BUKU KATATALUNA
MAZMUR 73-89
Kanoa nTUPU
73
Dade i Asaf.Nabelo mpuu Alatala nte todeaNa,
bo nte tona nagasa rarana.
2 Tapi pomparasayaku nolengga,
bo sakidepa noura raraku,
3 sabana nasiriati nanggita tona nalanga rarana,
tempo nangganoto asele nadea nikava ntona nadaa.
4 Karora batena naroso,
bo ira ledo nasaro nadua.
5 Ira ledo nombarasai kasusa,
ledo nandasa mpo tona ntanina.
6 Haitu sabana ira njuu-njuu nokainggu nasombo,
bo ledo ria kaupu-upuna nompandasa tona ante kaseserakara.
7 Ira aga nompekirika anu nadaa;
bo nabago ante nia-niara nadaa
8 Ira nesalai nte tesa-tesa nadaa,
bo ante langa rara ira nonia mompandasa tona ntanina.
9 Ira nombasalai Alatala ri Suruga,
bo nanguli tesa sombo bo tesa dava ri dunia,
10 sampe todea nu Alatala nompasiala pokainggura,
bo momparasaya tesa-tesara.
11 Tona nadaa gahaitu nanguli, “Ledo nisani nu Alatala Tonelabi Kakuasana,
bo ledo nipahaNa.”
12 Ivehaitumo mai potesa ntona nadaa;
ira aga nantambai kakalumanara bo batena natuvu nasana.
13 Nompekirika haitu nirasaiku ledo ria gunana yaku mojagai raraku magasa;
ledo ria gunana yaku manggavaosi dosa.
14 Sabana njumaeo yaku nikava nu susa;
eo-eo nandasa katuvuku.
15 Yaku ledo notesa eva tona nasombo gahaitu, ira nanguli
“Alatala ledo nanggisani nuapa najadi”,
Ane rapana yaku motesa ivehaitu batuana yaku nodavai todeaMiu.
16 Tapi tempo yaku madota mombapaha katuvu ntona nadaa,
nakaja mpuu nirasaiku batuana.
17 Nesuapa yaku ra Banua nTUPU,
pade nisanikumo berimbana kaupu nggatuvu ntona nadaa.
18 Komiu mompakakaja dala nggatuvura,
bo Komiu mompalamba ira manavu bo mamate.
19 Riara sampida mata ira maropu,
kaupu nggatuvura mpuu-mpuu nepakaeka.
20 Eva pangipi nalipo tempo topangipi nembangu, vesia muni ira malipo,
Tempo Komiu nasadiamo mombaropusi ira.
21 Tempo nadua raraku
ledo nasana pekiriku,
22 yaku nambongo bo ledo nisaniku nuapa-nuapa,
yaku mpo binata ri ngayoMiu
23 Tapi yaku batena mosinggani nte Komiu.
Komiu nombajagai bo nompakaroso yaku.
24 PepatudukiMiu nanggeniaka yaku,
bo ante pebila Komiu mantarima yaku ri eo nggapurina.
25 Aga Komiu nisarumakaku ri suruga, ledo ria ntanina
Aga komiu nipokonoku ri dunia, ledo ria ntanina.
26 O Alatala, nau malente raraku bo karoku,
Komiumo nompakaroso yaku,
Komiumo nisombaku bo aga Komiu niparaluuku
sampe kasae-saena.
27 Sabana isema-sema nombakavaosi Komiu mamate,
Komiu mombaropusi tona ledo natutu nombaoseaka Komiu.
28 Tapi yaku, nipokonokupa mosinggani nte Alatala.
TUPU Alatala majadi petalenduku,
ala yaku mamala mompatolele pura-pura poviaNa.