I Hagar bo i Ismael
16
I Sarai berei i Abram,
dopa noana.
Naria saito batuana toMesir,
nosanga i Hagar.
2 Nangulimo i Sarai ka bereina i Abram,
“Nisanimu,
ledo nidekei nTUPU yaku moana.
Sabana haitu,
peroukamo batuaku.
Bara ia mamala moana ka yaku.”
I Abram nompoiyo patuju i Sarai.
3 Jadi i Sarai,
nombadekei batuana i Hagar ka i Abram majadi berei piarana.
Tempo haitu nagana sapulu mpae i Abram nonturo ri tana Kanaan.
4 Jadi nosimperoumo i Abram nte i Hagar,
bo natianamo mombine haitu.
Nisani i Hagarpa ia natianamo,
[nalangamo rarana bo] nibanjereninamo i Sarai.
5 Jadi nangulimo i Sarai ka i Abram,
“Nidekeikumo batuaku ka iko,
bo nisaninapa ia natianamo,
nibanjereninamo yaku.
Ikomo sampe najadi ivesia.
Damo TUPU mombatangara kita randua!”
6 Nangulimo i Abram ka i Sarai,
“Ia batuamu.
Iko nakuasa movia nuapa mupodota ka ia.”
Jadi nasesemo inggu i Sarai nte i Hagar,
sampe nalaimo i Hagar.
7 Malaeka nTUPU nosinggavaka i Hagar napara mata uve ri karava bai,
ri dala mapola hau ri Karava Syur.
8 Malaeka haitu nanguli,
“Hagar,
batua i Sarai,
lako riumba bo hau riumba iko?”
Nesana i Hagar,
“Yaku nalai lako nte i Sarai,
tona nompobatua yaku.”
9 Nangulimo malaeka haitu,
“Panjilimo hau nte ia bo pokarajaamo mabelo ka ia.
10 Yaku mombadekei muli madea ka iko,
sampe ledo mamala rabila kadeana.
11 Iko natiana bo moanaka saito ngana langgai bo mupoposanga ia i Ismaela,
sabana niepe nTUPUmo iko nipandasa.
12 Inggu nu anamu haitu nirapaka inggu nu keledai vura.
Ia mangeva pura-pura tona bo pura-pura tona mangeva ia,
bo nau nte sampesuvuna mboto ia ledo mosinggabelo.”
13 Naliu haitu,
i Hagar nompoposanga TUPU anu notesa ka ia,
El-Roi,
batuana “Tupu anu nompeinta yaku.”
Apa niulina,
“Ri sii TUPU nompeinta yaku!”
14 Haitu sabana mata nu uve haitu niuli ntona Buvu Lahai-Roi,
batuana,
“Buvu nTupu anu Natuvu bo nompeinta yaku.”
Buvu haitu da naria ri olo ngata Kades bo ngata Bered.
15 Naliu haitu,
nipoanaka i Hagarmo saito ngana langgai.
Bo i Abram tuamana,
nompoposanga ngana haitu i Ismael.
16 I Abram noumuru valupulu ono-mpae,
tempo i Hagar noanaka i Ismael.