I Abraham bo i Abimelekh
20
I Abraham nolinja hau ri bagia Negeb bo naroo sampalai ri olo ngata Kades bo Karava Syur.
Naupu sia ia nolinja ri ngata Gerar.
2 Ri ngata haitu i Abraham nangulika tona,
i Sara tueina.
Jadi i Abimelekh,
magau ri ngata Gerar,
nombatudu tona mangala i Sara rapobereina.
3 Naria sambongi nakavamo Alatala ri pangipi i Abimelekh bo nanguli,
“Iko kana mamate sabana iko nangala mombine tutu,
apa ia berei ntona.”
4 Tapi i Abimelekh dopa nosimperou nte i Sara.
Jadi nangulimo ia,
“Pue!
Komiu mompatesi yaku bo todeaku anu ledo nasala?
5 Berei nu mombine haitu mboto nanguli ka yaku i Sara tueina!
Bo mombine muni nanguli i Abraham tuakana.
Jadi anu hitu nipoviaku ante rara nagasa bo ledo nasala yaku!”
6 Nesanamo Alatala riara mpangipi i Abimelekh,
“NisaniKu muni iko novia anu tutu ante rara nagasa,
jadi Yaku nombalava iko movia dosa ri ngayoKu.
Haitu sampe ledo nidekeiKu iko mombakabe ia.
7 Jadi popanjilimo berei ntona tutu,
sabana langgai haitu nabi,
bo ia mosambaya ka iko ala iko ledo mamate.
Tapi ane ledo mupopanjili ia,
musanimo,
iko tantu mamate,
iko bo tona nosinggani-nggani nte iko.”
8 Kamailena nipokio i Abimelekh puramo tomaoge,
bo nitesana ka ira anu najadi haitu,
jadi naviora mpuu rarara.
9 Naliu haitu,
nipokio i Abimelekhmo i Abraham bo nanguli,
“Nuapa nipoviamu ka kami?
Nuapa sala nipoviaku ka iko,
sampe iko mompakasilaka karoku,
bo kamagauaku?
Iko novia anu ledo masipato ka yaku!
10 Nakuya bo nipoviamu anu ivehitu?”
11 Nesana i Abraham,
“Nipekiriku tona ri ngata hitu ledo natundu nte Alatala.
Naeka yaku rapatesi sabana bereiku.
12 Bereiku mpuu-mpuu tueiku,
ana ntuamaku,
tapi kami ledo nosantina,
tapi ia nipobereiku.
13 Tempo Alatala nantudu yaku mompalaisi banua ntuamaku bo molinja-linja dako ri sangu ngata hau ri ngata ntanina,
niulikumo ka bereiku ivei:
‘Ane mpuu-mpuu mupotove yaku,
ri umba-umba ngata rakakavata,
ulimo iko tueiku.’ ”
14 Naliu haitu,
niala i Abimelekhmo tovau,
bimba bo japi,
batua langgai bo batua mombine.
Nidekeina pura haitu ka i Abraham,
bo nipopanjilina i Sara,
berei i Abraham.
15 Bo i Abimelekh nanguli,
“Ngataku hitu natebuka ka iko.
Karoomo riumba mupokono.”
16 Pade niulina ka i Sara,
“Nidekeikumo sanjobu mpeka doi salaka ka tuakamu,
haitumo tanda kagasamu ri ngayo ntodea ala rasanira iko ledo nasala.”
17-18 Dopame haitu,
TUPU nompakagampa mombine-mombine ri banua i Abimelekh sabana i Abimelek nangala i Sara berei i Abraham.
Jadi hitupa i Abraham nerapi nte Alatala,
bo Alatala nompakabelo i Abimelekh njamboko bo batua-batuana mombine,
sampe ira mamalamo moana.