Pangipi i Nebukadnezar
2
Nagana rompae Magau Nebukadnezar nomparenta, naria sambongi ia nangipi. Pangipina haitu nompakatarento rarana, sampe ia domo namonjo. 2 Sabana haitu nirondena topeanto, toposibalimata, sando bo tona natau,a mombabatuasi pangipina haitu. 3 Nakavapa ira ri sia, nangulimo magau, “Yaku nangipi, bo raraku natarento, madota kusani batuana!”4 Nesana ira ante basa Aram,b “Kambou i Pua matuvu sampe kasae-saena! Ulimo pangipimiu ka kami ala ratentei kami batuana.”
5 Nesana magau, “Ivei pobotusiku: kana raulimiu ka yaku pangipiku bo raulimiu muni batuana. Ane ledo rapakulemiu mombatuasina, komiu kana ratampa rogo, bo banuamiu ragerosi pakarupu. 6 Tapi ane rapakulemiu manguli pangipiku bo mobatuasina, kudekei tambo nabelo bo pebila naoge ka komiu. Jadi ulimo pangipiku bo batuana!” 7 Nesanamo ira, “Uli ka kami ntani ruru pangipimiu, pua. Maupu sia pade ratentei kami batuana.”
8 Nangepe haitu nesanamo magau, “Eva suka nitasereku, komiu aga nokalera-lera, apa nisanimiu pobotusiku, 9 kuhuku pura komiu apa ledo nipakulemiu manguli pangipiku ka yaku. Nasintuvumo komiu modava bo mompongeika yaku bo nisarumakamiu kubaliki niaku. Jadi ulimo pangipiku haitu, ala kusani komiu mamala mombabatuasina.”
10 Topande gahaitu nesana, “Ri njumangu dunia hitu ledoria saitoa mompakule manguli nuapa nipodota i pua. Bo dopa muni naria saitoa magau nau damo berimba kaogena nerapi anu ivehaitu dako nte topeanto, toposibalimata, bo tona napande. 11 I pua nomperapi anu nakaja ntoto. Ledo ria saitoa manusia mompakule mompopaisani pangipi i pua, bara aga viata, tapi ira ledo nonturo ri tatanga nu manusia.”
12 Nangepe pesanara haitu narau mpuu rara nu magau sampe nisuvurakana parenta mompatesi pura-pura topangisani ri ngata Babel. 13 Jadi nipatolelemo parenta haitu, bo pura-pura topangisani sampe i Daniel ante roana muni, nielo rapatesi.
Alatala nompopaisani batua nu pangipi haitu ka i Daniel
14 Jadipa haumo i Daniel mosinggavaka i Ariokh, pakeni ntopojaga magau, anu nasadiamo mehuku mate. Nipakabelo-belo i Daniel mpuu nekutana nte ia, 15 “Nakuya nisuvuraka nu magau parenta nakaja gaga ivehaitu?” Jadi niuli i Ariokhmo nuapa najadi.
16 Jadi nasalisamo i Daniel hau nantingayo magau bo niperapina loga manguli pangipi bo mombabatuasi pangipi nu magau haitu. 17 Perapi i Daniel nipoiyona, jadi nanjilimo i Daniel hau ri banuana bo niulina pura anu najadi haitu ka i Hananya, i Misael bo i Azarya. 18 Nituduna ira mosambaya merapi nte Alatala ri suruga ala maasi mataNa manggita ira bo manguli pangipi haitu bo batuana ala ira ledo rahuku mate mosinggani nte topangisani ntanina ri Babel. 19 Bongi haitu muni Alatala nompopakita bo nompopaisani ka i Daniel pangipi bo batua mpangipi magau anu natetabuniaka haitu. Jadi i Daniel nantoiya Alatala ri suruga, 20 ivei,
“Ratoiyamo Alatala sampe ri kasae-saena
sabana Iamo puna noto bo karoso.
21 Ia nompakatantu tempo bo gantana,
Ia nompakanavu bo nombaanggataka tona makuasa.
Ia muni nombadekei noto mpekiri
bo nombadekei katau.
22 Iamo nompopaisani anu natetabuniaka.
NisaniNa anu najadi ri kalandana.
Ia nibungu nu reme.
23 O Alatala nisomba ntotuaku nggaulu, Komiu kutoiya bo kupakaoge.
Apa Komiu nombadekei katau bo karoso ka yaku.
NipoiyoMiumo perapi kami.
Bo nipopakitaMiumo anu kupesanaka ka magau.”
I Daniel nanguli pangipi bo batuana
24 Naliu haitu haumo i Daniel mosinggavaka i Ariokh tona nipakatantu mompatesi topangisani ri Babel. Nangulimo i Daniel ka ia, “Nee nupatesi topangisani gahaitu. Keni yaku hau mantingayo magau, manguli pangipi bo batuana.”
25 Jadi nasalisamo i Ariokh nanggeni i Daniel mantingayo Magau Nebukadnezar bo nanguli, “Nikavakumo saito batua anu nipali dako ri tana Yehuda anu nompakule manguli pangipi bo batua mpangipi i pua.”
26 Jadipa nangulimo magau ka i Daniel anu nidae i Beltsazar, “Mupakule mpuu manguli pangipiku bo mombabatuasina?”
27 Pade nesanamo i Daniel, “Pua, ledoria topangisani, toposibalimata, topeanto, bara pande betue mompakule manguli pangipi bo batua mpangipi tutu ka i pua. 28 Tapi ri suruga naria Alatala bo Ia nompopaisani anu natetabuniaka, bo niuliNa ka i pua nuapa majadi ri eo nggapurina. Jadi dekeimo loga ka yaku mombatentei pangipi bo batua mpangipi nikita i pua tempo naturu.
29 Tempo i pua naturu, neumba ri pekiri i pua anu majadi ri eo nggapurina. Alatalamo nompopaisani anu natetabuniaka, bo Iamo nompopakita ka i pua anu majadi ngena. 30 Anu natetabuniaka haitu nipopakita ka yaku, ledo sabana yaku napandepa pade tona ntanina, tapi ala rasani i pua batua pangipi bo isi mpekiri i pua mboto.
31 Hitumo anu nikita i pua: Ri ngayo i pua naria sangu tau-tau neangga. Nambaso mpuu, nenggila-nggila, bo nompakaviora rara. 32 Balenggana nipovia lako ri bulava mpuu, bambarana bo palena nipovia lako ri salaka, kopena bo kuntuna nipovia lako ri tambaga, 33 paana lako ri ase bo kadana sabagia lako ri ase bo sabagiapa vai lako ri tana leic. 34 Tempo nikanoto i pua, naokatakamo sangu vatu mbaso dako ri kabinggena, ledo nisenggi ntona. Vatu haitu nokaduli bo nombarunju kada nu tau-tau anu nipovia lako ri ase bo tana lei haitu, sampe narupusaka. 35 Ri tempo haitu muni nadunggamo tau-tau haitu. Ase, tana lei, tambaga, salaka bo bulava narupusaka singgani najadi santambu eva mee mpae ri povaro ri tempo napane. Niburu mpoiri, sampe ledo ntoto naria naboli. Tapi vatu nombarunju tau-tau haitu najadi nambaso mpo bulu bo nomporeki njumangu dunia.
36 Haitumo dala mpangipimiu bo hitupa kutentei batuana. 37 I pua nipakaogepa pade magau-magau ntanina; i pua nakuasapa. Alatala ri suruga nombadekei kamagaua hitu, kakuasa, karoso bo kagayana ka komiu. 38 I pua nipajadiNa nombakuasai manusia, tonji bo binata ri umba-umba ponturora. NidekeiNa komiu nomparenta pura-pura haitu. I pua mbotomo nirapaka balengga nu tau-tau anu nipovia lako ri bulava haitu. 39 Tapi maupu kamagaua i pua, meumba ngena kamagaua ntanina anu ledo mambaso mpo kamagaua i puad. Pade meumba kamagaua katataluna anu nirapaka tambaga haitue, anu mombakuasai njumangu dunia. 40 Maupu sia pade meumba kamagaua kaampanaf, anu maroso mpo ase. Bo eva ase mompakabere bo mompakarupu nuapa-nuapa, ivesia muni kamagaua kaampana haitu mompakagado bo mompakagero kamagaua-kamagaua ntanina. 41 Kada ante koya-koya nggada nu tau-tau anu nipovia lako ri tana lei nte aseg, haitu nompopakita kamagaua matebagi-bagi ngena. Kamagaua haitu maria muni ngena karosona apa naria ase niposigalo ante tana lei. 42 Koya nggada anu sabagia lako ri ase bo sabagia lako ri tana lei, batuana maria kamagaua sabagia maroso bo sabagia ledo maroso. 43 Evamo nikita i pua, ase nogalo ante tana lei haitu nompopakita kamagaua haitu mompasimbuku mompakasangu ante dala mosipoberei nte kamagaua ntaninah. Tapi pompasimbukura haitu aga malenge bayangi, nasimbayu ante ase ledo nosikantaka nte tana lei. 44 Ri tempo poparenta nu magau-magau haitu, Alatala ri suruga mompopeangga kamagaua anu maroso sampe ri kasae-saena bo ledo ntoto radagi ntona ntanina. Kamagaua haitu mombagerosi pura-pura kamagaua ntanina, bo kamagaua haitu ledo maria kaupu-upunai. 45 I pua mboto nanggita vatu ledo nisenggi ntona, anu nokaduli dako ri bingge bo nombarunju tau-tau anu nipovia lako ri ase, tambaga, tana lei, salaka bo bulava sampe narupu. Alatala nambaso kakuasaNa bo nipopakitaNa ka i pua anu majadi ngena. Pangipimiu tutu namala raparasaya bo anu nitenteiku hitu mpuu-mpuu nakana.”
I Daniel nanggava tambo lako nte magau
46 Pade nantaputumo Magau Nebukadnezar ri ngayo i Daniel mombabila ia. Bo nisuvurakana parenta ala i Daniel ratunjuka dupa bo radekeika pesomba-pesomba ntanina mompakaoge ia. 47 Nokumaamo magau bo nanguli, “Iyo mpuu, Daniel. Alatala nisombamu naogepa pade tupu-tupu ntanina. Ia nombakuasai pura-pura magau, bo nompopaisani pura-pura anu natetabuniaka. Nisaniku haitu apa nipakulemu nombatentei pangipi bo batua mpangipi anu natetabuniaka haitu.” 48 Pade nidekei nu magaumo nturo nalanga ka i Daniel. Nidekeina tambo nadea, bo nianggatakanamo majadi gubernur propinsi Babel, bo nipajadina pakeni nu pura-pura topangisani ri kamagauana. 49 I Daniel nerapi nte magau ala i Sadrakh, i Mesakh, bo i Abednego mamala mombatulungi ia momparenta ri propinsi Babel haitu. Jadi nianggataka nu magaumo ira bo i Daniel batena nokarajaa ri banua kamagaua.