Posambaya bongina
4
Dade i Daud nipovia ka pakeni ntopodade rapodadeka nangoseaka oni nu kacapi.
2 O Alatala,
Komiumo topanjaliku yaku;
Pesanakamo yaku,
ane yaku mekakai nte Komiu.
Tempo yaku nasusa,
Komiu nombatulungi yaku.
Poasimo yaku bo epemo posambayaku.
3 Hee komiu topangeva yaku,
sakuyapa kasaena komiu mombasalai Alatala nisombakua?
Sampe maipia komiu mompotove anu ledo noguna
bo mombaraga anu ledo nakana?
Jedaa
4 Toramo,
TUPU nompelisi ka Ia mboto
saito tona anu nipotoveNab.
RaepeNa ane yaku mekakai nte Ia.
5 Nau marau raramu,
nemo mupovia dosa!
Tanondoakamo tesaku hitu
bo pakatinontomo raramu,
tempo maturu.
Jedaa
6 Dekeimo pesomba nipakatantu nTUPU
bo sarumakamo Ia.
7 Nadea tona nompekutana ivei,
“Isema mombadekei rasi ka kami?”
O PUE,
kami merapi Komiu mombadekei belo ka kami.
8 Komiu nompakadamba raraku nelabipa
pade tona nantarima asele mpoviana nadea.
9 PUE,
yaku naturu nasana,
sabana aga Komiu nompakatinonto katuvuku!