Alatala nompakalanga nturo nu manusia.
8
Dade i Daud nipovia ka pakeni ntopodade.
Nangoseaka dade “Gitit”.
2 O PUE,
Tupu nisomba kami,
KuasaMiu nisani ntona ri njumangu dunia!
KaogeMiu nalangapa pade langi.
3 Ngana-ngana bo ngana kodi da netomi nompodadeka kaogeMiu.
PoparentaMiu naroso ledo nolese
sampe pura-pura baliMiu domo mompakule meeva.
4 Ane kukita langi nipajadiMiu,
bula bo betue nipatakaMiu ri sia:
5 Yaku mboto nompekiri,
isema ntoto manusia sampe nitoraMiu?
Isema manusia sampe nipeiliMiu?
6 Naupa ivesia,
nianggatakaMiu manusia sakidepa nasimbayu nte Komiu,
NipajadiMiu manusia mpo magau nibila bo nipakaoge.
7 Komiu nompakakuasa ka manusia pura-pura asele mpoviaMiu;
pura-pura anu nipajadiMiu nipopekouMiu nte manusia,
evamo
8 tovau,
bimba,
japi
bo muni binata-binata nggakayu,
9 tonji-tonji nevoro ri laerava,
bau bo pura-pura anu natuvu rantasi.
10 O PUE,
Tupu nisomba kami,
KuasaMiu nisani ri njumangu dunia!