Alatala Nombasili PojanjiNa Mombadekei Saito Ngana Langgai ka i Abraham
18
Naupu haitu,
TUPU neonga nte i Abraham napara kayu mbaso anu nakarampua nipetupu ntona ri ngata Mamre.
I Abraham da nangosanaka ri vamba ntendana tempo eo mporo,
2 nitanggorakana balenggana,
bo nipeintana tatalu tona neangga ri ngayonaa.
Nipeintanapa torata gahaitu,
nasalisamo ia nombatomunaka ira bo nantaputu notungga ri tana,
3 bo nanguli,
“Mesaimo ruru!
Tabuuna komiu nakavamo ri tendaku hitu.
Nee raliunaka tendaku.
4 Pangosanakamo ruru ri vayo kayu hitu.
Kuala uve sakide rapotoposi kadamiu.
5 Kuala muni pangande sakide ala maranggaa bukumiu mompapola polipamiu.”
Nesana ira,
“Poviamo anu niulimu tutu.”
Jadi nasalisamo i Abraham hau nangulika bereina i Sara,
6 “Ala masalisa talu-njuka gando tobelona!
Poviamo roti poku!”
7 Naliu haitu,
haumo i Abraham nangala japi.
Nialana sangu ana japi toboyana bo nabelo isina,
[nisambalena,]
pade nidekeina ka toporiapu mompakangongona.
8 Naliu haitu i Abraham nangala susu bo susu nipopobaku,
ante bau japi anu niporiapu pangane,
bo nidekeina ka toratana.
Ia neangga napara nte ira ri vayo nu kayu haitu,
tempo ira da ranja mpangande.
9 Nekutanamo toratana,
“Ri umba bereimu i Sara?”
Nesana ia,
“Ria,
riara ntenda.”
10 Nanguli vai saito,
“Mpae meonga mpo tempo ivehitu muni,
yaku makava mpanjili mosinggava nte komiu randua.
Tempo haitu bereimu i Sara mariamo anana,
saito ngana langgai.”
Tapi i Sara netalingai lako ri vamba ntenda ri bengo ntorata haitu.
11 I Abraham bo i Sara natuamo bo umuru i Sara domo umuru mpoana.
12 I Sara nongiri bo notesa riara ntaina,
ivei,
“Yaku natuamo bo bereiku natua munimo.
Da kupakulepa moana?”
13 Pade nangulimo TUPU ka i Abraham,
“Nakuya i Sara nongiri bo nanguli,
‘Da moana yaku tano?
Yaku natuamo!’ ”
14 Notesa vai TUPU,
“Naria anu ledo mamala rapovia nTUPU?
Mpae meonga ri tempo nipakatantu haitu,
Yaku makava mpanjili,
bo tempo haitu i Sara mariamo anana,
saito ngana langgai.”
15 [Nangepe tesa nTUPU haitu,]
naeka i Sara,
jadi ia nesapu ivei,
“Ledo nongiri yaku.”
Tapi TUPU nanguli:
“Ledo.
Nongiri mami iko.”
I Abraham nerapi toSodom raampungi
16 Naupu notesa,
nalaimo torata haitu hau mompetiro ngata Sodom,
bo i Abraham nolipa singgani-nggani nanggeni ira.
17 TUPU nanguli riara ntaiNa,
“Ledo Kutabuniaka ka i Abraham anu Kupovia,
18 apa muli i Abraham majadi todea ngata nambaso bo nakuasa,
bo i Abrahammo sabana pura-pura manusia manggava rasi bo belo.
19 Ia nipelisiKumo ala momparenta anana bo muli-mulina mangoseaka dalaKu,
bo mokainggu manoa.
Ane ivesia pokainggura,
Kupakadupa pojanjiKu ka i Abraham.”
20 Naupu haitu nanguli vai TUPU ka i Abraham,
“Nadea mpuu tona nongalu ka ngata Sodom bo Gomora bo nambaso mpuu dosara.
21 Hau Kupeinta ngata haitu,
bara makana pongalu ntona niepeKu bara ledo.”
22 Naupu notesa,
nalai mpuumo randua torata haitu hau ri ngata Sodom,
tapi i Abraham da neangga ri ngayo nTUPU.
23 I Abraham hau nanggaparai TUPU bo nanguli,
“Berimbamo?
RapatesiMiu tona nanoa mosinggani-nggani nte tona nadaa?
24 Berimba ane maria limapulu tona nanoa ri ngata haitu?
RapatesiMiu pura tona ri ngata haitu?
Ledo rauraMiu niaMiu haitu ala masalama limapulu tona nanoa riara ngata haitu?
25 Nee tona ledo ria salana rapatesi mosinggani-nggani nte tona nadaa!
Nee,
PUE!
Komiu Topotangara dunia,
Komiu kana manoa!”
26 Nesana TUPU,
“Ane Kukava limapulu tona nanoa ri ngata Sodom,
ledo Kupakaropu ngata haitu.”
27 I Abraham nanguli,
“Yaku mpuu-mpuu netibia mompekutana Komiu,
nau yaku aga nipajadi dako ri tana bo avu.
28 Ane rapana makura alima lako ri limapulu tona nanoa,
da rapakaropuMiu ngata haitu?”
TUPU nesana,
“Ledo Kupakaropu ngata haitu ane Kukava patapulu bo alima tona nanoa.”
29 I Abraham nompapola vai tesana,
“Ane rapana patapulu tona nanoa rakavaMiu hamai?”
Nesana TUPU,
“Ledo Kupakaropu ane Kukava patapulu tona nanoa.”
30 Bo nanguli vai i Abraham,
“Nee marau,
PUE,
yaku mekutana vai.
Ane rapana talupulu tona nanoa rakava hamai?”
Nesana TUPU,
“Ledo Kupakaropu ngata haitu ane Kukava talupulu tona nanoa hamai.”
31 Nanguli vai i Abraham,
“Yaku mpuu-mpuu nompebia mekutana nte Komiu.
Ane aga ropulu tona nanoa rakava hamai?”
Nesana TUPU,
“Ledo Kupakaropu ngata haitu ane Kukava ropulu tona nanoa hamai.”
32 Sangganipa vai i Abraham nanguli,
“Nee marau PUE,
yaku mekutana vai sangganipa.
Ane rapana damo aga sapulu tona nanoa rakava hamai?”
Nesana TUPU,
“Ledo Kupakaropu ngata haitu ane Kukava sapulu tona nanoa hamai.”
33 Naupu TUPU notesa ivehaitu nte i Abraham,
nalaimo Ia bo i Abraham nanjilimo hau ri ponturona.