Suna Najadi Tanda Pojanji nu Alatala ante i Abram
17
Tempo i Abram noumuru (99) siopulu sio mpae,
TUPU neonga nte ia,
bo nanguli,
“Yakumo Alatala Nambaso Kakuasana!
Oseakamo parentaKu bo turusimo dotaKu.
2 Yaku mojanji nte iko,
Yaku mombadekei madea mpuu muli ka iko.”
3 Jadi notunggamo i Abram,
bo Alatala nanguli ka ia,
4 “Hitumo pojanjiKu nte iko:
Yaku mojanji,
ikomo momulika todea ri bara sakuya ngata mbaso.
5 Sabana haitu,
sangamu domo rakasangai i Abram tapi i Abrahama.
6 Yaku mompopomuli iko madea,
bo madea mpuu ngata nu muli-mulimu,
bo bara sakondua mulimu haitu majadi magau.
7 Yaku movia pojanji ante iko bo muli nu mulimu sampe ri kasae-saena.
Yaku majadi Alatalamu bo Alatala nu mulimu.
8 Sii-sii iko topesovo,
tapi ngata niponturomu hitu-hitu Kudekei ka iko bo ka mulimu,
haitumo njumangu tana Kanaan majadi tanamu sampe ri kasae-saena,
bo Yaku majadi Alatala nu mulimu.”
9 Notesa vai Alatala ka i Abraham,
“Iko bo muli nu mulimu kana mangoseaka pojanji hitu.
10 Langgai-langgai naria nte komiu kana rasuna.
11 Komiu kana rasuna bo haitumo majadi tanda pojanjiKu ante komiu.
12 Ngana langgai noumuru valu-mbongi kana rasuna.
Pura-pura langgai naria nte komiu,
anu nipoanaka ri banuamu,
bara batua nialimu lako nte tosangatana anu ledo nireke mulimu,
kana rasuna.
Ivesia rapovia sampe muli nu mulimiu.
13 Langgai nipoanaka ri banuamiu bo batua nialimiu kana rasuna pura.
Jadi posuna haitu majadi tanda ri karomiu,
pojanjiKu nte komiu maria sampe ri kasae-saena.
14 Bo langgai ledo nisuna,
domo rareke todeaKu,
sabana ia nombaliunaka pojanjiKu.”
15 Alatala nanguli ka i Abraham:
“Bereimu i Sarai tuumo muronde i Sarai.
Nompamula sii-sii,
sangana i Sarab.
16 Yaku mombadekei rasi bo belo ka ia,
bo lako nte ia muni yaku mombadekei ka iko saito ngana langgai.
Yaku mboto mombadekei rasi bo belo ka ia,
sampe ia majadi tina ntodea ri bara sakuya ngata mbaso,
bo bara sakondua mulina majadi magau.”
17 Jadi notunggamo i Abraham nongiri bo nanguli riara ntaina,
“Berimba langgai noumuru saatu mpae moana vai!
Umuru i Sara siopulu mpaemo.
Apa da moana ia?”
18 I Abraham nanguli ka Alatala,
“Agina i Ismaelmo rakaboli nu kakalumanaku!”
19 Tapi Alatala nanguli,
“Ledo.
Bereimu i Sara moana saito ngana langgai ka iko,
bo mupoposanga ia i Ishakc,
bo Yaku movia pojanji hitu nte ia bo mulina sampe ri kasae-saena.
20 NiepeKumo perapimu ka anamu i Ismael.
Jadi Kudekei rasi ka ia,
bo Kupopomuli madea mpuu.
Ia momulika sapulu randua magau,
bo Yaku mompajadi mulina majadi todea ri sangu ngata mbaso.
21 Tapi pojanji Kupovia ka anamu i Ishak.
Ia rapoanaka bereimu i Sara mpae meonga mpo tempo hitu muni.”
22 Naliupa Alatala notesa nte i Abraham,
nalaimo Ia.
23 Eona haitu muni nipokio i Abrahammo anana i Ismael,
bo pura-pura langgai anu naria ri banuana,
langgai anu nipoanaka ri banuana,
bara batua langgai nialina.
Ia nombasuna ira eo haitu muni,
nangoseaka parenta nu Alatala ka ia.
24 I Abraham noumuru siopulu sio-mpaemo tempo ia nisuna.
25 Anana i Ismael noumuru sapulu talu mpaemo tempo nisuna.
26 I Abraham bo anana i Ismael nisuna nosinggani-nggani eo haitu.
27 Bo pura-pura langgai nonturo nte i Abraham,
anu nipoanaka ri banuana,
bara anu nialina lako nte tosangatana,
nisuna pura nosinggani-nggani nte i Abraham.