I Yusuf nte berei i Potifar
39
I Yusuf nikeni muli i Ismael hau ri tana Mesir, bo nipobalu ka i Potifar, pakeni ntantara topojaga banua Magau Mesir. 2 TUPU mpuu-mpuu nantulungi i Yusuf bo i Yusuf noasele riara mpokarajaana. Ia nonturo ri banua i Potifar, toMesir anu nompobatua ia. 3 I Potifar nompeinta TUPU nantulungi i Yusuf bo sabana haitu I Yusuf noasele riara mpengaya pokarajaana. 4 I Potifar nadamba nte i Yusuf bo nikitana namala raparasaya jadi nidekeina kuasa ka i Yusuf mompasiayu banuana bo pura-pura mbara-mbarana. 5 Nompamula lako rahaitu, TUPU nombadekei rasi bo belo ka i Potifar sambanua, bo pura-pura anu naria nte ia, nau ri banua, nau ri talua, nabelo pura sabana i Yusuf. 6 Pura-pura mbara-mbara i Potifar, niparasayana ka i Yusuf. Jadi i Potifar domo nasesa nompekirika mompasiayu banuana, damo aga anu rakandena.I Yusuf nagaya polenjena bo naroso pokarona. 7 Bara sakuya kasaena naliu haitu, berei i Potifar nompamulamo nompokono i Yusuf, niunakana i Yusuf mosampaturu nte ia. 8 I Yusuf ledo nadota bo nanguli, “Merapi ampu yaku nte komiu! Pura-pura mbara-mbara i pua niparasayana ka yaku. Domo ia nompekirika nuapa-nuapa riara banua hitu. 9 Ri sii, nasimbayu kakuasaku bo kakuasana. Ledo naria sangua anu ledo niparasayana ka yaku, aga komiu ledo niparasayana ka yaku apa komiu bereina. Berimba bo kupovia pokainggu nadaa ivetutu bo movia dosa ri ngayo nu Alatala?” 10 Naupa eo-eo berei i Potifar nompadidisi i Yusuf, tapi ia ledo nadota nosimperou nte mombine haitu.
11 Naria sanggani, i Yusuf nesua riara banua mokarajaa, bo ledo naria saitoa batua ntanina riara banua. 12 Jadi berei i Potifar nombataja baju i Yusuf bo nanguli, “Kamaimo, kita maturu singgani.” Tapi i Yusuf ledo nadota, ia nekaravemba bo nangova nalai, tapi bajuna naboli ri pale mombine haitu. 13 Berei i Potifar nanggita i Yusuf nalai, bo bajuna naboli, 14 nirondena batua-batuana bo nanguli, “Peinta vei! ToIbrani anu nikeni nu bereiku ri banua hitu, ia nompongeika kita. Ia nesua ri tombiku madota mompogau yaku, tapi yaku nongare pakamangga. 15 Nongarepa yaku, nalaimo ia bo naboli bajuna.”
16 Naliu haitu berei i Potifar nomboli baju haitu sampe manjili bereina. 17 Nanjilipa bereina, kaliu-liu nitesana anu haitu ka bereina, niulina, “ToIbrani anu nikenimu haitu nesua riara ntombiku madota mompogau yaku 18 tapi nongarepa yaku, nalaimo ia nesuvu bo naboli bajuna.”
19 Nangepe tesa bereina, narau mpuu i Potifar. 20 Bo niparentana masalisa rasaka i Yusuf bo rasuaraka riara ntarunggu. Tarunggu haitu nipovia ka tona anu nompakarau rara magau. 21 Tapi TUPU nantulungi i Yusuf bo nompoasi ia, sampe topojaga tarunggu nabelo rarana nte i Yusuf.
22 I Yusuf niparasaya ntopojaga tarunggu mompasiayu anu nikarajaa ntona ntanina riara ntarunggu haitu. 23 Topojaga tarunggu domo nasesa nompekirika anu niparasayakana i Yusuf, sabana TUPU nombatulungi i Yusuf sampe nuapa-nuapa nipoviana, nabelo pura.