I Ishak nonturo ri ngata Gerar
26
Ri ngata haitu najadi vai tempo nggaara, mpo anu najadi tempo i Abraham bara ipia. I Ishak hau nosinggava nte i Abimelekh, magau ntoFilistin ri ngata Gerar, bo nerapi monturo ri ngata haitu. 2 Haitu nipoviana sabana Alatala neonga nte i Ishak bo nanguli, “Nee hau ri tana Mesir. Ponturomo ri tana hitu, eva niuliKu ka iko. 3 Yaku mombasaliku iko bo mombadekei rasi bo belo ka iko. Njumangu tana hitu Kudekei ka iko bo ka mulimu. Yaku mompakadupa pojanji nidekeiKu ka tuamamu i Abraham. 4 Yaku mombadekei muli madea ka iko bo kadeara mpo betue ri langi, bo njumangu tana hitu Kudekei ka ira. Pura-pura tona ri dunia manggava rasi bo belo lako nte Yaku sabana anu rapovia saito nu mulimu. 5 Yaku movia ivehaitu, sabana i Abraham nangoseaka dotaKu bo nombaturusi parentaKu.” 6 Jadi i Ishak naroo ri ngata Gerar.7 Tempo tona ri ngata haitu nompekutana i Ribka, i Ishak nanguli i Ribka haitu tueina, ledo bereina. I Ishak naeka ka tona mompatesi ia bo mangala i Ribka, apa ia nagaya.
8 Bara sakuya kasaena ira nonturo ri sia, naria saeo i Abimelekh magau toFilistin, nelioda lako ri pelabana, bo nipeintana i Ishak nosieki-eki nte i Ribka. 9 Jadi nipokio i Abimelekhmo i Ishak bo niulina, “Bereimu tano mombine hitu! Nakuya bo niulimu ia tueimu?”
Nesana i Ishak, “Nipekiriku yaku rapatesi ane kuuli ia bereiku.”
10 Nanguli i Abimelekh, “Nakuya nipoviamuka ivehaitu kami? Ane rapana saito lako ri todeaku mosampaturu nte bereimu, natantumo iko mompakasilaka kami!”
11 Naliu haitu niparenta i Abimelekhmo todeana ivei, “Isema-sema mombagado tona hitu bara bereina, rahuku mate.”
12 I Ishak notalua ri ngata haitu, bo mpae haitu nanggava asele saatu nggani petumbuna lako ri savua nisavuna, sabana TUPU nombadekei rasi ka ia. 13 Kakalumanana nantambai kadeana sampe nakalumana mpuu ia. 14 Jadi toFilistin nasiriati nanggita ia sabana ia nobatua dea, nobimba bo nojapi dea. 15 Jadi niivura ntana buvu anu nikae nu batua i Abraham tempo ia da natuvu.
16 Naliu haitu nangulimo i Abimelekh ka i Ishak, “Palaimo lako ri ngata kami. Nakuasa gagamo iko pade kami.”
17 Jadi nalai mpuumo i Ishak bo notenda ri Lemba Gerar. Ri siamo ia nonturo bara sakuya kasaena. 18 Hamai naria buvu-buvu nikae tempo i Abraham. Namatepa ia, niivusi ntoFilistinmo. Nikae i Ishak mpanjili buvu gahaitu bo nipoposangana sanga nidekei ntuamana.
19 Batua-batua i Ishak nombakae buvu baruna ri Lemba Gerar bo nikavara mata uve, naoge mpuu uvena. 20 Tapi topoevu-topoevu ri ngata Gerar nosinggarau nte topoevu binata i Ishak. Nanguli ira, “Uve hitu, uve kami!” Sabana haitu, i Ishak nompoposanga buvu haitu Buvu Esek, batuana “Posinggarau”.
21 Jadi batua-batua i Ishak nombakae buvu ntanina vai, bo niposinggaraukara muni buvu haitu. Sabana haitu, i Ishak nompoposanga buvu haitu Buvu Sitna, batuana “Posipobali.” 22 Naliu haitu nolinjamo ia lako ri ponturona haitu bo nokae buvu katataluna. Pokaena haitu ledo najadi posinggarau. Sabana haitu, i Ishak nompoposanga buvu haitu Buvu Rehobot, batuana “Kalogana”. Niulina, “Hitu-hitu TUPU nombadekei ka kita loga monturo ri ngata hitu, bo masana kita ri sii.”
23 Naupu sia haumo i Ishak ri ngata Bersyeba. 24 Bongina haitu TUPU neonga nte ia bo nanguli, “Yakumo Alatala nisomba ntuamamu i Abraham. Nee maeka. Yaku momporoa iko. Yaku mombadekei rasi ka iko bo mombadekei muli madea sabana pojanjiKu ka batuaKu i Abraham.”
25 Naliu haitu, nisunju i Ishakmo vatu rapovia lanta pesomba bo nisombanamo TUPU ri sia. Ia notenda ri sia bo batuana nombakae buvu ntanina.
Pojanji i Ishak bo i Abimelekh
26 Naria saeo, Magau Abimelekh, i Ahuzat topodekei panggava ka ia, bo i Pikhol tadulako ntantarana, nakava lako ri ngata Gerar mosintomu ka i Ishak. 27 Nekutanamo i Ishak, “Nakuya komiu tumai mosintomu ka yaku? Baipia komiu nompopalai yaku lako ri ngatamiu!”
28 Jadi nesanamo ira, “Hitupa nisani kamimo TUPU nombatulungi iko. Jadi aginamo kita movia pojanji. 29 Pojanjimo iko ledo movia anu madaa ka kami, nasimbayu eva kami muni dopa sanggania novia anu nadaa ka iko. Kami nabelo nte iko bo nompalamba iko nalai nasana. Jadi nalantomo ka kami, TUPU nombadekei rasi bo belo ka iko.”
30 Naliu haitu, i Ishak novia posusa ka ira bo ira nangande bo nanginu. 31 Kamaile mpadondona, ira nojanji bo nosumpa matuvu mosinggabelo. Pade nidekei i Ishakmo ira nalai nabelo.
32 Ri eo haitu muni batua i Ishak nakava notesaki buvu nikaera. Niulira, “Nikava kamimo uve!” 33 Pade nipoposanga i Ishak buvu haitu Buvu Syeba, batuana “Buvu Pojanji”. Haitumo pamulana, ngata haitu nipoposanga ngata Bersyeba.
Berei-berei i Esau lako ri sangatana
34 Tempo i Esau noumuru patapulu mpae, ia nompoberei randua mombine toHet, haitumo i Yudit ana i Beeri, bo i Basmat ana i Elon. 35 Mombine randua haitu nompakasusa katuvu nu matuara i Ishak bo i Ribka.