I Yakub nalai lako nte i Laban
31
I Yakub nangepe era-erana (haitumo ana i Laban) nanguli ivei: “I Yakub nangalasi pura kakalumana ntuamata. Pura-pura kakalumana i Yakub lako nte tuamata.” 2 Bo nipeinta i Yakubmo, i Laban domo nanondo mpo baipia.3 Jadi nangulimo TUPU ka i Yakub, “Panjilimo ri ngata ntuamamu bo sampesuvumu. Yaku mombasaliku iko.”
4 Naliu haitu, i Yakub nantudu tona hau mangulika i Rahel bo i Lea mosinggavaka ia ri karava, ri poevuna lunu ntovau bo bimbana. 5 Pade nangulimo i Yakub ka i Rahel bo i Lea, “Nipeintaku domo nanondo tuamamu nte yaku. Tapi Alatala nisomba ntuamaku nombasaliku yaku. 6 Nisanimiu randua munimo yaku nompasimbuku ante mpuu-mpuu rara nokarajaa ka tuamamiu. 7 Naupa ivesia, nibagiuna yaku, bo tamboku sampe sapulu ngganina nibalikina. Tapi Alatala ledo nompalamba ia nompakadaa yaku. 8 Tempo tuamamiu nanguli tovau nakido-kido majadi tamboku, jadi pura-pura binata noana nakido. Tempo ia nanguli tovau naloba majadi tamboku, jadi pura-pura binata haitu noana naloba. 9 Ivesiamo Alatala nangala binata ntuamamiu bo nidekeiNa ka yaku.
10 Bara ipia ri tempo mposirasi binata haitu, yaku nangipi bo nipeintaku tovau lakina ranja mposirasi, binata nosai-sai, notuda-tuda, nakido-kido, bo naloba. 11 Bo malaeka nu Alatala notesa nte yaku riara mpangipi haitu, ivei, ‘Yakub!’
Nesana yaku, ‘Iyo, Pue.’
12 Nanguli vai malaeka haitu, ‘Peinta pura-pura tovau lakina da nerasi haitu, naloba-loba, notuda-tuda, nakido-kido, bo nosai-sai. NitunggaiKu nompovia pura-pura haitu sabana nikitaKumo anu nipovia i Laban ka iko. 13 Yakumo Alatala anu neonga nte iko ri ngata Betel. Hamai iko nompatunda sangu vatu pepatora, bo nitolimu lana zaitun ri bavona. Hamai muni iko nojanji nte Yaku. Jadi panggalivomo manjili hau ri ngata nipompoanaka iko.’ ”
14 Jadi nesanamo i Lea bo i Rahel, “Domo maria kakalumana ntuama kami maboli ka kami. 15 Kami hii nisarumakana tosangatanamo. Nipobalunamo kami, bo anu nitarimana lako rahaitu nipakaupuna munimo. 16 Kakalumana anu niala nu Alatala dako nte tuama kami, kakanana majadi kakalumana kami. Poviamo anu niparenta nu Alatala ka iko.”
17-18 Jadi nanggalivomo i Yakub manjili hau nte tuamana ri tana Kanaan. Nisavirakanamo bereina bo ana-anana ri bavo nu unta-unta, bo niirina pura lunu binatana bo pura-pura kakalumana nikavana ri tana Mesopotamia.
19 Tempo haitu, i Laban naria ranggarava nogunji bulu bimbana, bo tempo haitumo i Rahel nompangangga tau-tau anu nisomba ntuamana, anu nisarumakara nombajagai ira sambanua. 20 I Yakub nombaleli matuana, ledo nopalakana ira malai. 21 Ia nangala pura kakalumanana bo nalai mpelino. Ira nevote binangga Efrat bo hau ri bulu Gilead.
I Laban nombaraga i Yakub
22 Da talu eo kaliuna, niuli ntonamo ka i Laban, nalaimo i Yakub. 23 Jadi nipasiromunamo tona naria nte ia bo nosanggani-nggani ira hau nombaraga i Yakub. Pitu eo nituntunira pade nikavara i Yakub nte berei-berina bo ana-anana ri Bulu Gilead. 24 Bongina haitu, nakava Alatala riara mpangipi i Laban, bo nanguli, “Nee mpuu nuompanaka i Yakub, nau aga nte sambela tesa.”
25 Tempo haitu i Yakub notenda ri Bulu Gilead. Nakava i Laban bo tona naria nte ia, ira nompataka tendara napara ri sia. 26 Naliu haitu nangulimo i Laban ka i Yakub, “Nakuya bo nibagiumuka yaku, bo nanggeni mpalai ana-anaku, mpo tona nitavani? 27 Nakuya nibagiumuka yaku bo nalai nggalino, ledo nopalakana? Ane rapana iko nopalakana, tantu mami kupopolipa iko nte sana nu rara bo musi rabana bo kacapi! 28 Ledo nidekeimu tempo ka yaku mombaeki ana-anaku bo tupu-tupuku majadi tanda pogaata. Nadoyo mpuu poviamu! 29 Kakanana madaa mpuu kupovia ka iko, tapi ribongi Alatala nisomba ntuamamu nanguli ka yaku nee mpuu mangompanaka iko. 30 Nisaniku iko nalai sabana iko madota mpuu manjili ri banua ntuamamu. Tapi nakuya iko nompangangga tau-tau nisombaku lako ri banuaku?”
31 Naliu haitu, nesanamo i Yakub, “Yaku nalai nggalino, sabana naeka ka komiu mombataamaka ana bo tupumiu. 32 Ane rakavamiu saito topangangga tau-tau haitu, ia rahuku mate. Paresamo, bara maria anumiu ri sii. Ane maria, alamo. Tona nte yaku bo tona nikenimiu ri sii mamala mombasabikina.” Ledo nisani i Yakub, i Rahel nangala tau-tau haitu.
33 Jadi haumo i Laban ri tenda i Yakub bo nombaparesana. Naliu haitu pade hau ia ri tenda i Lea bo ri tenda nu batua randua haitu. Tapi tau-tau haitu ledo ria nikava. Jadi kaupuna ia nesua ri tenda i Rahel. 34 Dopame nesua tuamana ri tendana, i Rahel nangala tau-tau haitu bo nisuarakana ri pateke nu unta, bo ia mboto nonturo ri pateke haitu. I Laban nombagarunggesi njumangu tenda i Rahel, tapi ledo nikavana tau-tau haitu.
35 Jadi nangulimo i Rahel ka tuamana, “Nee marau, tata, yaku ledo namala meangga mantomunaka komiu, sabana yaku da nasimbunga.” I Laban nangelo pakabelo, tapi ledo nikavana tau-tauna.
36 Jadi naraumo i Yakub bo nekutana, “Kadaa nuapa nipoviaku? Nuapa salaku sampe komiu nombaraga yaku? 37 Hitupa, naupu nomparesa pura-pura mbara-mbaraku, nikavamiu tau-taumiu? Suvuraka anu tutu bo dika ri sii, ala tona nikenimiu bo tona naria nte yaku manggitana bo mombabotusi isema nakana kita randua.
38 Ropulu mpae yaku nonturo nte komiu. Binatamiu dopa ria natonju anana, bo dopa naria sangua tovau bara bimba lakina nikandeku. 39 Nau anu namate nisaka binata nasingi, ledo ria nikeniku ka komiu, tapi yaku mboto nombasambeina. Anu nipangangga ntona tempo bongina, komiu nombatudu yaku mombasambeina. 40 Nandasa yaku ri kapane nu eo bo naranindi ri bongina, bo naria muni sampe ledo namonjo. 41 Ivehaitumo katuvuku ropulu mpae kasaena nokarajaa ka komiu! Sapulu pata mpae yaku nokarajaa ala manggava randua anamiu hitu, bo ono mpae vai nokarajaa ala manggava tovau bo bimba hitu. Bo sampe sapulu ngganimo komiu nombabaliki tamboku. 42 Ane rapana yaku ledo nisaliku nu Alatala nisomba ntotuaku, haitumo Tupu nitoiya i Abraham bo i Ishak, tantu komiu mompopalai nggoo yaku. Tapi Alatala nompariara kasusaku, bo pokarajaa nituiku. Ribongi nidekeiNamo kabotuNa riara mpangipimiu.”
Pojanji i Yakub bo i Laban
43 Jadi nesanamo i Laban ka i Yakub, “Mombine randua tutu anaku, anara tupuku, bo lunu bimba bo tovau tutu anuku muni. Kakanana, pura-pura anu nipeintamu ri sii, anuku. Tapi yaku ledo mamala movia nuapa-nuapa mombataha ana bo tupuku. 44 Sabana haitu, kamai kita movia pojanji bo mombasunju vatu tanda pojanji hitu.”
45 Naliu haitu, niala i Yakubmo sangu vatu bo nipatundana majadi vatu pepatora. 46 Pade nituduna tona nte ia mompasiromu vatu bo mombatambunakana. Naliu haitu nangande singgani-ngganimo ira napara vatu nitambunaka haitu. 47 I Laban nompoposanga vatu nitambunaka haitu: Yegar-sahadutaa, bo i Yakub nompoposangana Galed.b
48 Nangulimo i Laban ka i Yakub, “Vatu hitu majadi pepatora ka kita randua.” Haitumo sabana ngata haitu nipoposanga ngata Galed. 49 Ngata haitu nipoposanga muni Mizpac sabana i Laban nanguli muni, “Damo TUPU mompetiro naupa kita nosinggavaoni.” 50 Nanguli vai i Laban, “Ane iko movia madaa ka ana-anaku, bara mompoberei mombine ntanina, naupa ledo ria tona mangisanina, toramo, Alatala mompetiro kita.”
51 “Hitumo vatu nitambunaka, bo tutumo vatu pepatora. 52 Vatu nitambunaka hitu, bo vatu pepatora tutu mompopatora kita, yaku ledo mamala mombaliunaka vatu nitambunaka hitu mombaeva iko, bo iko muni ledo mamala mombaliunaka vatu pepatora bara vatu nitambunaka hitu mangeva yaku. 53 Tupu nisomba i Abraham bo tuamaku i Nahor majadi topotangara kita.”
Jadi nojanjimo i Yakub ante sanga nTupu nisomba ntuamana i Ishak, ala mompakaroso janjina. 54 Ia nombasambale sangu binata nipesombana ri bulu haitu. Pade nigagana tona naria nte ira mangande singgani-nggani. Naupupa nangande, naturumo ira ri bulu haitu. 55 Kamaile mpadondona, i Laban nombaeki anana bo tupuna, nomperapi rasi bo belo ka ira pade nanjili hau ri ngatanamo.