I Yakub ante todeana hau ri ngata Betel
35
Alatala notesa ka i Yakub, “Yakumo Alatala anu neonga nte iko tempo iko nalai lako nte tuakamu i Esau. Koimo masalisa hau ri ngata Betel. Ponturo hamaimo bo poviamo lanta pesomba ka Yaku.”2-3 Jadi notesamo i Yakub ka ira sambanua bo tona nosanggani nte ia, “Kita malai lako ri sii, bo hau ri ngata Betel. Hamai yaku movia lanta pesomba ka Alatala anu nombatulungi yaku riara nggasusaku bo nombasaliku yaku ri umba-umba nikalauku. Jadi tedakamo tau-tau nisomba anu naria nte komiu. Poviamo ada pompakagasa karo bo pasuamo pakea nagasa.”
4 Naliu haitu nidekeira puramo tau-tau anu naria nte ira ka i Yakub bo muni daliraa. Pura-pura anu gahaitu nitana i Yakub ri puna kayu mbaso napara ngata Sikhem. 5 Tempo i Yakub bo todeana malaimo, Alatala nompakaeka tona ri bagia haitu sampe i Yakub bo todeana ledo niragara.
6 Jadi nakava ri tana Kanaan ri ngata Betel. Nggaulu ngata haitu nosanga Lus. 7 Ri sia i Yakub novia lanta pesomba bo nompoposanga ngata haitu “El-Betel,” sabana Alatala neonga ri sia tempo ia nalai ka tuakana.
8 Ri sia muni kamate i Debora, topompiara i Ribka [tina i Yakub, berei i Ishak]. Ia nitana ri puna kayu mbaso ri bagia puluna nu ngata haitu. Haitumo sabana kayu haitu nipoposanga “Kayu Tangi.”
Alatala nojanji bo nombadekei rasi bo belo ka i Yakub ri ngata Betel
9 Nanjilipa i Yakub lako ri Mesopotamia, Alatala neonga vai nte ia bo nombadekei rasi bo belo ka ia. 10 Nangulimo Alatala ka ia, “Iko domo mosanga i Yakub, tapi Kupoposanga i Israel.” Jadi ivesiamo Alatala nompoposanga ia i Israel. 11 Pade notesa muni Alatala, “Yakumo Alatala anu Nambaso kakuasana. Iko momuli madea. Iko momulika madea todea nu ngata bo majadi tuama magau-magau. 12 Ngata anu nidekeiKu ka i Abraham bo i Ishak, Kudekei ka iko bo ka mulimu.” 13 Naliu haitu, nipalaisi nTupumo i Yakub.
14 I Yakub nompatunda sangu vatu pompatora ri bela Alatala notesa ka ia. Jadi ri vatu haitu nisombana Alatala ante nombatoli lana zaitun bo uve anggur ri bavo vatu haitu. 15 Ponturo haitu nipoposangana “Betel.”b
I Rahel namate.
16 Naliu haitu i Yakub bo todeana nompalaisi ngata Betel. Da nakavao ira ante ngata Efrata, nakavamo gantana i Rahel moana. Tapi nadaa mpuu poanana. 17 Tempo dua mpoanana neparasu gagamo, nangulimo tona nombatulungi ia noana, “Pakaroso raramu, Rahel, anamu langgai.” 18 Tapi i Rahel naparamo maponji bo nangainosa panggaupuna, nipoposangana anana haitu i Ben Oni,c tapi tuamana nompoposanga ia i Benyamin.d 19 Namatepa i Rahel, ia nitana ri bivi dala hau ri ngata Efrata, (sii-sii nipoposanga ngata Betlehem). 20 I Yakub nompatunda sangu vatu pompatora ri sia, bo sampe eo hitu muni dayo i Rahel da nitandai ante vatu haitu. 21 Naliu haitu i Yakub nompapola polipana, pade nipatakana tendana ri ponturo naliu ngata Eder. 22 Ri tempo haitu i Ruben nosampaturu nte i Bilha, berei ntuamana. Pokaingguna haitu niepe i Yakub, bo narau mpuu ia.
Ana-ana i Yakub
I Yakub nomuli sapulu randua langgai.
23 Anana bo i Lea haitumo: i Ruben (ana lumbua i Yakub), i Simeon, i Lewi, i Yehuda, i Isakhar bo i Zebulon.
24 Anara bo i Rahel haitumo: i Yusuf bo i Benyamin.
25 Anara bo i Bilha, anu najadi batua i Rahel haitumo: i Dan bo i Naftali.
26 Anara bo i Silpa, anu najadi batua i Lea haitumo: i Gad bo i Asyer.
Ngana gahaitu nipoanaka ri ngata Padan-Aram ri tana Mesopotamia.
I Ishak namate
27 Jadi, nakavamo i Yakub nte tuamana i Ishak, ri ponturo ntuamana ri ngata Mamre napara ngata Hebron (sangana baipia Kiryat-Arba). (I Abraham tupu i Yakub, nonturo ri ngata haitu muni nggaulu). 28-29 I Ishak natua ntotomo, umuruna saatu valupulu mpaemo. Ia namate bo nitana nu anana i Esau bo i Yakub.