I Yakub naeka mosintomu nte i Esau
32
I Yakub nompapola polipana. Naria malaeka nu Alatala nosintomu nte ia. 2 Tempo i Yakub nompeinta ira, nangulimo ia, “Hitu potenda tantara nu Alatala!” Sabana haitu, nipoposangana ponturo haitu Mahanaim.a3 Naliu haitu, i Yakub nombatudu tona mokolu hau ri ngata Edom ri tana Seir mosinggavaka tuakana i Esau. 4 I Yakub nantevai ira bo nanguli, “Ulimo ka tuakaku i Esau ivei: ‘Yaku i Yakub, batuamiu. Nasaemo yaku nonturo nte i Laban. 5 Hitupa yaku nojapi, notovau, nobimba, nojara, bo naria muni batuaku. Yaku nompakatu kareba ka komiu, ala mabelo raramiu nte yaku.’ ”
6 Tempo tona nisuro nanjili nte i Yakub, nanguli ira, “Lako nte i Esaumo kami, bo hitupa da ritu ri puri ia tumai mosinggavaka komiu. Ia nanggeni pataatu tona.”
7 Nangepe haitu, naekamo i Yakub bo nasesa rarana. Jadi tona naria nte ia nibagina randua lunu, ivesia muni bimbana, tovauna, japina bo untana. 8 Nipekirina, “Ane makava i Esau bo mombaeva lunu paratama, bara da mamala lunu karanduana mompakasalama karora.”
9 Naliu haitu, nosambayamo i Yakub, “O PUE, Alatala nisomba ntupuku i Abraham, bo tuamaku i Ishak, epemo yaku! NituduMiumo yaku manjili hau ri ngataku bo nte sampesuvuku. Bo Komiu nojanji mompasiayu anu nabelo ka yaku. 10 Ledo masipato yaku mantarima pura-pura belo bo tove anu nituduakaMiu ka yaku. Tempo yaku nombavote binangga Yordan baipia, yaku ledo nanggeni nuapa-nuapa, aga toko nggoo. Hitupa yaku nakava nte lunu randua hitu. 11 Yaku mpuu-mpuu merapi ala rapakasalama lako nte tuakaku i Esau. Yaku naeka, nee-nee ia makava mombaeva bo mompakaropu kami, bo muni mombine nte ngana-ngana. 12 Toramo, Komiu nojanji mompasiayu anu nabelo ka yaku bo mombadekei muli madea. NijanjiMiumo ledo maria saitoa mompakule mombabilana sabana kadea muliku mpo bone ri bivi tasi.”
13-15 Nasambongipa ira ri sia, niala i Yakubmo sabagia binatana radekeina ka i Esau. Haitumo, roatu tovau besina, ropulu tovau lakina, roatu bimba besina, ropulu bimba lakina, talupulu unta mpoana ante anana, patapulu japi besina, sapulu japi lakina, ropulu jara besina bo sapulu vai jara lakina. 16 Nibagina binata haitu najadi bara sakuya lunu pade nidekeina ka batuana. Bo niulina ka ira, “Pokolumo komiu, liunakamo yaku. Jagaimo kana maria olona lunumiu salunu-salunu.”
17 I Yakub nomparenta lunu paratama, “Ane tuakaku i Esau mosintomu nte iko, bo mekutana, ‘Hau ri umba komiu? Isema tona nobatua komiu? Isema tupu binata anu niirimiu?’ 18 Pesanakamo, ‘Tona nompobatua kami i Yakub. Ia nompakatu binata hitu majadi pedekeina ka i Esau, tuakana. I Yakub da ritu ri puri.’ ”
19-20 Nidekei petevai nasimbayu ka batuana karanduana, katataluna, bo ka tona ntanina nipatavana mangurusi lunu nu binata haitu. Sabana i Yakub nompekiri ia mamala mantingengesi i Esau ante pedekeina haitu, sampe ane mosinggava ngena, i Esau madota mosinggabelo nte ia. 21 Jadi nipakatuna ntani pedekeina haitu, bo ia mboto da nasambongi ri potendana.
I Yakub nosipekua
22 Bongi haitu muni i Yakub nembangu bo nanggeni bereina randua bo berei piarana randua, bo sapulu saito anana, nevote binangga Yabok. 23 Naliu ia nombavotesaka ira, nanjili vai ia nombavotesaka pura-pura mbara-mbarana. 24 Nabolimo ia saitona ri sia. Jadi nakavamo saito langgai nosimpekua mosidungganaka nte ia sampe naeo. 25 Nisanipa ntona haitu ledo rapakulena mombadagi i Yakub, nibobana kuntu i Yakub, sampe nosinjaa oyu kuntuna. 26 Jadi nangulimo tona haitu, “Kabasakamo yaku! Domo masae mebondamo eo!”
Nesana i Yakub, “Ledo kukabasaka komiu, pua, ane ledo radekei rasi bo belo ka yaku.”
27 Nekutanamo tona haitu, “Isema sangamu?”
Nesana ia, “I Yakub.”
28 Nangulimo tona haitu, “Sangamu domo i Yakub. Iko nosievamo nte Alatala bo nte manusia, bo iko padagi. Sabana haitu, sangamu i Israel.” b 29 Nangulimo i Yakub, “Ulimo sangaMiu, Pua.”
Tapi tona haitu nesana, “Ledo paraluu iko mangisani sangaku!” Naliu haitu nidekeinamo rasi bo belo ka i Yakub.
30 Pade nangulimo i Yakub, “Yaku nosintomu lenjemo nte Alatala, bo yaku da natuvu!” Sabana haitu nipoposangana ponturo haitu Pniel.c 31 Nebondapa eo, nalaimo ia lako ri Pniel, bo nakejo ia nolipa sabana uva ngguntuna nangilu. 32 Sampe eo hitu toIsrael ledo nangande bau anu nombabungusi kuntu binata, sabana kuntu i Yakub nambela niboba ntona anu nosimpekua nte ia.