I Yakub nosintomu ante i Esau
33
Nikita i Yakub, tumaimo tuakana nakava ante pataatu tona naria nte ia. Sabana haitu, nidekeina anana ka simbo tinana, haitumo i Rahel bo i Lea bo batuana randua anu najadi berei piara. 2 Ia nompopokolu randua berei piarana ante ana-anara, pade i Lea ntaliana, pade i Rahel ntalianana i Yusuf ri puri ntoto. 3 I Yakub nolipa ri kolura bo nanggaparai tuakana bo nantaputu pitu nggani.4 Tapi i Esau nangova nombatomunaka i Yakub, nanggapui bo nangeki ia. Ira randua haitu simbo notumangimo. 5 Tempo i Esau nanggita mombine bo ngana-ngana, nipekutananamo, “Isema tona nosanggani nte iko?”
Nesana i Yakub, “Ira ana-anaku, anu nidekei nu Alatala ka yaku lako ri kabelo nu raraNa.”
6 Naliu haitu, berei piara ntaliana nanggaparai ira bo nantaputu. 7 Pade nakava i Lea ntaliana, bo panggaupuna i Yusuf bo i Rahel nekaparai bo nantaputu muni.
8 Nekutanamo i Esau, “Nuapa patujumu ante lunu nipotomuku pangane?”
Nesana i Yakub, “Tuakaku, haitu pedekai ala masana raramiu manggita yaku.”
9 Tapi nanguli i Esau, “Naganamo kakalumanaku, domo paraluu iko mombadekei kakalumanamu ka yaku.”
10 Nangulimo i Yakub, “Nee! Yaku mompakasana raramu, tarimamo anu nidekeiku hitu. Nanggita lenjemiu nasimbayu eva nanggita lenje nu Alatala, sabana komiu nadamba nantarima yaku. 11 Jadi kuperapi, tarimamo anu nikeniku hitu. Tupu nabelo raraNa bo Ia nombadekei ka yaku anu niparaluuku.” I Yakub nombabarusu i Esau sampe kaupuna niala i Esaumo anu nidekeina.
12 Naliu haitu nangulimo i Esau, “Anumo, rapapolatamo polipata, yaku momporoa iko.”
13 Nesanamo i Yakub, “Tantu nisanimiu ngana gahitu nanggoyo, bo yaku kana mompaente ante binata da noana kodi. Ane masalisa rairi, nau aga saeo, mamate puramo binata haitu. 14 Pokolumo komiu molipa, yaku metuntuni mpaliole. Yaku molipa ri puri ante binata bo anaku mantuntuni komiu sampe ri ngata Edom.”
15 Nangulimo i Esau, “Ane ivesia tano, kuboli ka iko bara sakondua tona naria nte yaku.”
Tapi nesana i Yakub, “Tuakaku, tumo masesa raramiu, yaku aga madota mompakasana raramiu.”
16 Jadi ivesiamo eo haitu i Esau nanjili hau ri ngata Edom. 17 Tapi i Yakub hau ri ngata Sukot, bo nombangu banuana bo sou pekanaluu nu binatana. Haitumo sabana ponturo haitu nipoposanga Sukot.a
18 Riara mpolipa lako ri tana Mesopotamia, i Yakub nasalama sampe nakava ri ngata Sikhem ri tana Kanaan, bo nompopeangga tendana ri karava napara ngata haitu. 19 Tana nipotendara haitu nialina lako nte muli i Hemor, tuama i Sikhem, ante ali saatu doi salaka. 20 Pade nisunjunamo vatu majadi lanta pesomba ri sia bo nipoposangana El Elohe Israel, batuana “Alatala iamo Alatala nisomba ntoIsrael.”