Posimporoa i Yonatan ana i Saul bo i Daud
18
Naupupa i Daud notesa ante i Saul,
nosimporoamo i Yonatan bo i Daud.
I Yonatan nompotove i Daud nasimbayu mpo pompotovena karona mboto.
2 Nompamula dako ri eo haitu i Daud nikeni i Saul hau ri banua kamagauana bo domo nidekeina manjili hau ri banua ntuamana.
3 I Yonatan nompakaroso pojanjina ante i Daud,
sabana ia nompotove i Daud nasimbayu mpo pompotovena karona mboto.
4 I Yonatan nombavonju baju nipakena bo nidekeikana i Daud,
bo muni baju mposievana,
gumana,
pana bo pompou kopena.
5 I Daud nangoseaka pura-pura anu niparenta i Saul ka ia.
Nggani-nggani ia hau nosieva ia kana padagi.
Sabana haitu ia nianggataka i Saul najadi pakeni ntantarana,
bo i Daud nipokono ntodea bo pura-pura tona anu nokarajaaka i Saul.
I Saul nasiriati nanggita i Daud
6 Tempo ira navoli dako riara mposieva,
tempo i Daud nombadagi i Goliat,
tantara-tantara nobaresi nesua rangata,
mombine-mombine nesuvu dako ri njumangu ngata ri Israel nombatomunaka Magau Saul.
Ira nodadeka dade nadamba,
nolodi-lodi,
norabana bo nokacapi.
7 Dala nu dade mombine gahaitu ivei:
“I Saul nompatesi balina nonjobu-njobu,
tapi i Daud nopulu-pulu njobu.”
8 Nangepe dala dade haitu,
narau mpuumo rara i Saul.
Apa nipekirina,
ia domo nireke ntodea,
apa ira nanguli i Daud nompatesi balina nopulu-pulu njobu,
bo ia aga nonjobu-njobu.
Jadi pangulina domo masae i Daud raanggatakara majadi magau.
9 Nompamula eo haitu nasiriatimo ia nte i Daud.
10 Kamailena i Saul nipesua nu seta anu nipaloga nu Alatala mompandasa ia,
sampe ia nanggaremba eva togila riara banuana.
Tempo haitu ia nanggangisi tavala,
bo i Daud da nokacapi eva biasana.
11 Sampesanika tavala haitu nibunukana i Daud sampe ronggani ntoto apa nipekirina,
“Tavala hitu kubunuka i Daud sampe melosa ri rindi!”
Tapi nibununapa,
namala nileva i Daud.
12 Nisani i Saul,
i Daud niporoa nTUPU bo ia mboto domo niporoa nTUPU.
Haitu sabana ia naekamo nte i Daud.
13 I Saul nombalinja i Daud dako ri banua kamagauana ala makavao dako nte ia.
Jadi nianggatakana i Daud najadi pakeni ntantara sanjobu.
Ivesiamo i Daud mpenggani-nggani nanggeniaka tantarana riara mposieva.
14 Pura-pura anu nikarajaa i Daud noasele,
sabana TUPU nombatulungi ia.
15 Nikitapa i Saul pokarajaa i Daud kana noasele,
nantambaimo kaekana nte i Daud.
16 Pura-pura toIsrael bo toYehuda nompotove i Daud sabana ia najadi pakenira riara mposieva.
I Daud noberei nte ana i Saul
17 I Saul nomponia ala i Daud rapatesi ntoFilistin riara mposieva ala nemo ia mboto mompatesina.
Naria saeo i Saul nangulika i Daud,
“I Merab,
anaku mombine lumbua,
kupopoberei ka iko asala mupakita biamu riara mposieva ka TUPU.”
18 Nesana i Daud,
“Ledo masipato yaku majadi mania nu magau,
yaku aga batua bo sampesuvu ntomaku ledoria batuana ri Israel.”
19 Tapi nakavamo tempona i Merab ana lumbua i Saul rapopoberei nte i Daud,
ngana randaa haitu aga nidekei ka i Adriel toMehola rapobereina.
20 Ana randaa i Saul nosanga i Mikhal nompokono i Daud muni.
Niepepa i Saul anana haitu nompokono i Daud,
nipokonona munimo.
21 Nipekirina,
“Aginamo i Mikhal kudekeika i Daud,
ala mamala i Daud matetoliani bo rapatesi ntoFilistin.”
Jadi niulina ka i Daud karongganina,
“Sii-sii iko mamala majadi maniaku.”
22 Pade nituduna nggalino batuana manguli ka i Daud,
ivei:
“Magau bo pura-pura topokarajaa ka ia,
nompotove iko.
Jadi hitumo tempona masipato ka iko mompoberei anana.”
23 Niulikarapa tesa haitu ka i Daud,
nesanamo ia,
“Pangulimiu nagampa najadi mania nu magau?
Yaku hii topakasi bo ledo ria batuana.”
24 Pesana i Daud pangane niuli batua-batuana vai ka i Saul.
25 Pade nitudu i Saul vai ira mangulika i Daud ivei:
“Anu nipokono nu magau rapoada mpoberei anana aga saatu kuli vuntu nggaeya ntoFilistin,
rabalasika bali nu magau.”
Hitumo nia i Saul ala toFilistin mompatesi i Daud.
26 Tempo batua i Saul nangulika i Daud petevai haitu,
nipokono i Daud munimo majadi mania nu magau.
Dopame naupu tempo nidekei ka ia,
27 i Daud nasadiamo nte tantarana hau ri ngata ntoFilistin bo nipatesira roatu toFilistin bo nanggeni kuli vuntu nggaeyara,
nidekeikana i Saul ledo nakura sangua.
Pade nipopoberei i Saulmo i Mikhal bo i Daud.
28 Nisani i Saul,
i Daud nitulungi nTUPU bo nipotove i Mikhal,
29 haitu sabana nantambaimo kaekana nte i Daud.
Ia nompobali i Daud sampe ri kaupu nggatuvuna.
30 Ane naria magau-magau bo tantara ntoFilistin nakava nesuu,
nggani-nggani hau nosieva,
i Daud nabelopa pade pakeni ntantara i Saul ntanina.
Jadi nantambaimo katolele sangana.