Nabi Daniel
Kabilasa-kabilasa ntoYahudi ri kamagaua i Nebukadnezar
1
Da talu mpae Magau Yoyakim nomparenta ri Yehuda,a nakava Magau Nebukadnezarb dako ri Babel bo nompatiku kota Yerusalem. 2 Tupu nombadekei ia nombadagi Magau Yoyakim bo nangagosi sabagia mbara-mbara noali ri Banua nu Alatala. Tona nitavanina, nikenina hau ri banua petupuna ri Babel bo mbara-mbara haitu, niboliakana riara pomboli ka kakalumana ri banua petupuna.3 Ri ngata Babel haitu i Aspenas nombabalenggai topokarajaa ri banua kamagaua. Nitudu nu magaumo ia manggeni bara sakondua kabilasa ntoIsrael, dako ri muli nu magau bo muli nu madika. 4 Ira ledo tona narumpu karona. Ira kana tona nagaya, nalanga sikolana, nanipi rarana, haitumo tona masipato mokarajaa ri kamagaua. I Aspenas kana mompatuduki ira motulisi bo mombaca buku-buku basa Babelc. 5 Magau nompakatantu kandea bo panginura masimbayu nte anu nipasadia ka tona ri banua magau. Magana talu-mpae rapatuduki, ira hau mantingayo magau bo mokarajaa ka ia. 6 Dako ri kabilasa gahaitu naria muni i Daniel ante tatalu vegana, haitumo, i Hananya, i Misael bo i Azarya. Ira dako ri valaa Yehuda pura. 7 I Aspenas anu nombabalenggai topokarajaa ri banua kamagaua, nombasambei sangara: i Danield nipoposanga i Beltsazar, i Hananyae nipoposanga i Sadrakh, i Misaelf nipoposanga i Mesakh bo i Azaryag nipoposanga i Abednego.
8-9 Alatala nompakaluu rara i Aspenas sampe nipotovena i Daniel. I Daniel nonia ledo mompakaruto karona ante kandea bo panginu anggur nu magau.h Sabana haitu niperapina nte i Aspenas, kandea ntaninamo rakandera.
10 Tapi i Aspenas naeka ka magau, jadi niulina, “Magau mboto nompakatantu kandea bo panginumiu, [ane komiu ledo mangande kandea bo panginu nu magau, komiu ledo maroso eva pura-pura kabilasa ntanina.] Ane ivesia, natantumo yaku rapatesi nu magau.”
11 Pade nitesa i Daniel vai ka topojaga nipatava i Aspenas mompasiayu i Daniel ntali vega. 12 Nangulimo i Daniel, “Ujimo kami sapulu eona, ledo mangande bau bo ledo manginu uve anggur, kamba uta bo uve nggoomo dekei ka kami. 13 Magana sapulu Eona, pasimbayu vei karoso nggaro kami ante karoso nggaro kabilasa ntanina anu nangande kandea nipakatantu nu magau, pade malantomo nukita nangoseaka panggitamu mboto.”
14 Jadi nipoiyo ntopojaga haitu bo nipesobana mpuumo sapulu eona. 15 Naganapa gantana sapulu eo haitu, narosopa bo nabelopa pokarora ampa pade karo kabilasa-kabilasa nangande kandea nipakatantu nu magau. 16 Jadi nompamula dako rahaitu domo nidekeina bau bo anggur, damo pangande ntanina bo uve nggoo.
17 Alatala nombadekei noto bo kanipi rara nte pangisani belo ka kabilasa ampa haitu. Bo ntanina dako rahaitu, nidekeiNa muni kapande ka i Daniel mombabatuasi pangipi bo anu nipopakita nu Alatala ka tona.
18 Naganapa talu mpae ira nipatuduki, nikeni i Aspenas puramo ira hau mantingayo Magau Nebukadnezar. 19 Naupupa ira nipekutana-tana nu magau, nisani nu magaumo nelabipa petumbuna mpengaya-ngaya anu nisani i Daniel ante roana tatalu haitu pade kabilasa-kabilasa ntanina. Jadipa nompamulamo ira nokarajaa ka magau. 20 Nggani-nggani magau nerapi panggava dako nte ira, nikita potimbara ampa haitu sapulu nggani nelabipa kabelona pade pepangajari bo panggava ntopangisani bo topeanto ri umba-umba ngata ri poparentana.
21 I Daniel batena nokarajaa ri banua kamagaua sampe Magau Kores dako ri tana Persia nombadagi Babeli.