Posambaya merapi kanoa dako nte TUPU
7
Dade kasusa rara i Daud,
nipodadeka ka TUPU sabana i Kus,
toBenyamina haitu.
2 “O PUE,
Alatala nisombaku,
yaku netalendu nte Komiu.
Pakasalama yaku bo kabasaka yaku
dako ri pura-pura tona nombaraga yaku bo nompakadaa yaku.
3 Nee rapalamba ira mpo singa
mesaka bo mombapamasi yaku
bo ledo maria tona mombatulungi yaku.
4-5 O PUE,
Alatala nisombaku,
ane rapana pokaingguku ledo nanoa,
bara nokainggu nadaa nte roa,
bara yaku nompakarugi tona nompobali yaku nau ledo ria salana,
6 dekeikamo yaku raraga bo rasaka nu baliku,
rapatesira bo ledo ratanara.
Jedaa
7 O PUE,
anumo!
Padupamo rau raraMiu,
mangeva ponasu nu baliku.
Tulungimo yaku,
sabana Komiu nanguli,
manusia kana matuvu manoa.
8 Pasiromumo todea nu ngata-ngata ri sinjoriMiu.
Bo damo Komiu momparenta ira dako ri suruga.
9 O PUE,
Komiu nombatangara manusia ri dunia.
Kuperapi Komiu mombabotusi yaku nanoa,
apa pokaingguku nakana bo ledo nasala.
10 Popetaamo pokainggu ntona nadaa,
jagaimo bo pakaroso rara ntona nanoa.
Sabana Komiu Alatala nanoa,
Komiu nanggita bo nangisani rara bo pekiri nu manusia.”
11 Petalenduku iamo Alatala
anu nompakasalama tona nanoa rarana.
12 Alatala Topotangara nanoa
anu batena nombahuku tona nadaa.
13-14 Ane ledo mabali pokainggura nadaa,
Alatala nasadia mompatesi ira ante pareva mepakamate.
Bo rasampuNa gumaNa bo mompatoto mata pana apuNa.
15 Tona nadaa namala nirapaka mombine natiana.
Anu nikatianakana aga jeko bo kadaa,
bo ia aga mompoanaka dava.
16 Tona nadaa nokae lovu ka tona ntanina,
tapi ia mboto nanavu riarana.
17 Jadi ia nihuku sabana kadaana mboto.
Bo nipandasa sabana kaseserakana mboto.
18 Yaku mosukuru nte TUPU,
sabana kanoaNa.
Yaku modade mombatoiya TUPU,
Alatala Toneliu kakuasaNa.