I Daud nalai dako nte i Saul
21
Jadi haumo i Daud nte i Ahimelekh topanggeni pesomba ri ngata Nob.
Natekaja Ahimelekh nesuvu nosinggavaka i Daud bo nekutana,
“Nakuya iko tumai aga saitomu?”
2 Nesana i Daud,
“Yaku nitudu magau mompajala parenta bo parenta hitu ledo mamala rasani ntona ntanina.
Haitu sabana batua-batuaku nituduku mokolu hau ri umba raposinggava kami.
3 Merapi ampu,
yaku hii madota mekutana,
naria anu rakande nte komiu?
Dekeimo ka yaku lima mpeka roti nitunu,
bara nuapa maria anu mamala rakande.”
4 Pade nanguli topanggeni pesomba haitu,
“Ledoria roti biasa nte yaku,
aga roti nipesomba ka Alatala naria.
Namala nuala,
asala batuamu ledo nosampaturu ante mombine dako naliu-liu hitu.”
5 Nesana i Daud,
“Natantumo,
kami ledo nidekei nosampaturu nte mombine,
ane kami nompajala parenta.
Batuaku kana nombajaga karora ala magasa mantuntuni atura agama,
nau aga nompajala parenta biasa bo nemopa ane mompajala parenta anu nopoko eva hitu!”
6 Pade topanggeni pesomba nombadekei roti pesomba haitu ka i Daud,
sabana anu naria nte ia aga roti nipesomba ka Alatala,
anu nianggatakamo dako ri lanta pesomba bo nisambei ante roti baru.
7 Ri eo haitu muni i Doeg toEdom ri sia,
anu nipatani nokarajaa ka TUPU.
Ia pakeni ntopoevu binata i Saul.
8 Pade nekutanamo i Daud nte i Ahimelekh,
“Naria tavala bo guma nibolimiu anu mamala kupake?
Apa sampesanika magau nomparenta yaku kana manggalivomo,
jadi domo nakapo nialaku gumaku bo pareva ntanina.”
9 I Ahimelekh nesana,
“Yaku nomboli guma i Goliat,
toFilistin anu nipatesimu ri Lemba Ela baipia.
Guma haitu naria ri bengo baju efod nibungusi kae.
Ane madota iko,
alamo,
sabana aga haitu pareva naria ri sii.”
Nanguli i Daud,
“Guma tutu,
guma tobelona ri njumangu ngata,
dekeimo ka yaku!”
10 Eo haitu muni i Daud nalai dako nte i Saul,
bo nakava nte i Akhis magau ngata Gat.
11 Topokarajaa-topokarajaa ri kamagaua i Akhis nanguli ka ia ivei:
“Apa ledo ia hitu i Daud?
Ledo ia tomaoge nipolodi-lodika mombine-mombine anu nodade ivei?
‘I Saul nompatesi balina nonjobu-njobu,
tapi i Daud nopulu-pulu njobu.’ ”
12 Tesa-tesa haitu nompakakini rara i Daud.
Ia najadi naeka mpuu nte Magau Akhis.
13 Sabana haitu i Daud netibaya ri ngayo ntodea.
Tempo nipesobara mombasaka ia,
ia nokainggu eva tona ledo nanoto.
Ia nombasai-sai vamba pesua ri ngata bo nipalambana veuluna noili ri janggona.
14 Pade i Akhis notesa ka topokaraja-topokarajaa ka ia,
“Apa ledo nisanimiu tona haitu nabaya?
Nakuya nikeni tumai?
15 Apa da nakura tona ledo nanoto napara nte yaku,
bo nikenimiu vai tobaya tumai ri banuaku?”