I Sara namate bo nitana
23
I Sara natuvu saatu ropulu pitu mpae kasaena,
2 pade namatemo ia ri ngata Kiryat-Arba,
haitumo ngata Hebron,
ri tana Kanaan.
Nabuku mpuu rara i Abraham nantangisi bereina namate.
3 Naliu haitu,
nipalaisi i Abrahammo bereina namate bo ia hau nte toHet,
anu nonturo ri ngata haitu.
Nakava hamai,
nanguli ia,
4 “Sampesuvu,
yaku hii aga topesovo nonturo ri tatangamiu.
Dekeimo tanamiu sakide kuali rapombatana bereiku.”
5-6 Nesana ira,
“Kami nombabila komiu,
pua.
Komiu nonturo ri tatanga kami,
jadi tanamo bereimiu ri dayo tobelona anu naria nte kami.
Kami nadamba mompakasadia dayo ka bereimiu.”
7 Pade nantaputu i Abraham ri ngayora,
8 bo nanguli:
“Ane radekeimiu yaku mombatana bereiku ri sii,
tulungi,
perapi nte i Efron,
ana langgai i Zohar,
9 ala ia mompobalu ka yaku vatu mpobolo ri bagia Makhpela anu nosinjori nte taluana.
Mabelo ane ia mompobalu tana haitu ri sii,
bo rasabikimiu.
Alina kubayari pakagana,
ala tana haitu majadi tanaku mboto.”
10 Tempo haitu muni i Efron mboto naria nonturo nosinggani ante toHet ri posintomu ntona ri bobaa ngata.
Notesamo ia,
nisabiki ntoHet anu naria ri sia,
11 niulina,
“Sampesuvuku sangata nombasabiki talua bo vatu mpobolo haitu kudekei ka komiu ala komiu mamala mombatana bereimiu.”
12 Nantaputumo i Abraham ri ngayo ntodea toHet haitu,
13 bo pura-pura tona nangepe anu niulina ka i Efron ivei:
“Epe tesaku.
Yaku madota mangali njumangu talua haitu.
Tarimamo doina,
ala yaku mamala mombatana bereiku ri sia.”
Nesana i Efron:
“Salibo tana
14-15 alina aga pataatu mpeka doi salaka.
Nuapa batuana haitu ka kita randua?
[Ledo rapositagika tana!]
Tanamo bereimu ri sia.”
16 Nipoiyo i Abraham ali haitu.
Nibilana kadea doi niuli i Efron,
haitumo pataatu mpeka doi salaka,
nantuntuni potimba nipake ntopobalu.
Pade nidekeina doi haitu ka i Efron,
nisabiki ntoHet.
17 Jadi ivesiamo tesana talua i Efron ri sinjori vatu mpobolo ri bagia Makhpela ri sabingga mpandake ngata Mamre,
najadi tana i Abraham mboto.
Talua,
vatu mpobolo,
bo pura-pura kayu ri tana haitu najadi bagia i Abraham.
18 Tana haitu nipakatantu ntoHet majadi tana i Abraham tempo nasiromu ri bobaa ngata.
19 Naliu haitu nitana i Abrahammo bereina riara vatu mpobolo ri bagia Makhpela,
ri mpandake ngata Hebron ri Tana Kanaan.
20 Ivesiamo talua bo vatu mpobolo ntoHet nidekei ka i Abraham rapajadina tana podayo.