Posambaya mekitulungi
12
Dade i Daud nipovia ka pakeni ntopodade,
nangoseaka dade ka-uvaluna.
2 O PUE,
tulungimo kami,
domo naria tona nanoa ri sii,
domo muni naria tona natutu nangoseaka Komiu.
3 Ira nosidavai
bo nosibagiu nte tesa namomi.
4 PUE,
popetaamo tesa-tesa mpepadidisi haitu.
Tumo mombadekei tona motesa mangoe,
5 anu nanguli ivei,
“Kami padagi apa natau kami notesa.
Nuapapa bo ledo mamala rauli kami!
Isema mamala mombatagi kami?”
6 TUPU nanguli,
“Tona napakasi nipandasa
bo tona nandasa nongau nekitulungi.
Jadi,
hitupa Yaku nakavamo
mombadekei katinonto anu nipolentorara.”
7 Pojanji nTUPU batena nakana bo namala rasarumaka,
evamo salaka mpuu
anu mpendua ngganimo nipalabu ri apu
mombalalisi galona.
8-9 Tona nadaa naria ri umba-umba,
pokainggura nadaa nipodamba ntona.
PUE Komiu batena nombalenduti kami,
bo batena nombajagai kami dako nte tona nadaa.