Posambaya riara nggasusa
6
Dade i Daud nipovia ka pakeni ntopodade,
rapodadeka nangoseaka oni nu kacapi.
Dade hitu nangoseaka dade kauvaluna.
2 O PUE,
nau marau raraMiu,
nee rahukuMiu yaku.
Nau nagigi raraMiu,
nee rapandasaMiu yaku.
3 O PUE,
poasimo yaku,
sabana yaku nalente,
pakaroso mpanjili yaku,
sabana domo naria roso nggaroku,
4 bo naipu mpuumo raraku.
O,
PUE,
sakuyapa kasaena pade rapakabeloMiu yaku?
5 O PUE,
uramo niaMiu mombahuku yaku.
Pakasalama yaku sabana nipotoveMiu yaku.
Nee rapalamba yaku mamate,
6 sabana tomate domo nantora Komiu;
bo ledo ria tona ri ponturo malaeka ntomate mantoiya Komiu.
7 Nalente raraku sabana yaku nongauka kasusaku.
Bongi-bongi uve mataku noili
nobanggasi paturuku.
8 Mataku nebangga notumangi sabana buku rara,
navuraumo mataku notumangi sabana pesalai nu baliku.
9 Hee komiu tona nadaa,
palaimo!
Apa niepe nTUPUmo tangiku nekitulungi.
10 Niepe nTUPUmo perapiku
bo nipoiyoNamo posambayaku.
11 Pura-pura baliku maeka bo maeya matara.
Sampesanika malai puramo ira ante ea matara.