Pomparasaya i Abraham niuji
22
Nambasopa i Ishak,
Alatala nombauji pomparasaya i Abraham.
Alatala nombaronde ia,
“Abraham,
umbamo iko?”
Nesana i Abraham,
“Sii yaku,
Pue.”
2 Alatala nantudu i Abraham,
“Alamo anamu i Ishak,
anu nipotovemu.
Koimo hau ri tana Moria ri sangu bulu Kutuduaka ka iko.
Dekeimo anamu haitu majadi pesomba rapalabu ka Yaku.”
3 Kamaile mpadondona,
i Abraham nasalisa nembangu nobeso kayu [rapopalabu pesomba] bo nipatekena ri bavo keledaina.
Ia ante anana bo batuana randua hau ri bulu nipakatantu nu Alatala ka ia.
4 Katalu eona,
nipentoaka i Abrahammo bulu haitu.
5 Niulinamo ka batuana,
“Maboli ri siimo komiu nte keledai hitu.
Yaku ante anaku hau mombasomba Alatala,
pade manjili tumai nte komiu vai kami ngena.”
6 Niala i Abrahammo kayu rapompalabu pesomba bo nisavirakana ri vinga i Ishak.
Ia mboto nanggeni ladi bo ruti rapompanaki apu.
Jadi nolipamo ira randua.
7 Nangulimo i Ishak,
“Tata!”
Nesanamo tuamana,
“Nuapa,
anaku?”
I Ishak nekutana,
“Nikenitamo ruti bo kayu,
tapi ri umba ana bimba rapesomba ka Alatala?”
8 Nesana i Abraham,
“Anaku,
Alatala mboto mompakasadia ana bimba rapesomba ka Ia.”
Ivesiamo ira randua nompapola polipara.
9 Nakavapa ira ri bulu nituduaka nu Alatala ka i Abraham,
nisunju i Abrahammo vatu rapovia lanta pesomba ri sia bo nisunjuna muni kayu apu ri bavo lanta pesomba.
Nipouna i Ishak,
anana haitu,
pade nidikana ri bavo nu kayu ri lanta pesomba haitu.
10 Naliu haitu,
nialanamo ladi raposambalena anana.
11 Tapi malaeka nTUPU nongare lako ri langi,
“Abraham!
Abraham!”
Nesana i Abraham,
“Sii yaku,
Pue.”
12 Nangulimo TUPU,
“Nemo mupatesi anamu tutu!
Nee mukuya-kuya ia!
NisaniKumo iko neose nte Yaku,
sabana ledo nonggai raramu nombadekei anamu aga saito-itona ka Yaku.”
13 Pade neili i Abraham bo nipeintana sangu bimba lakina ri bengona,
tanduna natekai ri rangga nu kayu natimpo.
I Abraham nangala bimba haitu bo nisambalena pade nipalabuna niposambei anana.
14 Bo nipoposanga i Abrahammo bela nu lanta pesomba haitu Yahweh-Yireh,
batuana “TUPU nompasadia”.
Sabana haitu,
sampe sii-sii tona nanguli,
“Ri bavo bulu nTUPU,
rapasadiaNa anu niparaluuta.”
15-17 Nongare vai malaeka karongganina,
bo niulina,
“TUPU mboto nanguli ivei:
Iko nangoseaka parentaKu bo ledo nonggai raramu nombadekei anamu aga saito-itona ka Yaku.
Sabana haitu Yaku mojanji bo Kupakaroso ante sangaKu mboto,
Kudekei ka iko rasi mpelabi-labi,
bo kadea mulimu ngena masimbayu nte kadea nu betue ri langi bo kadea nu bone ri bivi ntasi,
bo mulimu haitu mombadagi balira.
18 Pura-pura ngata ri dunia manggava rasi,
sabana anu rapovia nu mulimu.
Haitu pura Kupovia sabana iko nomparantaika tesaKu.”
19 Naliu haitu,
nanjilimo i Abraham ntaliana hau nte batuana,
bo nosinggani-nggani ira hau nanjili ri ngata Bersyeba bo naroo hamai vai.
Muli i Nahor
20 Naliu haitu niepe i Abrahammo lelena ivei:
“I Milka,
berei ntuakamu i Nahor,
noana munimo.
Uvalu anana,
langgai pura.
Ngana uvalu gahaitu nosanga:
21 i Us,
ana lumbua;
i Bus,
i Kemuel (anu najadi tuama i Aram),
22 bo muni i Kesed,
i Hazo,
i Pildas,
i Yidlaf bo i Betuel.”
23 I Betuel najadi tuama i Ribka.
Ira uvalu hitu ana i Milka bo i Nahor,
tuaka i Abraham.
24 Bo naria muni berei piara i Nahor,
anu nosanga i Reuma.
Ia muni noana,
sanga anana i Tebah,
i Gaham,
i Tahas bo i Maakha.