I Yusuf nombabatuasi pangipi ntona ri tarunggu
40
Bara sakuya kasaena naliu haitu, randua batua magau Mesir, haitumo topompasiayu panginu bo topovia roti, novia sala ri panggita nu magau. 2 Jadi naraumo magau ka batuana randua haitu, 3 bo nisuarakana riara ntarunggu ri banua pakeni ntopojaga banua magau, haitumo ri banua i Potifar. Ira nitarunggu singgani nte i Yusuf. 4 Topojaga tarunggu nantudu i Yusuf mompasiayu ira. Nasae sakide ira nitarunggu.5 Bara sakuya kasaena naliu haitu, naria sambongi, topompasiayu panginu bo topovia roti haitu, simbo nangipi. Batua mpangipira haitu ledo nasimbayu. 6 Kamaile mpadondona nakava i Yusuf bo nipeintana nasusa mpuu rarara. 7 Jadi nipekutanana, “Nakuya bo nasusa gaga raramiu eo hitu?”
8 Nesana ira, “Ri bongi kami nangipi, bo ledo ria tona nangisani batuana.”
Nanguli i Yusuf, “Aga Alatala mamala mompopaisani batua mpangipi ka tona. Tesa vei pangipimiu.”
9 Topompasiayu panginu haitu nanguli, “Riara mpangipiku nikitaku naria kayu anggur ri ngayoku. 10 Kayu haitu nosepi talu-njepi. Dako nompamula sepina notava, nenggaka munimo sesena. Naliu haitu natasamo vuana. 11 Ri tempo haitu yaku da nanggingisi boda panginu nu magau. Jadi nialaku vua nu anggur haitu, bo nipeasakaku riara boda panginu nu magau, pade nidekeiku ka ia.”
12 I Yusuf nanguli, “Ivei batua mpangipimu: Talu-njepi haitu batuana talu eo. 13 Riara talu eo hitu magau mombakabasaka iko. Ia mombaampungi iko bo mompopokarajaa mpanjili iko ri pokarajaamu bara ipia. Iko mompakasadia boda panginu nu magau mpo bara ipia. 14 Tapi ane mabelomo komiu, toramo yaku. Merapi tulungi, uli ka magau anu najadi ri karoku ala yaku muni rakabasaka lako ri tarunggu hitu. 15 Sabana baipia yaku nipangangga lako ri ngata ntoIbrani bo ri sii muni, ri tana Mesir hitu, ledo ria yaku novia anu nadaa sampe yaku masipato rasuaraka riara ntarunggu.”
16 Niepepa ntopovia roti, nabelo batua mpangipi nu roana, niulina muni pangipina ka i Yusuf, “Yaku muni nangipi. Yaku nombasuu vuvu tatalu tonda roti. 17 Riara ntonda bavona, naria bara sako-ngaya roti ka magau, tapi tonji nakava nangandesi roti haitu.”
18 Nesana i Yusuf, “Ivei batua mpangipimiu tutu: Tatalu tonda, batuana talu-eo. 19 Riara talu-eo haitu, magau mombatudu tona mombatampa tambolomiu pade mombaloe karomiu ri kayu, bo tonji-tonji makava mangande isi nggaromiu.”
20 Talu-eo kaliuna haitu, magau novia posusa mbaso ka pura-pura tomaoge rapombatora eo pompoanaka magau. Ia nomparenta topompasiayu panginu bo topovia roti rapopesuvu lako ri tarunggu bo rakeni hau ri ngayo ntomaoge. 21 Topompasiayu panginu nipopokarajaana mpanjili ri pokarajaana bara ipia. 22 Tapi topovia roti nihuku mate. Pura-pura anu haitu najadi nangoseaka anu niuli i Yusuf. 23 Tapi topompasiayu panginu haitu domo nitorana petevai i Yusuf. Nalingamo rarana.