Nadea Tona Nomporoa i Daud
22
Naupu haitu nipalaisi i Daudmo ngata Gat bo netabuni riara bolo nu vatu napara ngata Adulam.
Niepepa nu tuaka-tuakana bo pura-pura sampesuvuna ia naria ri sia,
nitotoakaramo ia.
2 Tona nipandasa,
topoinda bo tona nadua rarana,
pura-pura nosabinggaka i Daud,
bo i Daud najadi pakenira.
Topantuntuni i Daud nitasere maria pataatu.
3 Dako ri bolo haitu i Daud hau ri Mizpa ri ngata Moab.
Ia nanguli ka magau ngata Moab,
“Dekeimo tina tuamaku monturo ri sii nte i Pua,
sampe kusani nuapa rapodota nu Alatala ka yaku.”
4 Jadi nikeninamo totuana ka magau ngata Moab,
bo ira naroo hamai tempo i Daud netabuni ra bolo.
5 Naria santempo saito nabi nosanga i Gad nakava nte i Daud bo nanguli,
“Nemo monturo ra bolo hitu,
koimo masalisa hau ri ngata Yehuda.”
Haumo i Daud nesua rakayu Keret.
Pura-pura topanggeni pesomba ri ngata Nob nipatesi
6 Naria saeo,
i Saul nonturo ri puna kayu tamariska,
ri bavo bulu ri Gibea.
Ia nanggangisi tavala bo pakeni ntantarana neangga ri sinjorina.
Tempo ia nangepe ponturo i Daud bo todeana nisanimo,
7 i Saul nanguli ka pakeni ntantarana anu neangga ri sinjorina,
“Epemo,
he toBenyamin!
Nipekirimiu i Daud mombadekei ka komiu talua anggur bo talua-talua ntanina?
Ia mangaggataka komiu majadi pakeni ntantara?
8 Haitu nomposaba komiu nasintuvu mangeva yaku?
Nakuya ledoria saitoa komiu nanguli ka yaku ane anaku nosabingga ka i Daud?
Ledoria saitoa komiu nompekirika yaku,
bara nanguli ka yaku,
ane anaku nompasusu batuaku i Daud mangeva yaku,
bo nompopea tempo mompatesi yaku.”
9 I Doeg toEdom pakeni ntopoevu binata i Saul,
naria muni ri sia ante tantara i Saul.
I Doeg nanguli,
“Nipeintaku i Daud nakava nte i Ahimelekh ana i Ahitub ri ngata Nob.
10 I Ahimelekh nerapi ala TUPU mompatotosi anu rapovia i Daud.
Pade i Daud nipopobakuna pangande bo nidekeina guma i Goliat toFilistin ka i Daud.”
11 Pade Magau Saul nantudu tona nombaronde i Ahimelekh topanggeni pesomba nte pura-pura sampesuvuna anu najadi topanggeni pesomba ri ngata Nob.
Bo nakavamo ira nte i Saul.
12 Nangulimo i Saul ka i Ahimelekh,
“Epemo,
he ana i Ahitub!”
Nesana ia,
“Iyo,
pua.”
13 Nekutana vai i Saul,
“Nakuya komiu nte i Daud nasintuvu nangeva yaku?
Nakuya nipopobakumu ia nte roti bo nidekeimuka guma,
pade niperapimu Alatala mompatotosi ka ia anu rapoviana?
Hitupa ia nangeva yaku bo nompopea tempo mompatesi yaku.
14 I Ahimelekh nesana,
“Apa ledo i Daud tantara i pua natutu?
Ia mania i pua mboto,
pakeni ntopojaga i pua,
bo nibila ntona pura ri banua kamagaua.
15 Nakana yaku nerapi pepatotosi dako nte Alatala ka ia,
tapi ledo aga sanggani haitu yaku novia vehaitu.
Ane mombasintuvui mangeva i pua,
neemo i pua mombarai yaku nte sampesuvuku.
Ledo nisaniku nuapa-nuapa eva anu niuli pua tutu.”
16 Magau nanguli,
“Ahimelekh!
Iko bo pura-pura sampesuvumu kana mamate.”
17 I Saul nomparenta topojaga ri sinjorina,
“Anumo,
patesimo topanggeni-topanggeni pesomba nTUPU tutu!
Ira nosangu patuju nte i Daud.
Nisanira i Daud nalai tapi ledo nadota ira nanguli ka yaku.”
Tapi ledo nadota topojaga i Saul mompatesi topanggeni-topanggeni pesomba haitu.
18 Sabana haitu,
nangulimo i Saul ka i Doeg,
“Anumo masalisa!
Ikomo mompatesi ira!”
Jadi haumo i Doeg nompatesi topanggeni-topanggeni pesomba haitu.
Ri eo haitu nipatesina valupulu bo alima topanggeni pesomba anu nompake baju efod.
19 I Saul muni nomparenta mompatesi pura toponturo ri Nob,
ngata topanggeni pesomba haitu,
langgai,
mombine,
ngana-ngana bo ngana kodi,
japi,
keledai bo bimba,
pura-pura nipatesi.
20 Aga i Abyatar ana i Ahimelekh saitona namala nalai.
Ia nalai hau nte i Daud.
21 Pade nitesana ka i Daud nipatesi Saul puramo topanggeni pesomba ka TUPU.
22 Nanguli i Daud ka ia,
“Tempo nipeintaku i Doeg toEdom hamai ri eo haitu,
nisanikumo ia kana mangadu ka i Saul.
Jadi yakumo niposaba kamate pura-pura sampesuvumu.
23 Ponturomo sii nte yaku bo neemo maeka.
I Saul madota mompatesi iko,
tapi ia muni madota mompatesi yaku.
Jadi iko ledo makuya nte yaku.”