Posambaya nggabuku rara nanggita kagero Banua Alatala.
74
Dade pepatuduki nipovia i Asaf.O Alatala, domo rapeiliMiu kami?
Nakuya narau njuu raraMiu nte kami todeaMiu?
2 Toramo todeaMiu anu nipelisiMiu dako ri nggauluname,
todea ngata nikabasakaMiu ala majadi todeaMiu.
Toramo Bulu Sion,
anu nipajadiMiu ponturoMiu.
3 PesayokiMiu ponturo anu nageromo.
Nuapa-napa ri BanuaMiu, nigerosi nu bali.
4 BaliMiu novoo-voo ri BanuaMiu,
bo nompatinda bandera tanda padagi.
5 Ira eva tona nombaviataka baliu,
nombatovo kayu ra kayu.
6 Pura-pura kayu nirandu ri banuaMiu nirupusira
ante tandu-tandu bo palu-palu.
7 Ira nompalabu BanuaMiu sampe naopo;
bo nompakaruto ponturoMiu.
8 Ira notesa riara ntaira, nanguli, “Anumo rapandasata pura ira.”
Nipalabusira puramo banua-banua petupu ri ngata haitu.
9 Nabi-nabi bo tanda nabaraka domo ria,
bo ledoria saitoa nangisani sakuyapa kasaena kajadia ivehitu.
10 O Alatala, nemo rapalamba bali njuu-njuu domo mombabila Komiu.
Nemo radekei rasayura njuu sangaMiu.
11 Nakuya domo nitulungiMiu kami?
Anggatakamo paleMiu ropusimo tona nompakaeya Komiu.
12 O Alatala, Komiumo Magauku dako ri nggauluname,
Komiumo topompakasalama kami ri dunia.
13 Komiu nompopogaa uve ntasi ante karoso nipokumaaka,
bo nombarupusi balengga naga-naga ntasi.
14 NirupusiMiu pura balengga binata Lewiatana
bo ia nipajadiMiu kandea binata ri karava bai.
15 NipopemataMiu uve bo nipopoiliMiu uve binangga;
bo Komiu muni nompakabai binangga anu ledo naoti-oti uvena.
16 Komiumo topompajadi eona bo bongina,
bo Komiu nakuasa nombadika nu eo bo bula ri langi.
17 Komiu nombadika pantaa-pantaa nu dunia,
bo nompakatantu tempo pane bo tempo uda.
18 O PUE, Toramo berimbana bali nompakadaa Komiu,
todea ngata ledo nomparasaya Komiu nombasalai sangaMiu.
19 Nemo radekei todea nipotoveMiu rampale nu bali anu nasese.
Nemo rakalingasiMiu njuu todeaMiu nipandasa.
20 Toramo pojanji nipoviaMiu nte kami,
sabana riumba-riumba naria kavunina ri dunia hitu, naria tona naseseraka novia anu nadaa.
21 Nee rapalamba tona ntanina mompakaeya tona nipandasa,
Kambou tona anu ledo nompakule bo tona napakasi mantoiya Komiu.
22 O Alatala, popakitamo ka todea Komiu novia anu nakana,
sabana Komiu njumaeo nisalai ntona anu ledo nomparasaya Komiu.
23 Nee rakalingasi suara nu baliMiu,
oni suarara nantambai kamanggana.