TUPU Petalenduku
11
Dade i Daud nipovia ka pakeni ntopodade.
TUPU nipetalenduku.
Jadi ledoria gunana manguli ka yaku ivei,
“Palaimo masalisa metalendu mpo tonji mevoro hau ri bulu.
2 Apa tona nadaa nompasadia panana
bo nompataka mata panana mombapana tona nanoa dako ri kalandana.
3 Tona nanoa ledo rapakulena movia nuapa-nuapa,
ane todea domo mangoseaka atura.”
4 TUPU naria ri BanuaNa,
Ia nomparenta dako ri suruga.
NipetiroNa manusia ri dunia
bo niparesaNa pura pokainggura.
5 Ia nomparesa tona nabelo bo tona nadaa,
Navuu mataNa nompeinta tona nompokono pepandasa.
6 Tona nadaa nihukuNa ante silaka bo apu,
ante belerang bo poiri mepapusi.
7 Apa TUPU nabelo bo nanoa,
nipotoveNa tona nokainggu nabelo;
Tona nanoa manggita bo nosisani nte TUPU.