I Yakub nakava ri banua i Laban
29
I Yakub nompapola polipana hau ri ngata-ngata bagia mpadake tana Kanaan. 2 Sampesanika nikitana sangu buvu ranggarava, bo naria tatalu lunu bimba naturu napara buvu anu nabiasa nipompainu binata. Buvu haitu nitutui vatu mbaso. 3 Ane nasiromu puramo lunu binata ri buvu haitu, topoevu nombagoliaka vatu haitu ri sabinggana, pade nipainura binata. Naupu haitu pade nitalodura vai.4 Nekutanamo i Yakub nte topoevu naria risia, “Hee roa, lako riumba komiu?”
Nesana ira, “Lako ri ngata Haran.”
5 Nekutana vai i Yakub, “Nisanimiu, i Laban tupu i Nahor?”
Nesana ira, “Nisani kami.”
6 Nekutana vai i Yakub, “Berimbamo karebana?”
Nesana ira “Nabelo-belo. Peintamo, tutu anana mombine nosanga i Rahel, ia nakava nanggeni binata ntuamana.”
7 Nangulimo i Yakub, “Da nalanga eo bo dopa tempona binata rasua riara gimpu. Nakuya ledo rapainumiu binata tutu, bo rapalambamiu vai mangande kavoko?”
8 Nesana ira, “Kami dopa mamala mompainu binata ane dopa masiromu pura.”
9 Da notesa i Yakub nte ira, nakavamo i Rahel nte lunu bimba ntuamana, apa i Rahel topoevu. 10 Tempo i Yakub nanggita sampesuvuna i Rahel ante lunu bimba haitu, haumo ia ri buvu, bo nombaduliaka vatu potaloduna bo nompainu binatana. 11 Pade niekinamo i Rahel [mpo sampesuvu], bo notumangi sabana nadamba. 12 Niulinamo ka i Rahel, “Yaku ana i Ribka, tuei ntuamamu.” Naupu haitu nangovamo i Rahel hau ri banuana bo nitesana anu haitu ka tuamana.
13 Tempo i Laban nangepe kareba i Yakub, pinoanana haitu, ia kaliu-liu nangova mombatomunaka i Yakub. I Laban nombakapui bo nombaeki i Yakub, pade nikenina nesua riara banua. Naupupa i Yakub notesa pura-pura karebana ka i Laban, 14 nangulimo i Laban, “Nakana mpuu, iko nosampesuvu nte yaku.” I Yakub nonturo ri banua i Laban sambula.
I Yakub nokarajaa ala mamala moberei nte i Rahel bo i Lea
15 Naria saeo, nangulimo i Laban ka i Yakub, “Ledo masipato iko mokarajaa ka yaku ane ledo maria tambo, nau iko sampesuvuku. Jadi sakuya tambo mupokono?”
16 I Laban noana randua ngana mombine, lumbua nosanga i Lea, bo tuei nosanga i Rahel. 17 I Lea, matana nagaya, tapi i Rahel nabelo pokarona bo nelabipa kagayana. 18 I Yakub nompokono i Rahel. Sabana haitu, ia nesana ka i Laban, “Yaku madota mokarajaa pitu mpae kasaena ane radekeimiu yaku mompoberei i Rahel.”
19 Nangulimo i Laban, “Agina ia kudekei ka iko pade ka tona ntanina; jadi ponturo ri siimo.” 20 Jadi pitu mpae i Yakub nokarajaa ala mamala moberei nte i Rahel, bo nirasaina pitu mpae haitu aga bara sako eo, sabana pompokonona randaa haitu.
21 Naliu haitu, nangulimo i Yakub ka i Laban, “Naliumo pitu mpae. Popobereimo yaku nte anamiu.” 22 Jadi nipovia i Labanmo posusa poberei bo nombagaga pura-pura tona ri ngata haitu. 23 Tapi bongi haitu, ledo i Rahel nikeni i Laban ka i Yakub aga i Lea, bo i Yakub nosimperou nte i Lea. 24 (I Laban nombadekei batuana mombine nosanga i Zilpa, rapobatua i Lea).
25 Kamailena pade nisani i Yakub ledo i Rahel nipobereina, tano mai aga i Lea! Jadi haumo i Yakub nantingayo i Laban bo nanguli, “Nakuya nipoviakamiu ivehitu yaku? Yaku nokarajaa ala manggava i Rahel. Nakuya nibagiukamiu yaku?”
26 Nesana i Laban, “Nangoseaka ada ri sii, tuei ledo mamala moberei mokolu pade tuakana. 27 Pakaliu pitu eo posusa, pade kudekei muni i Rahel mupoberei, asaa madota iko mokarajaa pitu mpaepa vai.”
28 I Yakub nompoiyona. Bo naliupa pitu mbongi posusa haitu, nidekei i Labanmo i Rahel rapoberei i Yakub. 29 (I Laban nombadekei batuana mombine anu nosanga i Bilha, rapobatua i Rahel.) 30 I Yakub nosimperou nte i Rahel muni, bo nipotovenapa i Rahel pade i Lea. Jadi nokarajaa vai ia pitu mpaepa ka i Laban.
Ana-ana i Yakub
31 Tempo TUPU nompeinta i Lea ledo nipotove mpo i Rahel, Ia nompopoana i Lea, tapi i Rahel nagampa. 32 I Lea natiana bo noanaka saito ngana langgai. Niulina, “Nipeinta nTUPU kasusaku, bo hitupa bereiku mompotove yaku.” Jadi nipoposangana anana haitu i Rubena.
33 I Lea natiana vai bo noanaka saito ngana langgai. Nangulimo i Lea, “Nidekei nTUPU ngana hitu ka yaku sabana nisaniNamo yaku ledo nipotove.” Jadi nipoposangana anana haitu i Simeonb.
34 I Lea natiana vai bo noanaka saito ngana langgai. Niulina, “Hitupa bereiku melabipa katesoona nte yaku sabana yaku noana tatalumo ngana langgai.” Pade nipoposangana anana haitu i Lewic.
35 Sangganipa vai i Lea natiana bo noanaka saito ngana langgai. Niulina, “Hitupa kutoiya Alatala.” Bo nipoposangana anana haitu i Yehuda.d Naliu haitu domo noana hanupa i Lea.