30
Tapi i Rahel dopa noana. Sabana haitu, nasiriati ia nanggita tuakana, bo niulikana i Yakub, “Popoana yaku, ane ledo, mamate yaku.”2 I Yakub narau ka i Rahel bo nanguli, “Yaku hii ledo Alatala. Iamo novia iko ledo nanggava ngana.”
3 Jadi nangulimo i Rahel, “Hitu batuaku i Bilha. Peroukamo ia ala ia moana. Bara aga ivesia yaku mamala majadi tina nu anana.”
4 Pade nidekeinamo i Bilha ka bereina. Jadi nosimperoumo i Yakub ante batua haitu. 5 I Bilha natiana bo noanaka saito ngana langgai. 6 Nangulimo i Rahel, “Nanoa Alatala notangara yaku. NiepeNa posambayaku bo nidekeiNa saito ngana langgai ka yaku.” Pade nipoposangana ngana haitu i Dana.
7 Naliu haitu natiana vai i Bilha bo noana vai saito ngana langgai. 8 Nangulimo i Rahel, “Santanga matemo yaku nompasimbuku nombaeva tuakaku, bo yaku padagi.” Sabana haitu nipoposangana ngana haitu i Naftalib.
9 Nisanipa i Lea, ia domo moana hanupa, nidekeinamo batuana i Zilpa ka i Yakub, rapobereina. 10 I Zilpa noanaka saito ngana langgai. 11 Nangulimo i Lea, “Nauntu yaku,” pade nipoposangana ngana haitu i Gad. c
12 Naliu haitu, noana vai i Zilpa saito ngana langgai, 13 bo nangulimo i Lea, “Nasana mpuu yaku! Hitupa pura-pura mombine manguli yaku nasana.” Sabana haitu nipoposangana ngana haitu i Asyer. d
14 Nakava tempo mpokato gando, i Ruben hau ri karava bo nikavana sangaya pakuli bo nikenina ka tinana, i Lea. Nangulimo i Rahel ka i Lea, “Dekei ka yaku sakide pakulie anu nikava nu anamu tutu.”
15 Nesana i Lea, “Dopa tano nagana nialasimu bereiku? Bo hitupa muala vai pakuli nikava nu anaku?”
Nangulimo i Rahel, “Ane mudekei ka yaku pakuli tutu, mamala iko momperouka i Yakub bongi hitu.”
16 Tempo i Yakub nanjili lako ri karava nggoviana haitu, nitomunaka i Leamo i Yakub bo nanguli, “Paturu nte yaku bongi hitu, apa nibayarikumo iko ante pakuli nikava nu anaku.” Jadi i Yakub nosimperou nte i Leamo bongi haitu.
17 Alatala nompoiyo posambaya i Lea, jadi natiana vaimo ia bo noanaka ngana langgai kaalimana. 18 Nangulimo i Lea, “Alatala nombadekei ka yaku tambo sabana yaku nombadekei i Zilpa ka bereiku.” Sabana haitu, nipoposangana anana i Isakhar.f
19 Natiana vai i Lea bo noanaka ngana langgai kaaonona. 20 Nanguli ia, “Alatala nombadekei ka yaku pedekei nabelo mpuu. Hitupa bereiku mompotove yaku, sabana yaku nompoanaka aono ngana langgai.” Sabana haitu, nipoposangana anana i Zebulon. g
21 Naliu haitu, noana vai i Lea saito ngana mombine anu nipoposangana i Dina.
22 Alatala nombatora i Rahel. Ia nompoiyo bo nompakadupa posambayana bo nompopoana ia. 23 Natianamo i Rahel bo noanaka saito ngana langgai. Nangulimo i Rahel, “Nipakalipo nu Alatalamo kasusaku. 24 Perapi doa TUPU mombadekei saitopa vai ngana langgai ka yaku.” Sabana haitu, nipoposangana ngana haitu i Yusuf. h
Posintuvu i Yakub bo i Laban
25 Naliu i Rahel noanaka i Yusuf, nangulimo i Yakub ka i Laban, “Dekeimo yaku manjili hau ri ngataku. 26 Palambamo yaku malai manggeni bereiku randua bo ana-anaku. Ira nikavaku sabana yaku nokarajaa nte komiu. Nisanimiu yaku nompasimbuku mpuu nokarajaa.”
27 Nangulimo i Laban ka ia, “Nepa ruru. Panguli dala mpeboto, TUPU nombadekei rasi ka yaku sabana iko. 28 Ulimo sakuya muperapi.”
29 Nesana i Yakub, “Nisanimiu mbotomo yaku nompasimbuku mpuu nokarajaa, bo binatamiu nadeamo sabana pompiaraku. 30 Dopame nakava yaku, mbara-mbaramiu dopa nadea, tapi hitupa nakalumanamo komiu. TUPU nombadekei rasi ka komiu sabana yaku. Jadi maipia yaku mokarajaa ka pobanuaku mboto?”
31 Nangulimo i Laban, “Jadi nuapa tano kudekei ka iko?”
Nesana i Yakub, “Domo radekei nuapa-nuapa. Yaku mompiara binatamiu, asaa rapoiyomiu panggavaku hitu: 32 Dekeimo yaku eo hitu molipa ri tatanga nu lunu pura-pura binatamiu, bo mangala ana-ana bimba navuri, bo muni tovau loba bo nakido. Aga haitu pomperapiku. 33 Jadi nggapurina rasanimiumo ngena yaku, bara nanoa bara ledo. Ane rakavamiu bo raparesamiu yaku, bo rakitamiu maria tovau ledo naloba, bara bimba ledo navuri, rasanimiumo binata haitu nipanganggakumo.”
34 Nesana i Laban, “Kupoiyomo anu niulimu tutu. Siamo rapoviata!” 35 Tapi eo haitu i Laban nombagaaraka ka ia mboto ruru pura-pura tovau naloba, nakido, bo anu naloba puti. Ia nombagaaraka muni pura-pura bimba vuri pade nituduna ana-anana mboto mompoevu makavao binata haitu [ala ledo rapeinta i Yakub]. 36 Nalaimo ira nanggeni binata haitu nombakavaosi i Yakub, kakavaona talu eo kasaena molipa.
Labina bimba i Laban naboli, nipoevu i Yakub.
37 I Yakub nangala talu ngaya tinggu kayu bo nilepasina kulina sampe naloba nikita isi kayu naputi. 38 Kayu nilepasi kulina haitu nidikana ri ngayo panginu nu binata, sabana binata-binata nipokonona nosirasi tempo nanginu. 39 Jadi ane binata haitu nosirasi ri ngayo nu kayu haitu, anana maloba, mosai-sai bara makido. 40 Naliu haitu nitaniaka i Yakubmo ana-ana nu bimba bo tovau haitu ka ia mboto. Binata ntanina nipopatingayokana binata i Laban. Ivesiamo ia nompakadea bimba bo tovauna mboto, bo nitaniakana binata gahaitu lako ri binata i Laban. 41 Ane binata besina da naroso ranja mposirasi, nidikanamo kayu nilepasi kulina haitu ri ngayora riara panginura. 42 Tapi ledo nidikana kayu haitu ri ngayo binata nalupe. Jadi, nasae-sae, pura-pura bimba naputi bo tovau ledo naloba, nalupe puramo. Bo haitumo bagia i Laban. Pura-pura bimba naburi, tovau naloba bo nakido haitu nipoanaka lako ri binata naroso, bo haitumo binata i Yakub. 43 Ivesiamo i Yakub najadi nakalumana mpuu. Nadeamo tovauna, bimbana, untana, jarana, bo nadea muni batua-batuana mombine bo langgai.