I Abram bo i Lot Nogaa
13
Jadi i Abram nompalaisi tana Mesir bo hau ri bagia Negeb [tana Kanaan bagia puluna] ante bereina bo pura-pura kakalumanara,
bo hau munimo pinoanana i Lot.
2 I Abram nakalumana mpuu,
nadea bimbana,
tovauna,
japina bo nadea muni salaka bo bulavana.
3 Jadi nalaimo ira lako ri sangu ngata hau ri ngata ntanina,
napola ri ngata Betel.
Ira nakava ri olo ngata Betel bo ngata Ai.
Rahaitu ngata nipotendara pamulana bo niposunjuna vatu najadi lanta pesomba bara ipia.
4 Ri potenda haitu i Abram nombasomba TUPU.
5 I Lot naria muni batua-batuana,
bimbana,
jara bo japina.
6 Ri ngata haitu ledo nagana kaluona raponturora singgani-nggani,
sabana binatara nadea gaga.
7 Sabana haitu,
nosinggaraumo topoevu binata i Lot bo topoevu binata i Abram.
Tempo haitu toKanaan bo toFeris nonturo ri bagia haitu muni.
8 Jadi nangulimo i Abram ka i Lot,
“Nee maria posinggarau nte kita randua,
bo ante topoevu binataku bo topoevu binatamu,
sabana kita nosampesuvu.
9 Aginamo kita mogaa ponturo.
Pelisimo bagia mbana nupokono.
Ane hau ri sabingga nggana iko,
yaku hau ri sabingga njidi.
Bara iko hau ri sabingga njidi,
yaku hau ri sabingga nggana.”
10 Naliu haitu,
nipentoaka i Lotmo njumangu lemba Yordan bo nikitana naoge uvena,
nasimbayu eva ri Pampa Eden,
bo eva ri tana Mesir napara ngata Zoar.
(Tempo haitu Alatala dopa nombaropusi ngata Sodom bo Gomora ri lembana haitu).
11 Jadi nipelisi i Lotmo njumangu lemba Yordan haitu,
pade nogaamo ira.
I Lot hau ri bagia mpandake.
12 I Abram naroo ri tana Kanaan,
tapi i Lot notenda ri ngata-ngata ri Lemba Yordan napara ngata Sodom.
13 Tona nonturo ri ngata Sodom nadaa mpuu pokainggura bo nadea dosara ri panggita nu Alatala.
I Abram Nolinja ri Ngata Hebron
14 Nalaipa i Lot,
nangulimo TUPU ka i Abram,
“Lako ri peanggamu tutu,
pentoakamo pakabelo bagia mpanau,
mpandake,
tasina,
bo puluna.
15 Yaku mombadekei ka iko bo ka mulimu njumangu ngata anu nipentoakamu ala majadi tanamu sampe ri kasae-saena.
16 Yaku mombadekei muli madea ka iko,
sampe ledo ria tona mompakule mombabila kadeara.
Ledo ria tona nompakule nombabila avu ri tana,
ivesia muni ledo ria tona mompakule mombabila kadea nu mulimu ngena.
17 Jadi pesayomo njumangu ngata hitu,
apa tana hitu Kudekei ka iko.”
18 Naliu haitu,
i Abram nombalinja tendana bo nonturo napara ngata Hebron,
napara kayu-kayu mbaso i Mamrea.
Bo rahaitu i Abraham nosunju vatu rapotunju pesomba ka TUPU.