Ngata Sodom bo Gomora nioposaka
I Lot nipakasalama
19
[Naupupa notesa nte i Abraham],
malaeka randua pangane haumo ri ngata Sodom bo nakava hamai nggoviana.
I Lot da nonturo ri bobaa ngata bo nikitana malaeka haitu.
Jadi neanggamo ia bo hau nombatomunaka ira.
Ia nantaputu bo notungga sampe natudu ri tana,
2 bo nanguli,
“Pua,
pesaimo ri banua nu batuaMiu hitu,
toposimo kadaMiu,
bo maturu ri siimo sambongi.
Mailepa pade rapapolamiu polipamiu.”
Tapi nesana ira,
“Domo mesai ruru.
Kami maturu ri tana lapa.”
3 Tapi i Lot mpuu-mpuu nompasimbuku ira.
Kaupuna nesaimo ira bo nesua riara banuana,
pade nipasadianamo pangande ka ira.
Nitununa muni roti ledo noragi,
pade nangandemo ira.
4 Tapi dopame ira naturu,
langgai-langgai ngata Sodom nakava nompatiku banua i Lot.
Nakava puramo,
langgai muda,
totua,
sampe sangata nakava.
5 Ira nongare ka i Lot ivei:
“Umbana tona nakava nte iko bongi hitu?
Keni mpesuvu ka kami,
apa kami madota mompogau ira!”
6 Jadi nesuvumo i Lot mosintomu ka ira,
tapi niupinamo vamba ri bengona.
7 Nanguli ia,
“Sampesuvu-sampesuvuku,
nee movia madaa.
8 Nisanimiu naria randua anaku mombine da narandaa.
Aginapa ira kukeni mpesuvu ka komiu.
Poviamo ka ira anu rapodotamiu.
Aga nee rakuyamiu tona hitu,
sabana ira nakava mekanaluu riara banuaku.”
9 Tapi nesana ira,
“Palaimo!
Iko topesovo!
Iko bara madota majadi topotangara kami!
Hitupa,
palaimo iko!
Ane ledo malai,
kami mompandasa iko melabipa pade tona randua tutu!”
Ira nompasimbuku nombasuu i Lot,
bo nitumbora vamba.
10 Tapi tona randua haitu nombauluraka palera,
nombataja i Lot mesua rabanua,
pade nombatutui vamba.
11 Pade nipakaburora pura mata ntona gahaitu,
nompamula lako ri ngana sampe totua,
sampe ledo nikavara vamba.
12 Naliu haitu,
nangulimo tona randua haitu ka i Lot,
“Isemapa vai sampesuvumu naria ri sii?
Anamu mombine bara anamu langgai,
maniamu,
bara isema sampesuvumu ri ngata hitu?
Kenimo ira mesuvu lako ri ngata hitu,
13 apa kami mompakaropu todea ngata hitu.
TUPU nangepe nadea pongalu ntona ka ngata hitu.
Haitumo sabana TUPU nombatudu kami mombaropusi todea ngata hitu.”
14 Jadi nesuvumo i Lot,
hau notesa ka tengea nu anana mombine ivei:
“Palaimo masalisa mesuvu lako ri ngata hitu,
sabana TUPU mombaropusi todea ngata hitu.”
Tapi tengea nu anana aga nekanoto nggoo sabana nisarumakara i Lot aga nokuvava.
15 Nabobayapa,
randua malaeka haitu nombasaravi i Lot,
ala masalisa malai.
Niulira,
“Pembangumo!
Kenimo bereimu bo anamu randua anu naria ri sii,
ala ledo mamate komiu ane todea ngata hitu raropusi ngena.”
16 I Lot aga nokalera-lera,
tapi TUPU naasi mataNa nanggita i Lot.
Jadi malaeka randua haitu nombakingisi pale i Lot,
pale bereina bo pale nu anana randua pade nininira nesuvu lako ri ngata bo nikabasakara ri savaliku nu ngata haitu.
17 Naupu ira nikeni ri savaliku nu ngata,
nangulimo saito malaeka:
“Pangovamo,
pakasalamamo nyawamiu!
Nee meili ri puri,
bo nee metaa ri umba-umba ri lemba Yordan!
Pangovamo hau ri buluna,
ala ledo mamate komiu!”
18-19 Nangulimo i Lot ka ira,
“Nee ivesia,
Pua.
Komiu mpuu-mpuu nompotove yaku,
batuamiu hitu.
Nabelo raramiu nte yaku bo komiu nompiara katuvuku.
Tapi bulu da nakavao.
Bara dopa makava yaku hamai,
rakava nu silaka haitumo bo mamate yaku.
20 Peintamo,
ngata kodi moitu ledo nakavao.
Dekeimo yaku mangova hau ala masalama yaku.”
21 Nesana malaeka ka ia,
“Koimo.
Ngata moitu ledo kugerosi.
22 Koimo hau masalisa,
apa dopa mamala kupovia nuapa-nuapa,
ane komiu dopa makava hamai.”
(Haitumo sabana ngata haitu nipoposanga Zoara).
23 Nebondamo eo nombavanta tana,
tempo i Lot nakava ri ngata Zoar.
24 Nakavapa i Lot ri Zoar,
nipopanau nTUPUmo uda vatu belerang nte apu lako ri langi,
ri ngata Sodom bo Gomora.
25 NipakaopoNa ngata-ngata haitu ante todeana.
Pura-pura anu natuvu ri njumangu Lemba Yordan naopo puramo.
26 Tapi berei i Lot anu nolipa nantuntuni ia,
neili ri puri,
jadi ia najadi tinja gara.
27 Naeo mpadondo,
haumo i Abraham ri peanggana nantingayo TUPU.
28 Nipetirona ngata Sodom bo Gomora bo njumangu tana Lemba Yordan.
Nikitanamo unu nu apu neore lako ri tana haitu eva unu nu apu lako ri talua naluo nitunju.
29 Ivesiamo tempo Alatala nompakagero ngata-ngata ri Lemba Yordan bo nombaropusi ngata niponturo i Lot.
Alatala nantora pomperapi i Abraham,
jadi nisuvurakaNa i Lot lako ri ngata nipakaopo haitu bo nantulungi ia nalai.
I Lot bo randua anana mombine
30 I Lot ledo nabia nonturo ri ngata Zoar,
jadi nalaimo ia bo nonturo nosinggani-nggani ante anana mombine randua ri buluna,
ri bolo nu vatu.
31 Nangulimo ngana tuaka ka tueina,
“Tuamata natuamo,
bo ledo ria langgai ri tana hitu mamala mompoberei kita,
mpo kabiasa ntona ntanina.
32 Jadi,
anumo!
Rapainuta anggur tuamata,
ralimpunosita ia.
Pade kita mosampaturu nte ia,
ala kita mompapola muli ntuamata.”
33 Bongi haitu,
nipainura anggurmo tuamara sampe nalimpuno,
bo haumo anana tuaka naturu nte tuamana.
Ledo nisani ntuamana,
anana naturu nte ia.
34 Naeo mpadondo,
nangulimo anana tuaka ka tueina,
“Ribongi yaku nosampaturu nte i Tata.
Bongi hitu rapainuta anggur vai ia sampe malimpuno,
bo pesuamo iko maturu nte ia,
ala kita manggava muli lako nte tuamata.”
35 Ivesia muni bongi haitu,
nipainura anggur vai tuamara.
Naeo mpadondo,
nembangumo tueina lako naturu nte tuamara,
bo ledo muni nisani ntuamara anu najadi haitu.
36 Naliu haitu natianamo randua ana i Lot lako nte tuamara mboto.
37 Ana tuaka,
noanaka saito ngana langgai,
bo nipoposangana i Moabb.
Iamo najadi totua ntoMoab hitu-hitu.
38 Bo anana tuei noanaka saito ngana langgai,
bo nipoposangana i Ben-Amic.
Iamo najadi totua ntoAmon hitu-hitu.