Alatala topotangara nanoa
75
Dade i Asaf nipovia ka pakeni ntopodade. Nangoseaka enggo dade nosanga: “Nemo rapakaropu”.2 O Alatala, kami nombasomba Komiu,
bo nosukuru nte Komiu
bo nompatolele poviaMiu anu nabaraka.
3 Komiu nanguli, “Yaku motangara manusia ante kanoa,
ane makavamo tempo nitantuiKu.
4 Naupa dunia bo pura-pura isina mogoya
Yakumo mompakaroso tinja polande nu dunia”. Jedaa.
5 Yaku manguli ka tona nangoe notesa, “Tumo mangoe”
bo mangulika tona nadaa, “Tumo mompakalanga rara.
6 Tumo mupopakita karosomiu,
bo tumo motesa malanga.”
7 Apa topotangara manusia ledo makava dako ri mpandakena bara lako ri mpanauna,
bo ledo muni makava dako ri tasina bara dako ri puluna.
8 Tapi Alatala mboto mombatangara manusia,
sabagia manusia rahukuNa bo sabagia vai ledo rapakaogeNa.
9 Karau rara nTUPU nirapaka uve anggur anu mpuu-mpuu melimpunosi
niisi ri boda mbaso bo napai mpuu.
Uve anggur haitu niduaNa,
ala pura-pura tona nadaa ri dunia manginuna sampe maupu.
10 Tapi yaku batena mompatolele povia Alatala nisomba i Yakub,
bo modadeka dade petoiya ka Ia.
11 Ia mompakalipo karoso ntona nadaa,
tapi tona nabelo ratambaiNa karosona.