I Nebukadnezar nomparenta todea mombasomba tau-tau bulava
3
Magau Nebukadnezar novia sangu tau-tau bulava ropulu-papitu metere kalangana bo kambaso karona talu metere. Bo nipopeanggana ri lemba Duraa ri propinsi Babel. 2 Pade nigagana pura magau, gubernur, bupati, tona nipompangala pepatudukina riara ngata, tona nipomboli doi, bo topotangara ala mompakaasa tau-tau nipopeanggana haitu. 3 Nakava purapa ira bo neangga ri ngayo nu tau-tau haitu, nongaremo topanguli parenta magau ante suara namangga, 4 “Sampesuvu-sampesuvu dako ri njumangu ngata bo basa! Epemo parenta nu magau hitu: 5 ane momoni tabue, suli, kacapi, bo mpengaya oni-oni ntaninab, komiu kana mantaputu mombasomba tau-tau bulava nipopeangga nu magau Nebukadnezar. 6 Isema ledo mangoseaka parenta hitu kaliu-liu ratedeaka ri mata nu apu cda navaya-vaya.” 7 Nangepe musi nipopomoni, todea dako ri njumangu ngata, valaa ngata bo basa nantaputu bo nombasomba tau-tau bulava haitu.Tatalu roa i Daniel nirai nombaliunaka parenta nu magau
8 Bara sakondua toBabeld nangala loga haitu mompanavu toYahudi. 9 Niulikara Magau Nebukadnezar, “Kambou i pua matuvu sampe ri kasae-saena! 10 I pua mboto nomparenta ane rapopomoni musi, pura-pura tona kana mantaputu mombasomba tau-tau bulava haitu, 11 bo isema ledo mangoseaka parenta haitu ratedeaka ri mata nu apu da navaya-vaya. 12 Tapi naria bara sakondua toYahudi anu nipaloga i pua moparenta ri propinsi Babel ledo nangoseaka parenta i pua. Haitumo i Sadrakh, i Mesakh bo i Abednego. Ira ledo nadota mombasomba viata-viata nisomba i pua bo ledo muni nadota mombasomba tau-tau nipopeangga i pua.”
13 Nangepe anu niulira haitu, narau mpuumo rara nu magau bo niulina, “Keni tumai ira mantingayo yaku.” 14 Nekutanamo magau, “Hee Sadrakh, Mesakh, bo Abednego! Nakana mpuu komiu ledo nadota mombasomba viata-viata nisombaku? Bo ledo muni madota mombasomba tau-tau bulava nipopeanggaku haitu? 15 Jadi hitu-hitu, ane raepemiu pura-pura moni musi, masadia komiu mantaputu bo mombasomba tau-tau bulava anu nipopeanggaku haitu? Ane ledo madota, komiu kaliu-liu ratendeaka riara apu da navaya-vaya. Bo tupu umbana mompakule mombakabasaka komiu dako ri kuasaku?”
16 Nesanamo i Sadrakh, i Mesakh bo i Abednego, “I pua anu nipakaoge, kami ledo aga mombasaliku karo kami. 17 Alatala nisomba kami nompakule mompakasalama kami dako ri kuasa i pua bo dako ri apu da navaya-vaya haitu. 18 Tapi ane rapana ledo rapakasalamaNa kami, damo i pua mombataserena, apa kami hii ledo mombasomba viata-viata anu nisomba i pua, bo ledo muni kami mombasomba tau-tau nipopeangga i pua haitu.”
I Sadrakh, i Mesakh bo i Abednego nihuku mate
19 Jadi nevoyamo rau rara magau Nebukadnezar nanggita i Sadrakh, i Mesakh bo i Abednego, sampe nalei ntoto lenjena. Niparentana tona mantambai kavaya nu apu pitu nggani kapanena dako ri apu biasa. 20 Pade nituduna bara sakondua tantara torosona mombatipunggu i Sadrakh, i Mesakh, i Abednego, bo motedaka ira hau ri mata nu apu navaya haitu. 21 Ira tatalu haitu da nte pakea pokarajaae kaliu-liu nitipunggu pakaroso, bo nitedeaka ri mata nu apu navaya-vaya haitu. 22 Apa parenta magau kana masalisa rapovia, jadi nitambaimo kavaya nu apu nelabi karegana sampe vaya nu apu nompalabusi tona nantendeaka i Sadrakh, i Mesakh bo i Abednego hau riara apu. 23 Jadi ivesiamo ira tatalu nitipunggu pakatede nanavu riara apu navaya haitu.
24 Sampesanika natikajamo Magau Nebukadnezar. Neangga ia nasalisa bo nangulika anabuana, “Apa ledo nitipunggumo ira tatalu haitu pangane bo nitedaka ri apu?” Nesanamo ira, “Iyo, pua.”
25 Nanguli vai magau, “Tapi nakuya nikitaku ampa ira nolipa-lipa ri tatanga nu apu haitu? Ledo nitipunggu bo ledo ntoto nakuya. Nee-nee tona kaampana haitu bara viata!”
Ira tatalu nikabasaka dako ri pehuku bo nipopompene nturora
26 I Nebukadnezar hau nanggaparai vamba ntombi anu nipompalabu ira tatalu bo nanguli, “Sadrakh, Mesakh, Abednego batua nu Alatala nompajadi dunia bo isina! Pesuvumo dako riara apu tutu!” Jadi nesuvumo ira. 27 Pura-pura wakele magau, gubernur, bupati bo topokarajaa ntanina nombatiku ira tatalu haitu bo nikitara ledo ntoto naria sakidea ira nikande nu apu. Buluara ledo muni napapu, pakeara ledo napapu bo nau soa unu nu apu, ledo naria nte ira.
28 Pade nangulimo magau, “Ratoiyamo Alatala nisomba gi Sadrakh, Mesakh bo Abednego! Ia nombatudu malaekaNa mompakasalama batuaNa tatalu hitu, apa ira nanjarumaka Ia. Nilumpaikiramo parentaku bo nipokonorapa mamate pade mombasomba bara mombatoiya viata anu nisombaku. Aga Alatalara mboto nipokonora rasombara.
29 Sabana haitu kuuli ka komiu, nau todea dako ri njumangu ngata bo basa, isema-sema nompakadaa sanga nu Alatala anu nisomba i Sadrakh, i Mesakh bo i Abednego, ratampa rogo bo banuana ragerosi sampe marupu. Apa ledoria tupu ntanina mamala movia eva anu nipovia nu Alatala nisombara.”
30 Naupu haitu nipopompene nu magau vai nturora tatalu. Jadi i Sadrakh, i Mesakh bo i Abednego, sampe ira najadi tomaoge nalanga nturona ri propinsi Babel.