I Yakub Nitudu Hau nte i Laban
28
Naliu haitu, i Ishak nompokio bo nomperapi rasi bo belo ka i Yakub, bo nanguli, “Nee iko moberei nte randaa ntoKanaan. 2 Koimo ri tana Mesopotamia (Padan-Aram), ri banua ntupumu i Betuel, bo pobereimo saito ana manggemu i Laban. 3 Kuperapi Alatala anu Nambaso Kakuasana mombadekei rasi bo belo riara mponjambokomu bo mombadekei ana bo muli madea, sampe iko majadi tuama madea ngata mbaso! 4 Kuperapi Tupu mombadekei rasi bo belo ka iko bo ka mulimu mpo Ia nombadekei rasi bo belo ka i Abraham. Bo kuperapi tana nijanji nTupu ka i Abraham, haitumo tana niponturomu hitu, majadi tanamu mboto!”5 Ivesiamo i Ishak nompopanggalivo i Yakub hau ri tana Mesopotamia, ri banua manggena i Laban, ana i Betuel, toAram. I Laban haitu tuaka i Ribka, haitumo tina i Yakub bo i Esau.
I Esau noberei vai
6 I Esau nangepe i Ishak nomperapi rasi bo belo ka i Yakub bo nombatudu ia hau ri tana Mesopotamia mangelo berei ri ngata hamai, bo ia nitagi mobereika mombine ntoKanaan. 7 Nisani i Esau munimo i Yakub nanturusi patuju ntuamana bo tinana sampe ia hau ri tana Mesopotamiamo. 8 Jadi nanotomo rara i Esau bo nisanina i Ishak ledo nompokono mombine Kanaan. 9 Sabana haitu, haumo i Esau nte i Ismael, ana i Abraham, bo noberei nte ana i Ismael anu nosanga i Mahalat, tuei i Nebayot.
Pangipi i Yakub tempo ri ngata Betel
10 I Yakub nalai lako ri ngata Bersyeba hau ri ngata Haran. 11 Nasolomo eo pade nakava ia ri sangu ngata bo nasambongi ri sia. Ia naturu ri sia bo noluna vatu. 12 Ia nangipi, nikitana tangga neangga ri tana bo vuntuna bavona sampe ri suruga bo malaeka nanau pene ri tangga haitu. 13 Bo neanggamo TUPU ri sinjorina bo nanguli, “Yakumo TUPU Alatala nisomba ntupumu i Abraham bo ntuamamu i Ishak. Yaku mombadekei tana nipaturumu hitu ka iko bo ka mulimu. 14 Mulimu majadi madea mpo kadea avu ri tana. Ira mompakaluo ngatara natiku sulapana. Yaku mombadekei rasi bo belo ka pura-pura manusia ri dunia sabana iko bo mulimu. 15 Toramo, Yaku mombatulungi bo mombasaliku iko riumba-umba mukalau. Yaku manggeni iko manjili ri ngata hitu. Ledo Kupalaisi iko sampe Kupovia pura anu nijanjiKu ka iko.”
16 Jadi nematamo i Yakub bo nanguli, “Alatala mpuu-mpuu naria ri sii, ri ponturo hitu! Dako hitu pade nisaniku!” 17 Jadi naekamo ia bo nanguli, “Nabaraka mpuu ponturo hitu! Tantu mami hitu banua nu Alatala, vamba nu suruga.”
18 Kamaile mpadondona ntoto, nembangumo i Yakub, bo nialanamo vatu anu nipolunana bo nipatundana majadi vatu pepatora. Nitolina lana zaitun ri bavo vatu haitu ka Alatala. 19 Ponturo haitu nipoposangana ngata Betel a (nggaulu sangana ngata Lus).
20 Naupu sia i Yakub nojanji nte TUPU ivei: “Ane rakeniMiu bo rajagaiMiu yaku riara mpolipaku hitu bo mombadekei baju bo anu rakande ka yaku 21 sampe yaku masalama manjili ri banua ntuamaku, 22 Komiu majadi Tupuku. Yaku matundu nte Komiu bo anu nikavaku lako nte Komiu, kudekei ka Komiu sangu bagia lako ri sapulu bagia. Vatu nipatundaku hitu majadi banuaMiu bo rapake mombadekei pesomba ka Komiu.”