I Dina nipogau
34
Naria saeo, i Dina, ana mombine i Yakub bo i Lea, nanjayo nte mombine toKanaan. 2 I Hemor toHewi, iamo magau ri bagia haitu. Naria saito anana langgai nosanga i Sikhem. Tempo i Sikhem nanggita i Dina, nikenina mpalai, bo nipogauna. 3 Tapi nipokonona mpuu i Dina, sampe ia madota motengea nte i Dina bo nompasimbuku ala mombine haitu mompokono ia muni. 4 Nangulimo i Sikhem ka tuamana, “Kuperapi i tata mompasimbuku manggava mombine haitu ka yaku. Yaku madota mompoberei ia.”5 Niepe i Yakub anana mombine nipogau, dopa nipoviana nuapa-nuapa sabana anana langgai da noevu binatana, bo ia nantongoraka ira manjili.
6 I Hemor, tuama i Sikhem, nakava nte i Yakub motesa poberei anara. 7 Eva nisuka tempo haitu, ana-ana langgai i Yakub nakavamo lako ri karava. Jadi nangepe kareba anu najadi nte tueira haitu, narau bo nadua mpuumo rarara apa i Sikhem nompogau tueira bo pokainggu ivehaitu nepakaeya ka toIsrael.
8 Nangulimo i Hemor ka i Yakub, “Anaku i Sikhem nompokono anamiu; kuperapi komiu mombadekei ia moberei nte anaku. 9 Anumo rabotusitamo, ngatamiu bo ngata kami mogalo mosipoberei. 10 Jadi komiu mamala monturo ri ngata kami hitu, ri umba-umba rapokonomiu. Komiu maloga mobalu-balu bo mangali tana.”
11 Naliu haitu nangulimo i Sikhem ka tuama i Dina bo tuaka-tuakana, “Poiyomo perapiku hitu, jadi kudekei ka komiu nuapa-nuapa rapokonomiu. 12 Ulimo nuapa nipokonomiu, bo pakatantumo sunda mpoberei. Kudekei anu raperapimiu, asaa radekeimiu yaku mompoberei randaa haitu.”
13 Ana-ana i Yakub nombadavai i Sikhem bo tuamana i Hemor sabana i Sikhem nompogau tueira i Dina. 14 Nangulimo ira ka i Sikhem bo tuamana, “Naeya mata kami moberei nte tona ledo nisuna. 15 Kami mompoiyo pomperapimiu tutu ane komiu majadi mpo kami. Batuana, pura-pura langgaimiu kana rasuna. 16 Maliu haitu pade rapoiyo kami mosigalo mosipoberei. Kami maroo ri tatangamiu bo mosangu ngata nte komiu. 17 Tapi ane ledo ratarimamiu ada nitaa kami hitu, bo ledo madota rasuna, PSA 94:19 Ane nadea pompekiri nompakasesa raraku, nipakasana bo nipakatinontoMiu mpanjili raraku. o rakeni kami mpalai.”
18 I Hemor bo i Sikhem nompekiri ada niulira haitu masipato. 19 Jadi nasadiamo i Sikhem nompoiyo ada haitu sabana ia nompokono i Dina. Lako nte ira sambanua haitu, i Sikhemo nataupa nangala rara ntona. 20 Jadi haumo i Hemor bo i Sikhem ri posintomu ri bobaa ngata, bo notesa ka todea ri ngatara, ivei, 21 “ToIsrael haitu madota monturo mosinggabelo nte kita. Jadi dekeikamo ira monturo mosanggani nte kita ri ngatata hitu bo rapalogata ira hau ri umba-umba rapokonora. Ngatata hitu nagana kaluona ka ira. Kita mamala mompoberei randaara, bo ira muni mamala mompoberei randaata. 22 Tapi toIsrael haitu madota monturo mosangata nte kita asaa kita mantuntuni adara, haitumo: pura-pura langgaita kana rasuna nasimbayu mpo ira. 23 Jadi pura-pura ngena binatara bo kakalumanara majadi anuta. Anumo, kita manturusi perapira ala ira monturo mosanggani nte kita.”
24 Pura-pura todea ri ngata haitu nompoiyo anu niuli i Hemor bo i Sikhem. Naupu sia, pura-pura langgai ri ngata haitu nisuna.
25 Talu eo kaliuna haitu, langgai-langgai toHewi da nadua nisuna. Randua ana i Yakub, tuaka i Dina, anu nosanga i Simeon bo i Lewi, nangala gumara, pade nompelino ira nesua riara ngata bo nipatesira pura langgai ri sia, 26 nipatesira muni i Hemor bo i Sikhem. Naupu sia nialara i Dina lako ri banua i Sikhem bo nikenira mpalai. 27 Naliu haitu, ana i Yakub santanina hau nangagosi mbara-mbarara nombabalasi pokainggu topompogau tueira i Dina. 28 Nialara tovau, bimba, japi, jara bo pura-pura anu naria ri ngata bo ri karava. 29 Nialara pura anu noali, mombine bo ngana-ngana, bo niagosira pura banua ri ngata haitu.
30 Nangulimo i Yakub ka anana i Simeon bo i Lewi, “Komiu nompakasusa yaku. Hitupa toKanaan bo toFeris bo pura-pura toponturo ri ngata hitu mompovuu mata yaku. Tona naria nte kita ledo nadea. Ane pura-pura tona gahaitu masintuvu mangeva kita, tantu kita sambanua rapakaropura.”
31 Tapi nesana ira, “Ledo rapakule kami mompalamba tuei kami rapovia mpo bajinga.”