I Ishak nipoanaka
21
TUPU nompakadupa janjiNa ka i Sara.
2 Jadi ri tempo nipakatantu nTUPU,
natianamo i Sara bo nipoanakana saito ngana langgai ka i Abraham tempo i Abraham natuamo.
3 I Abraham nompoposanga ngana dako nesuvu haitu i Ishak.
4 Tempo ngana haitu noumuru valu mbongi,
i Abraham nombasuna i Ishak,
nangoseaka anu niparenta nu Alatala ka ia.
5 I Abraham noumuru saatu mpaemo tempo i Ishak nipoanaka.
6 Nangulimo i Sara,
“Alatala nompopongiri yaku sabana kadamba raraku.
Pura-pura tona mangepe yaku noana,
mongiri bo madamba muni.
7 Baipia ledo ria saitoa manjarumaka yaku mompatomi ngana.
Tapi hitupa yaku noanamo saito ngana langgai ka i Abraham,
nau ia natuamo!”
I Abraham nompopalai i Hagar bo i Ismael
8 I Ishak nantambaimo kambasona.
Tempo i Ishak netaamo netomi,
i Abraham nompovia posusa ka ia.
9 Tempo haitu i Ismael,
ngana nipoanaka i Hagar toMesir ka i Abraham,
nompongeika i Ishak,
ana i Sara.
10 Nanggita haitu,
naraumo i Sara bo niulikana bereina i Abraham,
“Popalaimo mombine haitu bo anana,
sabana ana nu batua haitu ledo rakaboli nu kakalumanamu mosinggani-nggani nte anaku i Ishak.”
11 Tesa haitu nompakabuku rara i Abraham sabana i Ismael anana muni.
12 Tapi Alatala nanguli ka i Abraham,
“Nee masusa raramu sabana anamu bo batuamu haitu.
Kana muepe pura-pura anu niuli i Sara ka iko,
apa mulimu rareke muli nopuna lako nte i Ishak.
13 Tapi ana nu batuamu,
haitumo i Ismael,
Kupopomuli muni ia sampe ia majadi totua ntodea sangu ngata mbaso,
sabana ia muni anamu.”
14 Kamaile mpadondona,
niala i Abrahammo baku bo kulimba binata nidau rapomboli uve bo nidikana ri vinga i Hagar pade nitudunamo ira ntaliana haitu malai.
Jadi haumo i Hagar ntaliana ri Karava Bersyeba.
15 Naotipa uve nipobakura,
nibolinamo anana ri puna kayu kodi,
16 bo haumo ia nonturo nakavao sakide,
nitasere samporempe kakavaona,
sabana niulina,
“Ledo kupakule manggita anaku mamate.”
Ia nonturo ri sia bo notumangi pakamangga.
17 [I Ismael notumangi muni.]
Alatala nangepe tangi nu ngana haitu,
jadi malaeka nu Alatala lako ri suruga,
nombaronde i Hagar ivei:
“Hagar,
nee masusa raramu.
Nee maeka,
sabana niepe nu Alatalamo suara nu anamu haitu.
18 Peanggamo!
Anggatakamo ngana haitu,
bo tatausimo ia,
sabana Yaku mompopomuli ia majadi todea sangu ngata mbaso.”
19 Naliu haitu Alatala nompopakita sangu buvu ka i Hagar,
bo haumo ia nangisi pomboli uve anu nipovia lako ri kulimba,
bo nipainukana anana.
20 Alatala nompiara ngana haitu,
sampe ia nambaso.
Ia naroo ri karava bai bo najadi topopana.
21 Jadi nonturomo ia ri Karava Paran,
bo tinana nangala saito mombine toMesir rapoberei nu anana.
Pojanji i Abraham bo i Abimelekh
22 Tempo haitu i Abimelekh ante i Pikhol,
tadulako ntantarana,
nakava nte i Abraham bo nanguli,
“Alatala nomporoa iko riara mpengaya-ngaya anu nipoviamu.
23 Sabana haitu,
pojanjimo nte yaku bo raepe nu Alatala,
iko ledo movia anu madaa ka yaku,
bara ka ana-anaku bara ka muli-muliku.
Yaku movia mabelo ka iko,
ivesia muni mupovia ka yaku bo ka todea ngata niponturomu hitu.”
24 I Abraham nanguli,
“Yaku mojanji!”
25 Tapi i Abraham nongalu ka i Abimelekh apa batua-batua i Abimelekh nombaago sangu buvu.
26 Nesana i Abimelekh:
“Ledo nisaniku isema nangagona.
Bo ledo muni niulimu ka yaku,
dako hitu pade niepeku.”
27 Naliu haitu i Abraham nangala bara sakoangu bimba bo japi,
nidekeina ka i Abimelekh,
pade nipoviara pojanji.
28 I Abraham nombataniaka papitu ana bimba besina lako ri bimba-bimbana.
29 Pade nangulimo i Abimelekh ka i Abraham,
“Rapokuya ana bimba nigaamu haitu?”
30 Nesana ia,
“Papitu bimba hitu kana ratarimamiu lako nte yaku majadi tanda nipoiyomiumo buvu hitu yaku nokaena.”
31 Sabana haitu,
tona mombakasangai ponturo haitu Bersyebaa,
apa ira randua nojanji ri sia.
32 Naliu ira randua novia pojanji ri Bersyeba,
nanjilimo i Abimelekh bo i Pikhol tadulako ntantarana,
hau ri ngata ntoFilistin,
ngatara mboto.
33 Jadi nituda i Abrahammo sanggayu kayu tamariska ri Bersyeba,
tanda pojanjira.
Naupu sia,
nisombanamo Alatala anu natuvu sampe ri kasae-saena.
34 Naliu haitu,
da nasaepa i Abraham nonturo ri ngata ntoFilistin.