I Yehuda bo i Tamar
38
Ri tempo haitu i Yehuda nompalaisi sampesuvuna, bo hau nonturo nosinggani nte i Hira, langgai lako ri ngata Adulam. 2 Ri ngata ponturora haitu, i Yehuda nosisani ante saito randaa, ana i Syua toKanaan, sampe ira noberei. 3 Natiana mombine haitu bo noanaka ngana langgai anu nipoposanga ntuamana i Er. 4 Anana karanduana langgai muni bo nipoposanga ntinana i Onan. 5 Anana katataluna langgai muni, bo nipoposanga ntinana i Syela. Tempo i Syela nipoanaka, i Yehuda da ri ngata Kezib.6 Nambasopa i Er ana lumbuana, i Yehuda nompopoberei ia nte i Tamar. 7 Tapi inggu i Er nadaa ri panggita nTUPU, sampe TUPU nompatesi ia. 8 [Ledo noana i Er bo i Tamar.] Naliu sia, i Yehuda nanguli ka i Onan tuei i Er, “Pobereimo timbala ntuakamu bo peroukamo ia ala maria muli maboli ka tuakamu, apa ivesia adata.”
9 Tapi nisani i Onan, ane maria anana ngena ledo rareke anana mboto. Jadi nggani-nggani ia nosimperou nte timbala ntuakana haitu, nipalambana manina nabubu ri savalikuna ala tuakana ledo manggava muli. 10 Pokaingguna ivehaitu nadaa ri panggita nTUPU sampe nipatesi nTUPU muni ia.
11 Naupu sia nangulimo i Yehuda ka maniana i Tamar, “Panjilimo iko hau ri banua ntotuamu bo ponturomo hamai mpo timbala sampe mambaso anaku i Syela.” Niulina ivesia, apa ia naeka, nipekirina nee-nee i Syela mamate mpo tuakana randua muni. Jadipa nanjilimo i Tamar hau ri banua ntuamana.
12 Bara sakuya kasaena naliu haitu, namatemo berei i Yehuda. (Mombine haitu ana i Syua.) Naliupa tempo nggasusa rara nompekiri ka kamate, i Yehuda bo roana i Hira lako ri ngata Adulam haitu hau ri ngata Timna ri pombolina bimba anu ragunji buluna. 13 Niepe i Tamar kareba matuana i Yehuda makava ri ngata Timna mombagunji bulu-bulu bimbana. 14 Jadipa nisambeinamo pakea ntimbalana ante pakea ntanina. Nitutuina lenjena ante potumbali bo nonturomo ia ri bobaa ngata Enaim, ri dala hau ri ngata Timna. Nisani i Tamar, nambasomo i Syela ana panggaupu i Yehuda bo dopa muni nipopoberei ka ia [jadi niulina kana mangelo muli nte matuana.]
15 Jadi tempo i Yehuda nompeinta i Tamar, nisarumakana ia haitu bajinga sabana lenjena natetampunisi. 16 Jadi nikaparai i Yehudamo ia ri bivi dala bo nipekutanana, “Sakuya nuperapi?” Ledo nisani i Yehuda tano mombine haitu maniana mboto.
Nesana i Tamar, “Aga dotamiu.”
17 Nanguli vai i Yehuda, “Yaku mombadekei ka iko sangu tovau muda.”
Nesana i Tamar, “Namala, asaa maria anu kukingisi, sampe komiu mompakatu tovau ka yaku.”
18-19 Nekutana i Yehuda, “Tanda panggingisi nuapa?”
Nesana i Tamar, “Dekeimo ka yaku meremiu ante kalorona bo toko naria nte komiu tutu.” Jadi nidekei i Yehuda mpuumo anu haitu ka ia. Naliu haitu nosimperoumo ira. Naliu ira nosimperou, nanjilimo i Tamar hau ri banuana bo nombabuka kae nipobonggosina balenggana, bo nipasuana vai pakea ntimbalana.
Natianamo i Tamar. 20 Bara sakuya kasaena naliu, i Yehuda nombatudu roana i Hira, manggeni tovau bo merapi mpanjili anu nidekeina rapotandai pojanji, tapi ledo ria nikava i Hira mombine haitu. 21 I Hira nompekutana-tana nte toEnaim, “Riumba bajinga anu nabiasa nepopea ri bivi nu dala?”
Nesana ira, “Ledo ntoto naria bajinga ri sii.” 22 Naliu haitu nanjilimo i Hira hau nte i Yehuda bo nanguli, “Ledoria nikavaku mombine haitu. Nantuntuni tesa ntona hamai, ledo ria mombine bajinga hamai.”
23 Nanguli i Yehuda, “Dekeikamo mbara-mbara haitu ka ia, asaa kita ledo manggava eya. Yaku nompasimbukumo mombayarina, ledo nikavamu ia.”
24 Nitasere talumbula kaliuna, i Yehuda nangepe kareba nu maniana i Tamar netibajinga bo natianamo. Jadi i Yehuda nanguli, “Alamo ia bo palabusimo sampe mamate!”
25 Tempo i Tamar nisuvuraka, niulina petevaina ka matuana ivei, “Yaku nipakatiana ntupu nu mbara-mbara anu naria nte yaku hitu. Paresamo isema tupu nu mere ante kaloro bo toko hitu.”
26 Nisani i Yehuda mbara-mbara haitu bo niulina, “Mombine hitu ledo nasala. Yaku ledo nompakadupa janjiku ka ia; kakanana kana kupopoberei anaku i Syela nte ia.” I Yehuda domo naria nosimperou nte i Tamar.
27 Nakavamo tempona i Tamar noana, ia noana narapi. 28 Tempo ia noana, saito anana nombasuvuraka palena, mombine nombatulungi ia noana nombakingisi bo nombapou pale ngana haitu ante bana lei. Nisarumakana ngana haitu mesuvu mokolu. 29 Tapi ngana haitu nombakonjoraka palena mpanjili, bo ngana saitopa nesuvu nokolu. Naliu haitu nangulimo mombine nombatulungi ia, “Jadi ivehaitu tano akalamu nesaravi mesuvu!” Jadi ngana nokolu nesuvu nipoposanga i Peres.a 30 Pade nesuvu anana anu naria bana lei ri palena, nipoposanga i Zerah.b