Posambaya mekitulungi nte TUPU
10
O PUE,
nikavaosiMiumo kami.
Domo nipeiliMiu kami riara nggasusa
2 Ante langa rara tona nadaa nompandasa tona napakasi;
aginamo ira matetoliani ante nia daara mboto.
3 Tona nadaa nadamba ante dota rarana nadaa,
tona nadoko nepindasi bo nompoara TUPU.
4 Tona nadaa nalanga rara.
Nipekirira Alatala ledo mombahuku ira,
bo ledoria Alatala.a
5 Pura-pura anu nadaa nipoviana kana noasele.
Ledo nisanina bo ledo niporarantaikana huku nTUPU.
Bo niparitambena pura-pura balina.
6 Riara ntaina nanguli:
“Nuapa kupovia kana majadi,
bo sampe ri muli-muliku ledo manggava silaka.”
7 Tona nadaa batena nepindasi,
neompanaka bo nebagiu,
tesana aga nompakadaa bo nompakadua rara ntona.
8-9 Ia netabuni nggalino riara ngata-ngata,
mompatesi tona ledo nasala.
Tona nadaa nepopea mpo singa ra gumbu
nompomata-mata bo mombasaka tona ledo nompakule.
Nisakana bo nikenina mpalai.
10 Ia netinanaki masadiamo mesaka;
nisakana tona nalente bo nipandasana sampe domo nipakulera.
11 Apa nipekirina ivei,
“Nalingamo rara nu Alatala bo ledo rapariaraNa.
Sampe kasaena ledo rakitaNa pokaingguku!”
12 O PUE,
anumo!
Hukumo tona nadaa!
Toramo tona nipandasa!
13 Tona nadaa batena nombasalai Alatala,
nipekirina ia ledo rahuku nu Alatala.
14 Tapi Komiu,
Pue,
nompeintana.
Komiu nomparataika kasusa bo kandasa nirasai ntona.
Komiu kana nombatulungi tona nasusa anu nombadekei katuvuna ka Komiu.
Komiu nasaro nombatulungi tona ledo nompakule.b
15 Popetaamo kakuasa ntona nadaa bo nasilaka;
hukumo ia ala domo rapoviana vai anu nadaa.
16 TUPU nomparenta sampe kasae-saena;
tona-tona ledo nomparasaya Ia,
maropu dako ri tana nTUPU.
17 O PUE,
Komiu nangepe pekakai ntona nipandasa,
bo nipakarosoMiu rarara.
18 Ngana napailu bo tona nipandasa nisalikuMiu,
ala ledo maria tona mompakaeka ira.