Nia i Saul karonggani mompatesi i Daud
19
I Saul nanguli ka i Yonatan anana,
bo ka pura-pura batuana,
i Daud kana rapatesi.
Tapi i Yonatan mpuu-mpuu nompotove i Daud.
2 I Yonatan nanguli ka i Daud,
“Tuamaku nonia mompatesi iko.
Jadi iko kana mainga maile mpadondo,
koi petabunimo ri kavunina.
3 Yaku nte tuamaku hau ranggarava bo meangga ri sinjori petabunimu haitu.
Pade yaku motesa nte tuamaku berimba patujuna nte iko,
bo tesa haitu kuuli ka iko.”
4 Pade i Yonatan notesa kabelo i Daud ka tuamana i Saul.
Niulina,
“Tata,
neemo i tata movia panggavia madaa ka batuamu i Daud.
Sabana ia ledo nanggavia anu nadaa ka i tata,
tapi ia nabelo nte i tata.
5 Ia ledo nompekirika karona mboto nau mate nitingayona tempo ia nompatesi i Goliat,
bo TUPU nombadekei padagi mbaso ka Israel.
I tata mboto nanggita kajadia haitu,
bo i tata nadamba tempo haitu.
Nakuya i tata manggavia panggavia madaa ka tona ledo nasala bo mompatesi ia ledoria sabana?”
6 Nangepe tesa i Yonatan nanotomo rara i Saul bo ia nosumpa ante sanga nTUPU domo rapatesina i Daud.
7 Naupu haitu i Yonatan nombaronde i Daud,
bo nitesana pura ka i Daud anu nitesara ntali tuama pangane.
Pade nikenina i Daud ka i Saul,
bo i Daud nokarajaa ka i Saul vai eva baipia.
8 Pade najadi vai posieva ante toFilistin.
I Daud nangeva ira bo padagi,
sampe ira nangova nalai.
9 Naria saeo i Saul nonturo ri banuana nanggangisi tavala bo sampesanika ia nipesulampu nu seta vai anu nipaloga nTUPU mompandasa ia.
Tempo haitu i Daud da nokacapi.
10-11 Patuju i Saul mombatosu i Daud ante tavalana,
tempo i Daud nonturo napara ri rindi.
Tapi i Daud namala neleva,
bo toko haitu nontinda ri rindi.
I Daud nangova nompakasalama karona.
Bongi haitu muni i Saul nombatudu bara sakondua tona hau ri banua i Daud mombalingongo ia,
ala kamaile mpadondona rapatesira i Daud.
Tapi bereina i Mikhal nanguli ka ia,
“Ane iko ledo malai bongi hitu,
maile mpadondo iko rapatesi.”
12 Pade i Mikhal nombatoroaka i Daud dako ri pelaba,
i Daud nalai bo nasalama.
13 Naupu haitu i Mikhal nangala tau-tau nidikana ri paturu i Daud.
Pade nipopolunana bulu ntovau bo nitampunisina tau-tau haitu nte buya gabara.
14 Nakavapa tona nitudu i Saul mombasaka i Daud,
i Mikhal nanguli,
“I Daud da nadua.”
15 Tapi nitudu i Saul vai ira ala rapeintara mboto i Daud.
Nanguli i Saul,
“Keni ia tumai nte paturuna bo kupatesi.”
16 Pade nesuamo tona nitudu haitu hau rantombi,
nikavara aga tau-tau nipopoluna i Mikhal bulu ntovau.
17 Nanguli i Saul ka i Mikhal,
“Naliu mpuu raramu nompotodoyo yaku!
Baliku nipopalaimu!”
Nesana i Mikhal,
“Ane ledo kupopalai ia,
rapatesina yaku.”
18 Namalapa i Daud nalai,
ia hau ri banua i Samuel ri Rama,
bo nitesana pura anu nipovia i Saul ka ia.
Pade i Daud bo i Samuel nosanggani hau ri Nayot bo naroo hamai.
19 Tapi niulipa ntona ka i Saul,
i Daud naria ri Nayot napara Rama.
20 I Saul nompakatu bara sakondua tantarana mombasaka i Daud.
Tapi nikavara aga nabi nasiromu,
nolodi-lodi bo nongare-ngare nipakeni i Samuel.
Pade tantara-tantara i Saul haitu nipesua Nosa Gasa nu Alatala,
ira nolodi-lodi bo nongare-ngare munimo.
21 Niepepa i Saul kareba haitu,
nipakatuna vai tantarana ntanina bo ira muni aga nolodi-lodi bo nongare-ngare.
Katatalu ngganina i Saul nompakatu tantara-tantarana,
aga ivesia muni najadi nte ira.
22 Sabana haitu i Saul mbotomo hau ri Rama.
Nakavapa ri buvu mbaso ri Sekhu,
ia nompekutana riumba i Samuel bo i Daud,
pade tona rahaitu nanguli ka ia,
ira hamai ri Nayot napara Rama.
23 Jadi napolamo i Saul hau ri Nayot napara Rama,
bo ia muni nipesua Nosa Gasa nu Alatala,
ia nolodi-lodi bo nongare-ngare ntapumpu dala hau ri Nayot.
24 Nakavapa hamai,
nivonjusina munimo pakeana,
nolodi-lodi bo nongare-ngare munimo ri ngayo i Samuel,
pade nadungga ri tana novuloa njumaeo bo njambongi-mbongi.
Haitumo sabana tona nanguli,
“Apa najadi nabi muni i Saul?” a