I Ishak nerapi belo ka i Yakub
27
Tempo i Ishak natuamo bo matana navundomo, sampe domo nekita, nipokionamo i Esau, ana lumbuana, bo niulikana, “Umbamo iko, anaku?”Nesana i Esau, “Sii yaku, tata.”
2 Nangulimo i Ishak, “Peintamo, yaku natuamo, domo masae yaku matuvu. 3 Jadi alamo panamu nte matana. Koimo ranggarava bo pana ka yakumo sambaa binata. 4 Pakangongo ka yakumo uta rasa, mpo anu nipokonoku. Maliu haitu keni ka yakumo, ala kukande bo kudekei rasiku ka iko dopame yaku mamate.”
5 Tapi niepe i Ribka tesa bereina nanguli ka anana i Esau. Haupa i Esau nopana binata ranggarava ka tuamana, 6 nangulimo i Ribka ka anana i Yakub, “Niepeku tuamamu nanguli ka tuakamu, i Esau ivei: 7 ‘Alamo sambaa binata bo poriapu ka yaku uta rasa, ala kukande. Maupu mangande, kudekeimo rasiku ka iko dopame yaku mamate.’ ”
8 Jadi notesa vai i Ribka ka i Yakub, “Epemo jaritaku kuparenta ka iko. 9 Koi ala roangu ana ntovau naboya ri pomboli bimba bo tovauta. Kuporiapu majadi uta rasa ka tuamamu, mpo anu nipokonona. 10 Kenimo uta haitu ka tuamamu, ala rakandena, bo maupu mangande, radekeinamo rasi ka iko, dopame ia mamate.”
11 Nanguli i Yakub ka tinana, “Tapi i Esau nobulu karona, bo yaku hii kuliku nalusu. 12 Bara raperera ntuamaku, raulina yaku nombabagiu ia. Ane ivesia, yaku aga rapindasina bo ledo radekeina rasi.”
13 Tapi tinana nanguli, “Yakumo manjimbuaka silaka tutu, anaku. Epemo jaritaku, koimo ala tovau ria.”
14 Jadi hau mpuumo ia nangala tovau bo nikenina ka tinana. Naliu haitu niporiapu ntinanamo pakarasa, mpo anu nipodamba ntuamana. 15 Niala i Ribkamo pakea-pakea gaya i Esau, ana lumbuana, pakea nibolina ri banua, bo nipasuakana i Yakub, anana kaupu. 16 Bo kulimba nu ana ntovau haitu nibonggosikana ntimali-mali pale bo tambolo i Yakub anu ledo nobulu haitu. 17 Naupu haitu, nidekeinamo uta bo roti niporiapuna ka i Yakub.
18 Jadi i Yakub nanggeni pangande haitu hau nte tuamana, bo niulina, “Tata!”
Nesana Ishak, “Isema iko, i Esau atau i Yakub?”
19 Nesana i Yakub, “Esau, anamiu lumbua. Petudumiu nipoviakumo. Pembangumo bo kandemo bau poasuku nikeniku hitu, ala raperapimiu rasi bo belo ka yaku.”
20 Nangulimo i Ishak, “Nasalisa mpuu iko nouli, anaku.”
Nesana i Yakub, “Sabana TUPU Alatala nisombamiu nombatulungi yaku.”
21 Pade nangulimo i Ishak ka i Yakub, “Katumai. Mapara sii nte yaku ala kuperera iko. Nakana mpuu iko i Esau?”
22 Nikaparai i Yakubmo tuamana. Bo tuamana nomperera ia bo nanguli, “Suaramu mpo suara i Yakub, tapi palemu mpo pale i Esau.” 23 Domo nisani i Ishak anana i Yakub, sabana palena nobulu mpo pale i Esau. Tapi dopame niperapina rasi bo belo ka i Yakub, 24 nipekutanana sangganipa, “Nakana mpuu iko i Esau?”
Nesana i Yakub, “Nakana.”
25 Pade nangulimo i Ishak, “Dekei ka yaku bau nipoutamu tutu. Maupu yaku mangande pade kuperapi rasi bo belo ka iko.”
Nidekei i Yakubmo bau haitu ka ia bo anggur sakide rainuna. 26 Naupu haitu nangulimo tuamana, “Kapara tumai, anaku, bo ekimo yaku.”
27 Jadi i Yakub nanggaparai bo nombaeki ia. I Ishak nombaenga soa baju i Esau, pade niperapina rasi bo belo ka ia. Nanguli i Ishak,
“Soa nu anaku navangi
mpo soa nggarava nipoporasi nu Alatala.
28 Alatala mombadekei ka iko leni bo uda lako ri laerava,
bo mompakaboya tuda-tuda ri taluamu!
Ia mombadekei gando
bo anggur mpelabi-labi.
29 Todea-todea nu ngata majadi batuamu,
bo madea tona matundu ri ngayomu.
Iko mombakuasai sampesuvumu,
bo muli ntinamu matundu nte iko.
Isema-sema mombapindasi iko, ia masilaka.
Isema-sema momperapi rasi bo belo ka iko, ia rapoporasi.”
I Esau nerapi rasi bo belo nte i Ishak
30 Naupupa i Ishak nerapi rasi bo belo ka i Yakub, nalaimo i Yakub. Dako nalai ntoto ia, nakavamo tuakana i Esau, nanjili lako ri poasuna. 31 Ia muni nomporiapu uta rasa bo nikenina ka tuamana bo nanguli ivei, “Pembangumo, tata, bo kandemo bau nikeniku ka komiu, ala komiu mamala merapi rasi bo belo ka yaku.”
32 Jadi nekutanamo tuamana, “Isema iko?”
Nesana ia, “Yaku i Esau, ana lumbuamiu.”
33 Noridi njuma nggaromo i Ishak, bo nekutana, “Ane ivesia, binata poasu isema tano niporiapu bo nikeni ka yaku pangane? Nikandekumo dopame iko nakava. Bo nidekeiku puramo rasi bo belo ka ia, bo rasi haitu majadi rasi ka ia sampe ri kasae-saena.”
34 Nangepe tesa haitu, nongare pakamangga-manggamo i Esau bo nabuku mpuu rarana, pade niulina, “Perapi muni rasi bo belo ka yaku, tata!”
35 Nesanamo i Ishak, “Tueimu nakava nombabagiu yaku. Rasi bo belo anu kakanana kuperapi ka iko, nte iamo.”
36 Nangulimo i Esau, “Karongganina hitumo yaku niakalanina. Masipato sangana i Yakuba! Nte iamo kalumbuaku, bo hitupa nte iamo rasi bo belo bagiaku. Domo naria rasi bo belo ntanina ka yaku?”
37 Nesanamo i Ishak, “Nipajadikumo ia majadi tona mompobatua iko, bo pura-pura ana nu sampesuvuna rapajadina batuana. Nidekeiku ka iamo gando bo anggur. Jadi hitupa domo ria anu mamala kupovia ka iko, anaku!”
38 I Esau ledo nenonto nerapi rasi bo belo dako nte ntuamana, “Aga saito manggava rasi bo belomiu, tata? Perapi muni ka yaku, tata!” bo notumangimo ia.
39 Pade nangulimo tuamana ka ia,
“Ledo maria leni bo uda lako ri laerava ka iko,
ledo maria tuda-tuda maboya ri taluamu.
40 Iko matuvu lako ri gumamu, bo majadi batua ntueimu.
Tapi ane monasu iko, makabasaka lako ri kakuasa ntueimu.”
41 Jadi nakodimo rara i Esau nte tueina sabana tuamana nomperapi rasi bo belo ka i Yakub, tueina. Nipekirina, “Domo masae tuamaku mamate bo maupu posusa kamatena, kupatesi i Yakub!”
I Ishak nombatudu i Yakub hau nte i Laban
42 Niepepa i Ribka nia i Esau, nipokionamo i Yakub bo niulikana, “Epe, tuakamu i Esau nonia mombabalasi pokainggumu bo mompatesi iko. 43 Turusimo anu kuuli hitu. Koimo masalisa hau nte tuakaku i Laban ri ngata Haran, 44 bo ponturo nte iamo bara sakuya kasaena, sampe rau rara ntuakamu moura. 45 Ane rakalingasinamo anu nipoviamu ka ia, pade kutudu tona mangala iko tumai. Ledo madota yaku komiu randua mamate singgani ri eo saeo.”
46 Jadi haumo i Ribka nanguli ka i Ishak, “Nasau raraku nanggita berei i Esau toHet.b Ane i Yakub moberei nte mombine toHet, agina mamatemo yaku.”