Pojanji nu Alatala ka i Abram
15
Naliu haitu,
nariamo tesa nTUPU nakava nte i Abram riara pompakita,
nanguli,
“Abram,
nee maeka.
Yaku mombasaliku iko lako ri anu nadaa,
bo mombadekei tambo nambaso.”
2 Nesana i Abram,
“O Pue ALATALA Nalanga Nturona!
Nuapa gunana ane radekeiMiu tambo ka yaku?
Yaku ledo noana,
bo ane mamate yaku,
kakalumanaku aga maboli ka batuaku i Eliezer,
toDamsyik haitu.
3 Ledo nidekeiMiu muli ka yaku,
jadi aga batuaku haitu rakaboli nu kakalumanaku.”
4 Tapi TUPU nanguli ka ia ivei:
“Ledo tona haitu rakaboli nu kakalumanamu.
Aga ana oteamu mboto rakaboli nu kakalumanamu.”
5 Naliu haitu,
nikeni nTUPUmo i Abram nesuvu bo niuliNa:
“Tingoa vei langi,
bo bilamo betue-betue.
Apa mupakule mombabilana?
Ivesia ngena kadea nu mulimu.”
6 Niparasaya i Abram mpuumo tesa nTUPU.
Sabana haitu,
TUPU nombareke i Abram tona nanoa.
7 Nanguli vai TUPU ka ia,
“Yakumo TUPU,
anu nanggeni iko lako ri ngata Ur-Kasdim ala mombadekei ngata hitu majadi ngatamu mboto.”
8 Nanguli i Abram,
“O Pue ALATALA,
berimba kusani ane ngata hitu majadi ngataku mboto?”
9 TUPU nanguli ka ia,
“Ala ka Yaku sangu japi besina,
sangu tovau besina,
bo sangu bimba lakina,
anu noumuru talu mpae pura.
Ala muni sambaa tonji togou bo sambaa tonji banggebodo.”
10 Jadi nialana puramo binata haitu ka TUPU,
nibinggana randua bo nipopobaresina nosintingayo.
Aga tonji-tonji gahaitu ledo nibingga randua.
11 Ane bau haitu nipetuu ntonji-tonji mpangande matepudu,
nilivusina.
12 Kanggoviana,
naluru mpuumo i Abram namonjo.
Sampesanika ia nibungusi nu landa mpirika nompakaviora rara.
13 TUPU nanguli ka i Abram,
“Toramo!
Mulimu majadi topesovo ri ngata ntanina anu ledo ngatara mboto,
bo ira rapajadi batua bo rapandasa,
pataatu mpae kasaena.
14 Tapi tona nompandasa ira Kuhuku,
bo tempo mulimu mesuvu lako ri ngata haitu,
ira manggeni kakalumana madea.
15 Tapi iko mandoe umurumu bo iko mamate masana,
bo ratana.
16 Mulimu kapata ntapina manjili tumai ri tana Kanaan.
Dopa hitu-hitu Kuhuku toAmori anu nonturo ri sii,
apa dopa nagana kadaa nu pokainggura.”
17 Nasolopa eo bo naruyomo,
sampesanika neumbamo eva apu nounu bo sulo navaya nodala ri tatanga bau nibingga haitu.
18 Eo haitumo TUPU nojanji nte i Abram niuliNa:
“Ngata hitu Kudekei ka muli-mulimu,
mompamula lako ri binangga Mesir sampe ri binangga mbaso Efrat.
19 Haitumo tana ntoKeni,
toKenas,
toKadmon,
20 toHet,
toPeris,
toRefaim,
21 toAmori,
toKanaan,
toGirgasi bo toYebus.”