I Abram Nombatulungi i Lot
14
Tempo haitu ampa magau nosieva ante alima magau ntanina.
Ampa magau haitu:
i Amrafel magau ngata Sinear (Babilonia),
i Ariokh magau ngata Elasar,
i Kedorlaomer magau ngata Elam,
bo i Tideal magau ngata Goim.
2 Ira nosieva ante alima magau,
haitumo:
i Bera magau ngata Sodom,
i Birsya magau ngata Gomora,
i Syinab,
magau ngata Adma,
i Syemeber,
magau ngata Zeboim,
bo magau ngata Bela,
haitumo ngata Zoar.
3-4 Sapulu rompae kasaena magau alima haitu natundu nte Magau Kedorlaomer,
saito lako ri magau ampa pangane.
Tapi ri mpae kasapulu tataluna,
magau alima haitu nasintuvu meeva bo nipasiromura tantarara ri Lemba Sidim,
sii-sii niuli Tasi Mate.
5 Ri mpae kasapulu ampana nakavamo i Kedorlaomer ante tatalu magau nosabinggaka ia,
bo nidagiramo toRefaim ri ngata Asyterot-Karnaim,
toZuzim ri ngata Ham,
toEnim ri ngata Syawe Kiryataim,
6 bo toHori ri buluna ri bagia tana Seir,
sampe ri ngata El-Paran ri soso nggarava.
7 Naupu haitu nanjilimo ira sampe ri ngata En-Mispat (haitumo ngata Kades),
bo nombadagi njumangu bagia ntoAmalek,
bo muni toAmori,
anu naroo ri ngata Hazezon-Tamar.
8 Pade alima magau pangane,
haitumo magau-magau lako ri ngata-ngata Sodom,
Gomora,
Adma,
Zeboim,
bo Bela (haitumo ngata Zoar),
nasiromu ri Lemba Sidim,
9 mombaeva magau ampa.
Magau ampa pangane haitumo i Kedorlaomer magau Elam,
bo magau-magau Goim,
Sinear,
bo Elasar.
Magau ampa nombaeva magau alima.
10 Ri Lemba Sidim haitu ri umba-umba naria buvu aspal.
Magau Sodom bo magau Gomora nidagimo bo tantarara nangova nalai,
hanu ira nanavu ri buvu aspalmo,
bo tona da natuvu nangova hau ri buluna.
11 Jadi pura-pura kakalumana bo kandea ri ngata Sodom bo Gomora niago bo nikeni mpalai nu balira.
12 Nikenira mpalai muni i Lot,
pinoana i Abram,
nosinggani ante kakalumana,
sabana i Lot haitu naroo ri ngata Sodom.
13 Naria saito tona nakapo nalai bo ia nakava nte i Abram toIbrani,
nombatesa posieva haitu.
Tempo haitu i Abram nonturo napara kayu-kayu mbaso i Mamre,
toAmori.
I Mamre ante sampesuvuna i Eskol bo i Aner,
roa-roa rapa i Abram.
14 Tempo niepe i Abram niago ntona pinoanana,
nipasiromuna puramo langgai anu nipoanaka ri banuana bo natau nosieva,
(318) taluatu sapulu uvalu kadeana.
Ira nombaraga balira sampe ri ngata Dan.
15 Bongi haitu i Abram nobagi ira bara sakuya ntagu.
Ivesia ia bo batuana nombaraga bo nombaeva balira sampe ri ngata Hoba,
ri bagia tasina ngata Damsyik.
16 Jadipa nialara mpanjili i Lot,
mombine-mombine bo tona ntanina.
Pura-pura kakalumana bo mbara-mbarana,
nikenira mpanjili pura.
Posintomu i Abram bo i Melkisedek
17 Naliupa i Abram nanjili nombadagi i Kedorlaomer bo magau-magau samporoa,
magau ngata Sodom hau nosinggava nte i Abram ri Lemba Syave,
anu niuli muni Lemba nu Magau.
18 I Melkisedek,
magau ngata Salema,
nanggeni roti bo anggur.
Ia saito topanggeni pesomba ka Alatala anu Nalangapa Nturona.
19 I Melkisedek nosambayani i Abram,
ivei:
“I Abram rapakaoge nu Alatala anu Nelabi Kakuasana,
anu nompajadi langi bo dunia,
20 bo ratoiyamo sanga nu Alatala anu Nelabi Kakuasana,
Topombadekei ka iko mombadagi balimu.”
Naliu haitu,
pura-pura mbara-mbara niagora pangane nibagi i Abram sapulu bagia,
bo nidekeina sangu bagia dako ri sapulu bagia haitu ka Magau Melkisedek.
21 Naupu sia,
magau ngata Sodom nanguli ka i Abram,
“Dekei ka yakumo todeaku,
bo ala ka ikomo mbara-mbara.”
22 Tapi i Abram nangulika magau haitu.
“Yaku mosumpa ri ngayo TUPU,
Alatala anu Nelabi Kakuasana,
Topompajadi langi bo dunia!
Ivei sumpaku:
23 Yaku ledo mangala nuapa-nuapa lako nte komiu tutu,
nau sanggoto bana bara tali sapatu ledo kuala,
ala ledo raulimiu:
‘Yaku nompakakalumana i Abram.’
24 Yaku ledo mangala nuapa-nuapa!
Aga anu nikande ntona nomporoa yaku hitu nialaku.
Roaku nomporoa yaku,
haitumo i Aner,
i Eskol bo i Mamre,
dekeikamo ira mangala bagiara mboto.”