I Abram Nipokio nu Alatala
12
TUPU nangulika i Abram,
“Palaisimo ngatamu,
sampesuvumu,
banua ntuamamu,
bo koimo hau ri ngata Kutuduaka ka iko.
2 Yaku mombadekei ka iko muli madea bo ira majadi todea ngata anu nambaso.
Yaku mombadekei rasi bo belo ka iko,
bo mompakaoge sangamu,
bo tona ntanina manggava rasi sabana iko.
3 Yaku movia belo ka tona nabelo nte iko bo Yaku mompandasa tona anu novia nadaa ka iko.
Yaku mombadekei rasi bo belo ka tona ri njumangu dunia sabana iko.”
4-5 I Abram noumuru 75 mpae tempo ia nompalaisi ngata Haran,
nangoseaka parenta nTUPU ka ia.
I Abram hau ri tana Kanaan nosinggani-nggani ante bereina i Sarai,
pinoanana i Lot,
batua-batua nikavana ri ngata Haran,
bo pura-pura kakalumana.
6 Nakava ri tana Kanaan,
nipesayo i Abrammo tana haitu sampe nakava ri kayu mbaso ri More,
haitumo posambaya ri ngata Sikhem (tempo haitu toKanaan da nonturo ri tana haitu).
7 TUPU neonga nte i Abram bo nanguli,
“Hitumo tana Kudekei ka mulimu.”
Jadi,
nisunju i Abrammo vatu rapovia lanta pesomba ka TUPU anu neonga nte ia.
8 Naliu haitu nipapolanamo polipana hau ri bagia puluna,
ri sabingga mpandake ngata Betel,
bo notenda ri olo ngata Betel bo ngata Ai,
ri bagia mpandake.
Jadi ri sia ia nosunju vatu rapovia lanta pesomba bo nombasomba Alatala.
9 Naliu haitu,
nipapolanamo polipana hau ri Kanaan bagia puluna.
I Abram ri Tana Mesir
10 Tapi tempo haitu ri tana Kanaan da tempo nggaara,
jadi i Abram sambanua hau ri bagia pulunapa,
sampe ri ngata Mesir bo nonturo hamai sampe maliu tempo nggaara.
11 Naparapa ira ri tana Mesir,
niulikanamo bereina,
“Sarai,
iko nagaya mpuu!
12 Ane toMesir mompeinta iko,
bo rasanira iko bereiku,
natantumo rapatesira yaku bo iko rapalambara matuvu.
13 Jadi aginamo nuuli iko tueiku ala yaku rapalambara matuvu bo rapobelora sabana iko.”
14 Bo nakana mpuu,
nakavapa i Abram ri tana Mesir,
toMesir nompeinta nagaya mpuu i Sarai.
15 Bara sakondua topokarajaa ri banua kamagaua nompeinta ia bo nangulika magau,
nagaya mpuu mombine haitu.
Haitumo sampe i Sarai nikeni hau ri banua kamagaua.
16 Magau nompokono i Sarai,
jadi ia nabelo nte i Abram bo nombadekei batua,
bimba,
jara,
japi,
bo unta ka ia.
17 Tapi TUPU nompakadua ntamo magau bo pura-pura tona ri banua kamagauana,
sabana magau nangala i Sarai,
berei i Abram.
18 Jadipa magau nompokio i Abram bo nanguli,
“Nuapa nipoviamu ka yaku?
Nakuya ledo niulimu ane ia bereimu?
19 Nakuya bo niulimuka ia tueimu bo nompalamba yaku nangala ia majadi bereiku?
Siimo bereimu.
Alamo ia bo koi palaimo!”
20 Magau nomparenta bara sakondua topokarajaa ri banuana mompopalai i Abram lako ri ngata haitu ante bereina bo kakalumanana.