Muli i Esau
(1 Tav 1:34-37)
36
Hitumo muli i Esau anu nabiasa muni nidae i Edom:2 I Esau nompoberei mombine ntoKanaan, haitumo:
i Ada, ana i Elon toHet;
i Oholibama, ana i Ana tupu i Zibeon toHewi.
3 Bo noberei muni nte i Bazmat, ana i Ismael, tuei i Nebayot.
4 I Ada noanaka i Elifas,
i Basmat noanaka i Rehuel,
5 bo i Oholibama noanaka i Yeus, i Yaelam bo i Korah. Pura-pura ngana gahaitu nipoanaka ri tana Kanaan.
6 Naliu haitu i Esau nompalaisi i Yakub, bo nalai hau ri ngata ntanina nanggeni pura-pura bereina, ana-anana bo pura-pura tona nonturo ri banuana, pura-pura binatana bo kakalumana nikavana ri tana Kanaan. 7 I Esau nogaa lako nte i Yakub sabana kakalumanara nadea gagamo sampe ira domo namala matuvu mosinggani-nggani. Bo muni ri ngata niponturora domo nagana anu rakande nu binatara anu nadea gagamo haitu. 8 Jadi i Esau anu nidae i Edom, naroo ri bagia Bulu Seir.
9 Hitumo muli i Esau. Iamo totua ntoEdom anu nonturo ri Bulu Seir
10-13 Berei i Esau anu nosanga i Ada, noanaka saito ngana langgai, sangana i Elifas.
Bo i Elifas noana alima ngana langgai, haitumo: i Teman, i Omar, i Zefo, i Gaetam bo i Kenas. I Elifas noberei piara, sangana i Timna. Ia noana langgai, nosanga i Amalek.
Berei i Esau nosanga i Basmat noanaka saito ngana langgai nosanga i Rehuel. Bo i Rehuel noanaka ampa ngana langgai, haitumo: i Nahat, i Sera, i Syama bo i Misa.
14 Berei i Esau anu nosanga i Oholibama, haitumo ana i Ada bo tupu i Sibeon, noanaka tatalu ngana langgai, haitumo: i Yeus, i Yaelam bo i Korah.
15-16 Muli i Esau najadi balengga nu valaa-valaa ri tana Edom. I Elifas ana lumbua i Esau ante bereina i Ada, nomulika:
valaa i Teman,
valaa i Omar,
valaa i Zefo,
valaa i Kenas,
valaa i Korah,
valaa i Gaetam bo
valaa i Amalek.
17 I Rehuel, ana i Esau nte bereina i Basmat, nomulika ampa valaa. Sanga nu valaa haitu:
valaa i Nahat,
valaa i Serah,
valaa i Syama
bo valaa i Misa.
18 Ana-ana i Esau nte bereina i Oholibama, ana i Ana najadi balengga nu valaa muni, haitumo
valaa i Yeus,
valaa i Yaelam
bo valaa i Korah.
19 Haitumo sunju muli i Esau anu nidae i Edom bo balengga-balengga nu valaara.
Muli i Seir
20-21 Toponturo naroo ri tana Edom nibagi najadi valaa-valaa muli i Seir, toHori. Haitumo:
valaa i Lotan,
valaa i Syobal,
valaa i Zibeon,
valaa i Ana,
valaa i Disyon,
valaa i Ezer
bo valaa i Disyan.
22 Ana i Lotan haitumo: i Hori bo i Heman. Sampesuvu mombine i Lotan nosanga i Timna.
23 Ana i Syobal, haitumo: i Alvan, i Manahat, i Ebal, i Syefo bo i Onam.
24 I Zibeon noana randua ngana langgai, haitumo:
i Aya
bo i Ana. (I Ana nanggava mata uve pane ri karava bai, tempo ia da noevu jara ntuamana).
25-26 I Ana haitumo tuama i Disyon, bo Disyon nomulika i Hemdan, i Esyban, i Yitran bo i Keran. I Ana muni noana saito ngana mombine, sangana i Oholibama.
27 Ana I Ezer haitumo i Bilhan, i Zaawan bo i Akan.
28 Ana i Disyan haitumo i Us bo i Aran.
29-30 Hitumo balengga-balengga valaa ntoHori ri ngata Edom: i Lotan, i Syobal, i Zibeon, i Ana, i Disyon, i Ezer bo i Disyan.
Magau-magau ntoEdom
(1 Taw 1:43-54)
31-39 Dopame naria magau nomparenta toIsrael, magau-magau gahitu nosinjambei-mbei nomparenta ri tana Edom:
I Bela ana i Beor lako ri ngata Dinhaba.
Naupu sia i Yobab ana i Zerah lako ri ngata Bozra.
Naupu sia I Husyam lako ri bagia Teman.
Naupu sia i Hadad ana i Bedad lako ri ngata Awit (Iamo nombadagi toMidian tempo nosieva ri tana Moab).
Naupu sia i Samla lako ri ngata Masreka.
Naupu sia i Saul lako ri ngata Rehobot ri bivi binangga.
Naupu sia i Baal-Hanan ana i Akhbor.
Naupu sia i Hadar lako ri ngata Pahu (bereina nosanga i Mehetabeel, ana i Matred, tupu i Mezahab).
40-43 Hitumo sanga valaa-valaa muli i Esau. Ponturora nipoposanga sanga nu valaara:
Valaa i Timna,
valaa i Alwa,
valaa i Yetet,
valaa i Oholibama,
valaa i Ela,
valaa i Pinon,
valaa i Kenas,
valaa i Teman,
valaa i Mibzar,
valaa i Magdiel,
bo valaa i Iram.
Haitumo sanga-sanga nu valaa ri tana Edom. Sanga nu valaa haitu nipoposangaka muni ka ngata niponturora. Pura-pura ira toEdom, muli i Esau.