I Daud nitulingi i Yonatan
20
Nalaimo i Daud dako ri Nayot napara Rama bo hau nosinggavaka i Yonatan,
bo nanguli,
“Nuapa salaku bo nuapa dosaku?
Pokainggu nadaa berimba ntoto nipoviaku,
sampe tuamamu madota mompatesi yaku?”
2 Nesana i Yonatan,
“Nemo motesa vetutu!
Nisani nTUPU,
iko ledo rapatesi.
Nuapa-nuapa nia ntuamaku kana niulina ka yaku pura,
anu nopoko,
bo anu ledo nopoko.
Jadi ledo ntoto ratabuniakana niana ka yaku.
Sabana haitu nuapa niulimu tutu ledo nakana.”
3 Nesana i Daud,
“Nisani ntuamamu iko nompotove yaku.
Jadi natantumo ia ledo madota manguli ka iko niana haitu ala nemo masusa raramu.
Yaku mosumpa ante sanga nTUPU anu Natuvu sampe ri kasae-saena bo ante katuvumu,
mpuu-mpuu yaku rapatesi.
Katuvuku eva tona radayomo sabingga kadana.”
4 Nanguli i Yonatan,
“Nau nuapa nuperapi kana kuoseaka.”
5 Nesana i Daud,
“Vehitu,
maile posusa Bula Baru.
Kakanana yaku mosanggani-nggani mangande ante magau.
Ane mudekei yaku hau metabuni sampe maipua bongi,
hau metabuni yaku.
6 Ane rapekutana ntuamamu ngena,
nakuya yaku ledo nakava,
ulimo ka ia,
yaku nerapimo nte iko,
apa yaku hau mavoli masalisa ri Betlehem,
hau ri posusa pesomba anu nipovia sampae sanggani ka pura-pura sampesuvuku.
7 Ane tuamamu manguli,
ledo makuya yaku hau,
batuana yaku ledo rakuyana.
Tapi ane ia marau,
rasanimo mpuu-mpuu nibotusinamo ia madota monia madaa nte yaku.
8 Yaku merapi tulungi nte iko,
sabana kita nompakaroso pojanjita ri ngayo nTUPU.
Tapi ane yaku masala,
patesimo yaku,
tapi aga nemo yaku mudekei ka tuamamu.”
9 Nesana i Yonatan,
“Nemo maeka!
Ane kusani tuamaku momponia mompatesi iko,
natantu kuuli ka iko.”
10 Pade i Daud nekutana,
“Isemamo tano manguli ka yaku ane tuamamu mesana nggarau nte iko?”
11 Nanguli i Yonatan,
“Kamaimo kita hau ri karava.”
Jadi haumo ira nosanggani-nggani ri karava.
12 Nanguli vai i Yonatan ka i Daud,
“TUPU,
Alatala nisomba ntoIsrael majadi sabita.
Maile mpadondo bara maipua ratasere tempona masimbayu eva hitu muni,
kana kupasimbuku mangisani nuapa-nuapa patuju ntuamaku.
Ane ia mopatuju mabelo ante iko,
kupakatu ka iko kareba.
13 Ane ia monia madaa nte iko,
natantumo kuuli ka iko muni ala iko masalama.
Ane ledo kuuli nia daa ntuamaku ka iko,
TUPU mompatesi yaku.
Perapi doa TUPU mantulungi iko eva Ia nantulungi tuamaku nggaulu.
14 Ane yaku da matuvu,
toramo bo kangisi pakaroso pojanjita ri ngayo nTUPU.
Tapi ane yaku domo ria,
15 popakita kabelomu ka muliku sampe ri kasae-saena.
Ane TUPU mombaropusi pura balimu,
16 nemo iko bo mulimu mombakalingasi sangaku.
Tapi palambakamo TUPU mombahuku bali-balimu.”
17 Jadi karongganina i Yonatan nantudu i Daud nojanji sabana ia mpuu-mpuu nompotove i Daud,
eva ia nompotove karona mboto.
18 Pade nangulimo i Yonatan ka ia,
“Maile posusa Bula Baru.
Natantumo kana rasani iko ledo makava,
sabana ponturomu ledoria tona monturoka ri meja pangande.
19 Tapi maipua iko kana raelo!
Sabana haitu,
koimo hau ri petabunimu ruru,
bo popeamo ri sabingga bulu vatu.
20 Maipua kupana tatalu mata pana ri sabingga bulu vatu nipetabunimu,
eva maria anu kupana ri sinjori petabunimu.
21 Kutudu batuaku mombaduru mata pana gahaitu,
bo ane kuuli ka ia,
‘Hee!
Mata pana hitu naparapa tumai.
Alamo!’
tutu tandana iko ledo makuya bo mamala mesuvu tumai.
Yaku nojanji ante sanga nTUPU anu Natuvu sampe ri kasae-saena,
ledo makuya-kuya iko.
22 Tapi ane yaku manguli ka batuaku,
‘Hee!
Mata pana gahaitu makavaopa hau!’
haitu tandana TUPU nombatudu iko hau malai.
Jadi koimo palai.
23 Damo TUPU mombajaga ala kita randua mantipale pakaroso ponjanjita sampe ri kasaena-saena.”
24 Pade netabunimo i Daud ri karava.
Ri posusa Bula Baru,
Magau Saul nakava ri posusa.
25 Eva biasana i Saul nonturo napara rindi.
I Yonatan nonturo nosintingayosi nte i Saul,
i Abner ri sabingga i Saul,
tapi ponturo i Daud ledo ria tona nonturokana.
26 Tapi i Saul ledo ria notesa nuapa-nuapa ri eo haitu,
apa nipekirina bara maria nuapa najadi nte ia,
nomposaba karona ledo nagasa nantuntuni atura agama.
27 Karoeona ri Bula Baru,
ponturo i Daud ledo muni naria tona nonturoka,
pade nekutanamo i Saul nte i Yonatan,
“Nakuya riavi bo eo hitu i Daud ledo nakava ri posusa?”
28 Nesana i Yonatan,
“Ia nerapi nte yaku hau ri Betlehem.
29 Niulina,
‘Dekeimo yaku hau,
sabana sampesuvuku movia posusa pedekei pesomba ri Betlehem,
bo yaku niulika nu sampesuvu-sampesuvu koyo puseku kana makava.
Sabana haitu,
ane iko mompotove yaku,
dekei loga ka yaku hau mosinggavaka sampesuvuku.’
Haitumo sabana ia ledo nakava ri posusa hitu,
Tata.”
30 Nangepe haitu,
narau mpuu i Saul ka i Yonatan bo niulikana,
“Ngana dosa!
Hitupa nisanikumo iko nosabinggaka i Daud bo nompakaeya karomu mboto bo tinamu.
31 Dopa nanoto raramu,
ane da matuvupa i Daud iko ledo ntoto majadi magau ri ngata hitu.
Hitupa tudumo tona mangelo ia bo rakenina tumai sabana ia kana mamate.”
32 Nesana i Yonatan,
“Nakuya ia kana mamate?
Nuapa salana?”
33 Nangepe haitu i Saul nombabunu i Yonatan ante tavala.
Nisani i Yonatan tuamana mpuu-mpuu nonia mompatesi i Daud.
34 Narau mpuu rara i Yonatan,
ia nompalaisi meja pangande bo ledo nangande nuapa-nuapa ri eo karoeona posusa Bula Baru haitu.
Nasusa mpuu rarana nompekirika i Daud nipakaeya ntuamana.
35 Kamailekana i Yonatan hau ri karava mosinggavaka i Daud evamo pojanjira randua.
Nikenina saito batuana langgai anu da nangana.
36 Pade niulikana batuana haitu,
“Anumo,
durumo mata pana anu nipanaku.”
Batuana haitu da ranja nangova,
i Yonatan nombapana vai sangu mata pana nombaliunaka batuana haitu.
37 Nakavapa batuana haitu ri kanavu mata pana,
i Yonatan nanguli ka ia,
“Hee!
Mata pana haitu nakavaopa vai hau!
38 Masalisa sakide,
nemo aga meangga!”
Batuana nombaduru mata pana haitu bo navoli nte i Yonatan.
39 Ledo ntoto nisani nu batua i Yonatan batua tesa-tesa i Yonatan haitu,
aga Yonatan bo i Daud nangisanina.
40 Pade i Yonatan nombadekei pareva nu panana ka batuana haitu bo nituduna mavoli hau ri ngata.
41 Navolipa batua i Yonatan,
i Daud nesuvu dako ri sabingga bulu vatu haitu,
bo talu-nggani nekanaede nombasomba i Yonatan.
I Daud bo i Yonatan nosieki bo notumangi.
Nelabipa buku rara i Daud pade i Yonatan.
42 Pade nangulimo i Yonatan ka i Daud,
“Koi palaimo iko,
perapi doa Alatala mombatulungi iko,
nau hau riumba mukalau.
TUPU mombatulungi kita bo mulita,
kana rakingisita pojanjita randua ri ngayo nu Alatala sampe kasae-saena.”
43 Naupu haitu nogaammo ira randua,
i Daud nalaimo bo i Yonatan navoli munimo hau ri ngata.