Alatala nombajagai topomparasaya
9
Dade i Daud nipovia ka pakeni ntopodade nangoseaka dade “Mut-Laben”.
2 O PUE,
ante raraku mpuu-mpuu yaku madota mosukuru nte Komiu,
bo mompatolele kareba mpoviaMiu nabaraka.
3 O Alatala,
ToNeliu Kakuasana!
Yaku madota masana bo madamba-damba sabana poviaMiu.
Yaku modade mantoiya sangaMiu,
4 sabana baliku nangova nalai.
Ira nadungga natepasunu bo namate ri ngayoMiu.
5 Apa Komiu nomparenta mpo Topotangara nanoa.
Komiu nanjaliku parakaraku.
6 Komiu nombahuku todea nu ngata-ngata
bo nompakaropu tona nadaa.
Komiu nompakalinga rara ntona mantora ira sampe ri kasae-saena.
7 Bali kami nipakatunasimo,
domo ria ira sampe kasae-saena.
Ngatara nigerosiMiumo damo rupuna naboli;
domo naria nantora ngata haitu.
8 Tapi TUPU nomparenta sampe kasae-saena;
Ia nompopeangga kamagauaNa rapotangara manusia.
9 Ia nomparenta manusia ri dunia ante kanoa,
bo ledo nompelenje notangara.
10 TUPU nombasaliku tona nipandasa
bo nombajagai tona dako ri pura-pura kasusa.
11 O PUE,
tona nosisani nte Komiu mpuu-mpuu nanjarumaka Komiu,
sabana Komiu ledo nompalaisi tona nombasomba Komiu.
12 Toiyamo TUPU anu nomparenta ri Bulu Siona!
Tesakimo poviaNa ka todea nu ngata-ngata,
13 sabana nitoraNa tona nipandasa
bo ledo nikalingasiNa pekakaira.
Ia nombahuku tona nompandasa ira.
14 O PUE,
poasimo yaku!
Peintamo yaku nipandasa nu baliku.
Pakasalamamo yaku dako ri kamatea,
15 ala kutoiya poviaMiu ri ngayo ntodea ri Yerusalem,
bo yaku modade madamba
sabana Komiu nompakasalama yaku.
16 Todea nu ngata-ngata nanavu riara lovu nikaera ka tona;
kadara nambela tolia nitaara ka tona.
17 TUPU nompopaisani karoNa
ante pobotusiNa nanoa.
Tona nadaa nasilaka sabana pokainggura mboto.
Jedaa
18 Kamatea haitu mai asele kaupu nggatuvu ntona nadaa,
bo vesia muni todea nu ngata-ngata anu ledo nangoseaka dota nu Alatala.
19 Tapi tona napakasi ledo rakalingasi nTupu sampe kasae-saena
bo tona nandasa ledo rapalambaNa malipo panjarumakara.
20 O PUE,
tangaramo todea nu ngata-ngata,
nee rapalamba manusia mompakalanga rarara.
21 Aginamo ira maeka nte Komiu,
ala rasanira,
ira aga manusia kana mamate.
Jedaa