Muli i Abraham lako nte bereina ntanina
(Tav. 1:32-33)
25
Naupu sia i Abraham noberei vai saito mombine anu nosanga i Ketura.
2 Bereina haitu noanaka i Zimran,
i Yoksan,
i Medan,
i Midian,
i Isybak bo i Suah.
3 I Yoksan noanaka i Syeba bo i Dedan.
I Dedan nomulika toAsyur,
toLetus,
bo toLeum.
4 I Midian noanaka:
i Efa,
i Efer,
i Henokh,
i Abida bo i Eldaa.
Haitu pura muli i Ketura.
5-6 Tempo namate i Abraham,
pura-pura kakalumanana nibolina ka anana i Ishak,
tapi tempo ia da natuvu nidekeina mamimo sabagia ka anana lako ri bereina ntanina,
pade nituduna ira molinja hau ri bagia mpandake tana Kanaan,
ala makavao lako nte anana i Ishak.
I Abraham namate bo nitana
7-8 Umuru i Abraham saatu pitupulu lima mpae.
Ia natua ntotomo pade namate.
9 Ia nitana nu anana i Ishak bo i Ismael,
ri vatu mpobolo ri bagia Makhpela ri bagia mpandake ngata Mamre.
Tana haitu,
tana i Efron nggaulu.
I Efron ana i Zohar,
toHet.
10 Tapi tana haitu niali i Abrahammo lako nte toHet haitu.
I Sara,
berei i Abraham nitana ri sia muni.
11 Namatepa i Abraham,
Alatala nombadekei rasi bo belo ka i Ishak,
ana i Abraham.
Tempo haitu i Ishak nonturo napara buvu anu nipoposanga Buvu Lahai-Roi,
batuana “Ia nompeinta yaku”.
Muli i Ismael
12 I Ismael ana i Abraham bo i Hagar,
mombine dako ri Mesir anu najadi batua i Sara.
13-16 I Ismael noana sapulu randua ngana langgai.
Niuli ri sii nantuntuni sunju mpesuvura:
i Nebayot,
i Kedar,
i Adbeel,
i Mibsam,
i Misyma,
i Duma,
i Masa,
i Hadad,
i Tema,
i Yetur,
i Nafis bo i Kedma.
Anana gahaitu simbo saito najadi magau bo simbo nomparenta ngatara mboto.
Sapulu randua ngata haitu nipoposanga nangoseaka sangara.
17 I Ismael noumuru saatu talupulu mpae pade namate.
18 Mulina nonturo napara dala hau ri Asyur,
ri olo ngata Hawila bo Karava Syur anu napara tana Mesir bagia mpandake.
Ira natuvu nosipobali nte muli i Abraham ntanina.
Pompoanaka i Esau bo i Yakub
19 Iveimo tesa i Ishak ana i Abraham.
20 I Ishak noumuru patapulu mpae tempo ia noberei nte i Ribka,
tuei i Laban,
ana i Betuel toAram lako ri tana Mesopotamia.
21 I Ribka nagampa,
jadi i Ishak nerapi doa nte TUPU ala moana bereina.
TUPU nompoiyo perapi i Ishak,
jadi natianamo i Ribka.
22 Ia natiana rapi,
bo dopame ngana nipoanaka,
ira nosieva riara ntai ntinara.
Nangulimo i Ribka,
“Nakuya anu hitu najadi ri karoku?”
Jadi i Ribka nekutana nte TUPU.
23 TUPU nanguli ka ia,
“Naria randua ngana riara ntaimu.
Ira simbo momulika todea ngata anu mosipobali.
Ngana tuei marosopa pade tuakana,
bo tuaka majadi batua ntueina.”
24 Nakavapa tempona i Ribka moana,
nipoanakanamo randua ngana langgai narapi.
25 Ana lumbua,
nalei-lei kulina bo kulina mpo baju nobulu.
Haitumo sabana ia nipoposanga i Esau.a
26 Tempo anana karanduana nesuvu,
palena nombakingisi tampadu i Esau.
Haitu sabana ia nipoposanga i Yakubb.
I Ishak noumuru onopulu mpae tempo anana nipoanaka.
I Esau nompobalu kalumbuana
27 Ngana randua haitu nantambai kambasona.
I Esau najadi topoasu natau,
bo nipokonona nonturo ranggarava.
Tapi i Yakub natinonto bo nipokonona nonturo ri banua.
28 I Ishak nipotovenapa i Esau,
sabana nipokonona nangande bau nipoasu.
Tapi i Ribka nipotovenapa i Yakub.
29 Jadi naria saeo i Yakub nomporiapu bonji lei,
nakavamo i Esau lako ri poasuna.
Naara mpuu taina.
30 Nangulimo ia ka tueina i Yakub,
“Naara mpuu taiku.
Mai sakide bonji leimu tutu.”
(Haitumo sabana ia nidae muni i Edom.c)
31 Nesana i Yakub,
“Namala,
asaa mudekei ntani kalumbuamu.d”
32 Nangulimo i Esau,
“Rapokuya kalumbua tutu ka yaku?
Santanga matemo naara taiku!”
33 Nanguli vaimo i Yakub,
“Janji ntanimo ruru mudekei kalumbuamu ka yaku.”
I Esau nojanji bo nombadekei kalumbuana ka i Yakub.
34 Naliu haitu,
nidekei i Yakubmo roti bo bonji lei haitu.
I Esau nangande bo nanginu pade nalai.
Jadi ivesiamo i Esau nombasema-sema kalumbuana.