu maboli ri tana.’ Haitu batuana i pua majadi magau mpanjili maupu i pua mangaku Alatala nombakuasai njumangu dunia. 27 Sabana haitu aginamo i pua mangoseaka anu kuuli hitu. Tuumo movia dosa, tapi poviamo anu nabelo bo nanoa, pade potovemo tona napakasi. Ivesia rapoviamiu ala komiu batena masana.”
28 Pura-pura haitu najadi ri karoku, yaku Magau Nebukadnezar. 29 Sapulu rombula kaliuna haitu tempo yaku nolipa-lipa ri unju bavona ntoto ri banua kamagauaku ri Babel, 30 damo aga niuliku, “Peintaka, nagaya mpuu ngata Babel! Yakumo hii nombabanguna najadi ngata mbaso mompopakita kakuasaku, karosoku, kagaya bo kambaso kamagauaku!”
31 Dopa naupu yaku notesa, niepeku suara dako ri langi, “Magau Nebukadnezar, epemo hitu! Kuasa kamagauamu raalasimo dako nte iko. 32 Iko rapopalai dako ri tatanga manusia, bo monturo nte binata-binata ranggarava. Pitu mpae kasaena iko aga mangande kavoko mpo japi. Maupu haitu pade manoto raramu bo nutora Alatalamo anu nompajadi dunia bo isina, nombakuasai kamagaua nu manusia, bo kamagaua haitu radekeiNa ka isema-sema nipodotaNa.”
33 Jadi nadupa mpuumo tesa haitu. Yaku Nebukadnezar nipopalai dako nte manusia dea bo nangande kavoko mpo japi. Karoku nibanggasi nu leni, buluaku najadi nandoe mpo bulu nu love bo kandukuku nandate mpo kanduku ntonji.
I Nebukadnezar nantoiya Alatala
34 Naliu kapitu mpaena, nantingoa ri langimo yaku, nanoto mpanjilimo pekiriku. Jadi nitoiyakumo Alatala anu nompajadi dunia bo isina. Kutoiya bo kupakaoge Ia anu natuvu sampe ri kasae-saena.
Alatala najadi magau sampe ri muli nu mulina,
bo Ia nakuasa sampe ri kasae-saena.
35 Todea-todea nu ngata ri dunia ledo naria gunana.
Alatala nombakuasai malaeka ri suruga bo toponturo ri dunia nangoseaka dotaNa.
Ledo ria saitoa nompakule mangeva dotaNa,
ledo ria mabia nompekutana, “Nuapa nipoviaMiu?”
36 Tempo pekiriku nanoto mpanjilimo, jadi kaoge, kagaya, bo kambaso nu kamagauaku nipopanjili ka yaku. Yaku nikadambanaka nu tomaogeku bo topokarajaa ka yaku, yaku nipopanjili ri kamagauaku bo kagaya nu kamagauaku najadi nambasopa pade nokolu.
37 Jadi hitupa yaku, i Nebukadnezar mantoiya, mompakalanga bo mompakaoge Magau ri Suruga. Pura-pura anu nipoviaNa nakana bo nanoa bo Ia nompakule mompakaede rara ntona anu nalanga rarara.