Posambaya mekitulungi nte Alatala
5
Dade i Daud nipovia ka pakeni ntopodade rapodadeka nangoseaka oni nu suli.
2 O PUE,
epemo tesaku,
parantaikamo pongauku.
3 O Alatala nisombaku!
Komiumo Magauku!
Epemo yaku nekakai nte Komiu,
bo tulungimo yaku.
Apa yaku nosambaya nerapi nte Komiu.
4 O PUE,
niepeMiu pekakaiku bobayana,
Sanggaeo mpisina niuliku isi mpekiriku ri ngayoMiu,
bo yaku nompopea pesanaMiu.
5 Komiu Alatala,
ledo nompokono anu nadaa,
Tona nadaa ledo namala monturo singgani nte Komiu.
6 Ledo nipalogaMiu tolanga rara makava ri ngayoMiu,
Navuu mataMiu nanggita tona nokainggu nadaa.
7 Komiu noropusi tona nodava,
navuu mataMiu nanggita topebagiu bo topepatesi.
8 Tapi yaku namala mesua riara BanuaMiu,
sabana kambaso nu toveMiu nte yaku.
Yaku mantaputu motingayo hau ri BanuaMiu,
bo kusomba Komiu ante mpuu-mpuu raraku.
9 O PUE,
keniakamo yaku movia dotaMiu,
bo tuduakamo dala masipato kuose,
sabana nadea mpuu baliku!
10 Apa tesa-tesa nu baliku nadaa mpuu.
Nasimbayu mpo soa dayo ntomate nateungga.
Tesa pebagiu nesuvu dako ri sumbara.
Ante tesa-tesara namomi ira nompakadaa tona ntanina.
11 O Alatala,
hukumo ira!
Palambakamo ira manggava silaka sabana nia daara mboto.
Popalaimo ira sabana dosara nadea
bo nievara Komiu.
12 Tapi kambou pura-pura tona netalendu nte Komiu masana
bo modade madamba sampe kasae-saena.
Jagaimo tona nompotove Komiu,
ala ira madamba-damba sabana anu nipoviaMiu.
13 Apa Komiu nombadekei rasi ka tona natutu nangoseaka Komiu.
ToveMiu nombalenduti ira nasimbayu mpo kaliavo.